Ձեր վստահելի աղբյուրը

Ազգային ժողով-կառավարություն հարցուպատասխանի ժամանակ «Իմ քայլը» խմբակցության պատգամավոր Հարություն Բաբայանը ՀՀ ԿԳՄՍ նախարար Արայիկ Հարությունյանից հետաքրքրվեց Շատիվանքի պեղումներից և հետազոտական աշխատանքներից։

«Գիտեմ, որ այս տարվա համար հատկացվել էր 5,5 մլն և եկող տարվա համար 15 մլն դրամ։ Ի՞նչ փուլում են այդ հետազոտական և վերականգնողական աշխատանքները»։

Նախարարն ասաց, որ այս պահին հարցի հետ կապված հստակ պատասխան չի կարող տալ և գրավոր կպատասխանեն։

Պատգամավորը նաև հետաքրքրվեց. «Մոտ ժամանակներս պլանավորվու՞մ է թանգարանները համապատասխան տեխնիկակական միջոցներով հագեցնել,  պահվող արվեստի գործերը կարողանանք ճիշտ պահպանել և ցուցադրել»։

Սրան ի պատասխան Հարությունյանն ասաց. «Բոլորովին վերջերս մի շարք թանգարանների հետ կապված քննարկումներ ենք ունեցել, և այո, պահոցների խնդիր ունենք, և Ազգային պատկերասրահի, և Պատմության թանգարանի։ Մեկ ուրիշ խնդիր էլ ունենք, պեղումներից հետո հայտնաբերված գտածոների պահելու կարգը, վայրերը թերի են։ Այստեղ համալիր լուծում է պետք, իհարկե սա ենթադրում է ֆինանսական լուրջ ներդրում, քանի որ այն  ենթակառուցվածքները որ ունեն թանգարաններն այս պահին, ենթադրում են, որ ամբողջությամբ դրանք պետք է ապամոնտաժվեն և լիովին նորերը ստեղծվեն»։

Նրա խոսքով, թանգարաններում մեկ այլ խնդիր էլ կա, նկարների պահման համար օդափոխության ճիշտ համակարգի հետ կապված։

Նշենք, որ այսօրվանից ԱԺ-ում հարցուպատասխանի նոր ձևաչափ է։ Պատգամավորները կառավարության ներկայացուցիչներին հարցերը կուղղեն տեղից՝ անհատական խոսափողներով: