Զելենսկին քննադատության է արժանացել Արևելյան Ուկրաինայի շուրջ համաձայնագիր ստորագրելու համար

Քաղաքական 15:00 03/10/2019 Աշխարհում

Զելենսկին քննադատության է արժանացել Արևելյան Ուկրաինայի շուրջ համաձայնագիր ստորագրելու համար

Ուկրաինայի նախկին ղեկավար Պետրո Պորոշենկոն կոշտ քննադատության է արժանացրել երկրի նախագահ Զելենսկուն` ռուսամետ անջատողականների հետ հատուկ կարգավիճակի մասին բանակցային ծրագիր ստորագրելու համար: Պորոշենկոյի կարծիքով, Ուկրաինան նման գործարքից պարտվող կարող է դուրս գալ: Այս մասին գրում է Ամերիկայի Ձայնը։

«Հինգ տարի աշխարհը սատարոմ էր Ուկրաինայի դիրքորոշմանը, իսկ այսօր մեր դաշնակիցները լսում են բարձրացող Ռուսաստանի ձայնը: Դա պետք է փոխվի»,-ասել է Պորոշենկոն։

Իշխանության ներկայացուցիչները սակայն պնդում են, որ որևէ պարտության կամ երկրի շահերի դավաճանության մասին խոսք գնալ չի կարող:

«Ես հանդիպել եմ նախագահին, քննարկել դավաճանության մասին լուրերը, որոնք տարածվում են լրատվամիջոցներում, Ֆեյսբուքում և ամենուր: Նման բան չկա, նախագահը երաշխավորում է, որ որևէ դավաճանություն չկա», - հայտարարել է խորհրդարանական մեծամասնություն հանդիսացող «Ժողովրդի ծառա» խմբակցության ղեկավար Դավիդ Արախամիան:

«Շտայնմայերի բանաձև» անվան տակ հայտնի համաձայնագիրը, որը Ուկրաինայի իշխանությունները ստորագրել են ռուսամետ անջատողականների հետ, նախատեսում է խաղաղության հաստատում, հատուկ կարգավիճակ և ընտրություններ Դոնբասի որոշ շրջաններում:

2016թ.-ին Գերմանիայի արտգործնախարար Ֆրանկ Շտայնմայերը, ով այսօր երկրի նախագահն է, առաջարկել էր հակամարտության կարգավորման հետևյալ տարբերակը՝ ընտրություններ Ուկրաինայի անջատողական շրջաններում Ուկրաինայի օրենսդրության շրջանակներում և ԵԱՀԿ-ի հովանու ներքո, որրնց ազատ ընթացքից հետո այդ շրջանները կստանան ինքնակառավարման կարգավիճակ, իսկ Ուկրաինային կվերադարձվի վերահսկողությունն իր արևելյան սահմանի նկատմամբ:

Տեղի բնակչության խոսքով, նոր գործարքը կարգավորման նոր հույս է ներշնչում:

«Շատ ուրախ եմ այդ թվում և Ուկրաինայի համար: Ես այստեղ ապրում եմ արդեն 50 տարի և ինձ այս երկիրը պետք է: Երեխաներս էլ են այստեղ ապրում՝ Ուկրաինայում են ապրում: Մեզ պետք է բարեկամներ մնալ», - ասում է Դոնեցկի բնակիչ Տատյանան:

«Ամենակարևորը, որ դադարի պատերազմը, և շատ լավ է, որ համաձայնել են հանել զորքերը», - նշում է Վլադիսլավը, ով նույնպես բնակվում է Դոնեցկում:

2014 թվականից, երբ Ռուսաստանի աջակցությամբ Արևելյան Ուկրաինայի մի շարք շրջաններում անջատողական տրամադրություններ զարգացան, որոնք այնուհետև պատերազմի վերածվեցին, այս հակամարտությունում զոհվել է ավելի քան 13,000 մարդ:

Հարակից հրապարակումներ`

Կիևը համաձայնել է «Շտայնմայերի բանաձևին»

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: