Ձեր վստահելի աղբյուրը

ՀՀ ֆինանսների նախկին նախարար, ՊԵԿ նախկին նախագահ Գագիկ Խաչատրյանի պաշտպաններն առաջին ատյանի դատարանի կողմից կայացված կալանավորման որոշման դեմ վերաքննիչ բողոք են ներկայացրել:

Հենց դատարանի դիմաց լրագրողների հետ զրուցում  Գ. Խաչատրյանի պաշտպան Երեմ Սարգսյանն ասաց, որ առաջին ատյանի դատարանը, ըստ էության, թույլ է  տվել ակնհայտ, կոպիտ խախտումներ։

«Կալանավորումն այնպիսի  հանգամանքներով է հիմնավորել, որոնք հանգեցրել են ակնհայտ կոպիտ խախտումների, որի համար արդեն Հայաստանի արդարադատության նախարարին և դատավորների ընդհանուր ժողովի կարգապահական հանձնաժողովին դատավորին կարգապահական պատասխանատվության ենթարկելու հաղորդում ենք ներկայացել»,- ասաց պաշտանը։

Նա նշեց, որ  երբ անձին ներկայացնում են  կալանավորման միջնորդություն, պարտադիր պետք է դատարանին ներկայացվեն նյութեր, որոնց հիման վրա դատարանը կարող է ողջամիտ ենթադրություն անել՝ արդյոք այն մեղադրանքը, որ ներկայացվում է  անձին, ինքը կապ ունի այդ մեղադրանքների հետ։

«Դատարանը պետք է հաստատի, որ կարողանա անձին կալանավորել։ Խոսքը գնում է  հիմնավոր կասկածի մասին։ Դատարանի դատական ակտն ու դատարանի տրամադրության տակ առկա նյութերն ուսումնասիրելով՝ ակնհայտ է դառնում, որ դատարանն իր տրամադրության տակ ընդհանրապես չի ունեցել Քրեական օրենսգրքի 179-րդ հոդվածի 3-րդ մասի 1-ին կետով առաջադրված մեղադրանքի որևէ փաստական տվյալ։ Այսինքն դատարանը նույնիսկ չէր կարող ընդհանրապես պատկերացնել՝ արդյոք նման հանցագործություն առկա է, թե ոչ։ Բայց ինչ է արել դատարանը, գրել է, որ այս հոդվածով մեղադրանքի հիմնավոր կասկած, ըստ էության, առկա է»,- ասաց Ե. Սարգսյանը։

Նա ընդգծեց, որ դատարանն ընդհանրապես չուներ փաստական տվյալ, նյութ, որի հիման վրա կարող էր հիմնավոր կասկածի շեմը հաղթահարված համարել, այսինքն պատկերացնել՝ հանցագործություն կա, թե ոչ. «Դատարանի տրամադրության տակ չկան այդպիսի նյութեր, դատարանը չի հետազոտել այդպիսի նյութեր, դատարանի որոշման մեջ չկան նշումներ այդպիսի նյութերի մասին»։

Փաստաբանի խոսքով, դատարանը կոպիտ խախտում է թույլ տվել, որովհետև անձի ազատության իրավունքն է սահմանափակվել։

«Այստեղ պետք է անձերից վեր կանգնենք, դատարանը չի կարողացել անձերի մոտեցումից վեր կանգնել, մեխանիկական մոտեցում է ցուցաբերել»,- ասաց Երեմ Սարգսյանը։

Հարցին, եթե Գ. Խաչատրյանը չի ընդունում մեղադրանքը, ինչո՞ւ է  պետական բյուջե խոշոր գումար վերադարձրել, ինչի մասին ԱԱԾ-ն էր հայտարարել, Ե. Սարգսյանն ասաց, որ նման տվյալ չի տեսել, նշված քրեական գործով գումար փոխհատուցվել է, սակայն ով է փոխհատուցել, ինչ հանգամանքներով, դրան չի անդրադառնա այս պահին։

«Այս քրեական գործով, չնայած մեղադրանքը չենք ընդունում, սակայն տեսնելով արհեստական մոտեցումը, մեր հորդորով պետական համապատասխան մարմնի դեպոզիդ  հաշվին վճարվել է կոնկրետ այս հոդվածներով մեղադրանքի մեջ նշված գումարները որպես ենթադրյալ պատճառված վնասի հնարավոր փոխհատուցում․ մեղադրանքների մեջ նշված է 192 միլիոն ու 34 միլիոն։ Գումարը վճարվել է դեպոզիդ հաշվին  արտերկրից՝ ցույց տալու անձի վարքագիծը դրական քննության ամբողջ ընթացքում, եթե նույնիսկ կհիմնավորեն, որ այս հանցագործությունները կան երաշխիք ունեն, որ այս գումարները կարող է վերադարձվել պետական բյուջե։

Վնասը վերականգնվել է,  ցույց տալու համար պատշաճ վարքագիծ, որևէ փաստական տվյալ չկա, որ անձը հանցագործություն է կատարել, չկան անձին կալանավորելու հիմքեր, առկա են առողջական լուրջ խնդիրներ, որոնք Հայաստանում,  նույն պետական մարմինների կողմից տրված փաստաթղթերի համաձայն, չեն կարող բուժում իրականացնել։ Այս ամբողջի համատեքստում  գրավն էլ ասում են թույլատրելի չէ, դատարանն էլ որևէ պատճառաբանության չի նշում։
Եթե որևէ մեկը կասի, որ այստեղ խոսք է գնում արդար դատաքննության մասին, ակնհայտ է, որ նման բան չկա»,- ասաց փաստաբանը։

Ե. Սարգսյանը նշեց, որ իր պաշտպանյալի դիրքորոշումը հետևյալն է. «Թող լինի ամբողջական քննություն, պարզաբանվեն բոլոր հանգամանքները, եթե կա խնդիր, որը որ կհիմնավորվի դատարանով կամ որևէ ապացույցներով, ինքը պատրաստ է այդ ամեն ինչին պատասխան տալ, բայց պետք չէ արհեստականորեն կալանքի հիմքեր ստեղծեն։ Պետք է այնպիսի ծանրակշիռ փաստարկ ներկայացներ դատարանը, որ այլևս ստորագրությունը ի զորու չէ նրա պատշաճ վարքագիծը ապահովել, միայն կալանավորումը կարող է»։

Երեմ Սարգսյանն ընդգծեց, որ բազմիցս ուղղորդված քննություն են տեսել,  դրա մասին այնպիսի աղաղակող փաստարկներ կան, որ  այս պահին իր պաշտպանյալը թույլ չի տալիս ավելի ծավալուն բացել։ 

Ավելի վաղ ԱԱԾ-ից հայտնել էին, որ փետրվարի 2-ին հարուցված քրեական գործի շրջանակներում տևական ժամանակ ձեռնարկված լայնածավալ օպերատիվ-հետախուզական միջոցառումների և քննչական գործողությունների արդյունքում ձեռք բերված փաստական տվյալների հիման վրա, օգոստոսի 27-ին խուզարկություններ են կատարվել ՀՀ պետական եկամուտների կոմիտեի նախկին նախագահ, ֆինանսների նախկին նախարար Գագիկ Խաչատրյանի, ինչպես նաև վերջինիս հետ փոխկապակցված մի շարք անձանց առանձնատներում և բնակարաններում։ Նույն օրը՝ խուզարկությունների ավարտից հետո, Գագիկ Խաչատրյանը և Կարեն Խաչատրյանը (ՀՀ ՊԵԿ նախկին բարձրաստիճան պաշտոնյա) ՀՀ քրեական օրենսգրքի 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով նախատեսված հանցագործությունների (ծանր հետևանքների առաջացմամբ զուգորդված պաշտոնեական դիրքի չարաշահում և առանձնապես խոշոր չափերով գույքի վատնում) կատարման կասկածանքով բերման են ենթարկվել ՀՀ ԱԱԾ քննչական դեպարտամենտ և ձերբակալվել։