Հայաստանի անկախության տոնին անցկացվելու է վարչապետի մրցանակաբաշխություն
Հայաստանի անկախության 28-րդ տարեդարձին նվիրված գլխավոր միջոցառումն այս տարի անցկացվելու է Գյումրիում։ Տոնական միջոցառումները սկսվելու են ժամը 11։00-ից ու շարունակվելու են մինչև 23։00-ն։ Լրագրողների հետ հանդիպմանը ՀՀ կառավարության աշխատակազմի ղեկավար Էդուարդ Աղաջանյանը ներկայացրեց օրվա ընթացքում նախատեսված միջոցառումները՝ երաժշտական ծրագիր, հանրային քննարկում, ցուցահանդես, ֆիլմի դիտում, ժամը 19։00-ին Վարդանյանց հրապարակում տեղի է ունենալու գալա համերգ՝ հայ և արտասահմանյան հայտնի երգիչների, երաժիշտների մասնակցությամբ։ Լինելու է օդապարիների փառատոն։
Գյումրիի քաղաքապետ Սամվել Բալասանյանն ասաց, որ Գյումրիում արդեն աննախադեպ ակտիվություն է նկատվում, 1988 թվականի երկրաշարժից հետո նման մասշտաբի միջոցառում Գյումրիում չի եղել, ակնկալում են 15 հազար այցելու։ Նա նշեց, որ հյուրանոցներում արդեն տեղեր չկան, բնակիչների կողմից անհատական տներ են տրամադրվում։ Սեպտեմբերի 21-ին 4 գնացք է ժամանելու Գյումրի, խոսքը 1500 այցելու մասին է։
Սեպտեմբերի 21-ին առաջին անգամ կանցկացվի վարչապետի մրցանակաբաշխություն «Մեր ժամանակների հերոսը» խորագրով, որին կմասնակցեն մարդիկ, ովքեր փոխում են իրենց շրջապատի կյանքը, սեփական ուժերով բզինես են ստեղծում, ապագան կապում են Հայաստանի հետ։ Ասուլիսում ՀՀ վարչապետի աշխատակազմի հանրային կապերի և տեղեկատվության կենտրոն ՊՈԱԿ-ի ղեկավար Հովհաննես Մովսիսյանն ասաց, որ առաջին մրցանակաբաշխության հյուրերն են լինելու վերջին մեկ տարվա ընթացքում «Մեր ժամանակների հերոսը» հաղորդման հերոսները։
«Ունենք 45 հերոս, որոնք մրցանակների հավակնորդներն են։ 13 մրցանակ է լինելու, 12-ը տարբեր պաշտոնյաների, գործարարների կողմից են տրվելու հերոսներին, մեկը՝ վարչապետի։ Մրցանակաբաշխության իմաստն այն է, որ ամեն քաղաքացի կարող է հերոս լինել՝ անհատական ջանքերով, աշխատանքով ստեղծելով ամեն ինչ, հասնելով հաջողության»,- նշեց նա։
Հ. Մովսիսյանն ասաց, որ ժյուրին առանձնացրել է կարճ ցուցակը, վարչապետն ընտրել է այն մարդկանց, ովքեր ստանալու են մրցանակները։ «Ժյուրին հենվել է այն չափանիշի վրա, թե ինչքան ջանք է պահանջվել տվյալ մարդուց, որպեսզի հասնի իր երազանքին, նաև ստեղծագործականությունը, նորարարչականությունն է հաշվի առնվել»,- նշեց նա։
Մրցանակաբաշխության արձանիկի հեղինակներն են «Անտարեսի» տնօրեն Արմեն Մարտիրոսյանը, նկարիչ Ռուբեն Մալայանը։
Անկախության 28-րդ տարեդարձին նվիրված միջոցառումների բյուջեն կազմում է 220 միլիոն դրամ։
Է. Աղաջանյանը նաև ներկայացրեց , թե ինչ ընթացակարգով է տեղի ունեցել գնումների գործընթացը։
«Հաշվի առնելով Հայաստանի անկախության օրվան նվիրված միջոցառումների ծրագրերի իրականացման առանձնահատկությունը, նշանակությունը, կարևորությունը, Հայաստանի կառավարությունը որոշել է միջոցառումների կազմակերպման գործընթացն իրականացնել «Գնումների մասին» Հայաստանի օրենսդրությամբ նախատեսված մեկ անձից գնում կատարելու ընթացակարգով»,- ասաց նա։
Է. Աղաջանյանի խոսքով, անկախության 28-րդ տարեդարձի տոնական միջոցառումների կազմակերպման ընթացքում վարչապետի աշխատակազմը բախվել է բազմաթիվ խնդիրներ։
«Եթե կազմակերպվեր մրցութային ընթացակարգով, կկորցնեինք կառավարման օղակները, վերահսկելի չէր լինի միջոցառման թե տեխնիկական, թե բովանդակային հատվածը։
Այս մի քանի ամիսների ընթացքում աշխատանքային խումբը վարել է մի շարք բանակցություններ, որի արդյունքում ընտրվել է թվով 75 մեծ, փոքր, միջին բիզնեսի ներկայացուցիչ հանդիսացող տնտեսական սուբյեկտներ։ Փաստացի, տվյալ պարագայում տվյալ գործընթացի կազմակերպումը դիտարկվում է դե յուրե որպես մեկ անձից գնում, սակայն միջոցառումների կազմակերպման գործում ներգրաված է 75 տնտեսվարող սուբյեկտ։ Այս դեպքում կարող է լինել մեկ անձից գնում կատարելու տարմինի ընկալման խնդիր։
Հաշվի առնելով 28-րդ տարեդարձին նվիրված միջոցառումների ծրագրի իրականացման առանձնահատկությունը, նշանակությունը, կարևորությունը, դրա ճշգրիտ ու որակյալ կազմակերպելու պարտավորությունը, հարկավոր էր իրականացնել ընկերությունների որոշակի սելեկցիա»,- ասաց նա։
ՀՀ կառավարության աշխատակազմի ղեկավարը նշեց, որ նախկին տարիներին անկախության տոնին նվիրված, ինչպես նաև նմանատիպ մյուս միջոցառումների համար, որոնք իրենց մասշտաբներով մի քանի անգամ ավելի փոքր են եղել, պետական բյուջեից տրամադրվել է հաճախ նույնքան, կամ մի քանի անգամ ավելի գումար։ Է. Աղաջանյանի խոսքով, նման ձևաչափով և նման բովանդակությամբ միջոցառում Հայաստանում մինչ օր չի կազմակերպվել։ Նա տեղեկացրեց, որ մայրաքաղաք Երևանում, նաև Հայաստանի մյուս մարզերում քաղաքային բյուջեներով նախատեսված միջոցների շրջանակում, կազմակերպվելու են տարբեր միջոցառումներ։
Հարակից հրապարակումներ`
Լրահոս
Տեսանյութեր
Եթե Տավուշի գյուղերի հանձնման պրոցեսը տեղի ունենա, այդտեղից կսկսվի պետականության վերջնական ավարտը