Ձեր վստահելի աղբյուրը

Արցախի անվտանգության խորհրդի քարտուղար Վիտալի Բալասանյանի հայտարարությունների հարցն այլևս գտնվում է իրավապահ մարմինների տիրույթում, իրավապահ մարմինները զբաղվելու են այդ հարցով։ Այս մասին այսօր  կառավարության նիստից հետո լրագրողների հետ ճեպազրույցում ասաց Անվտանգության խորհրդի քարտուղար Արմեն Գրիգորյան։

Նա նշեց, որ արդեն ԱԱԾ-ում գործը քննվում է:

Նշենք, որ Վիտալի Բալասանյանը «Լայվ նյուզ»-ին տված հարցազրույցում քննադատել է վարչապետ Նիկոլ Փաշինյանին, մասնավորապես՝ «Սասնա ծռեր» կուսակցության ղեկավար կազմի հետ նրա հանդիպումը և սպառնացել է ֆիզիկապես ոչնչացնել նրանց, որոնք իր իսկ խոսքերով՝ ոտնձգություն կանեն Արցախի իշխանության և պետականության դեմ:

Այս հայտարարությանը ֆեյսբուքյան իր էջում արձագանքել էր նաև ԱԽ քարտուղար Արմեն Գրիգորյանը։Նա, մասնավորապես, գրել է. «Վիտալի Բալասանյանն իրեն պահում է որպես խուլիգան, այլ ոչ թե Արցախի նախագահի թեկնածու»։

Դիտարկմանը՝ չի՞ կարծում, որ շատ կոպիտ է արտահայտվել Արցախի հերոսի հասցեին, ԱԽ քարտուղարը պատասխանեց. «Եթե այսօր էլ տարածեի այդ հայտարարությունը, նույն ձև կարտահայտվեի»։

Լրագրողի հարցին, թե սոցցանցերում իրեն հիշեցնում են, որ Բալասանյանի հետ սեղան է նստել, հաց է կիսել ու այսօր նրան խուլիգան է անվանում, Արմեն Գրիգորյանն արձագանքեց. «Եթե նման բան եք ասում, առաջին հերթին պետք է իրենից էդ հարցը ճշտեք, որովհետև ինքն էլ վարչապետի հետ է հաց կիսել, այդ հարցն առաջինն իրեն պետք է տաք, հետո ինձ»։

Դիտարկմանը՝ նման հայտարարություններն լարվածություն չեն առաջացնի երկրների միջև, ԱԽ քարտուղարն ասաց՝ ընդհանրապես այսպիսի մոտեցում կա, թե  պաշտոնյաների միջև ինչ-որ խոսակցություն է լինելու, ապա դա ընդհանուր կարող է ազդել երկրների հարաբերությունների վրա. «Դա այդպես չի, և Արցախի մասով չի կարող այդպիսի բան լինել: Տրամաբանությունը և ամբողջ համակարգը որ կա, չեն կարող այդպիսի զարգացումներ լինեն»։

Անդրադառնալով Աղվան Վարդանյանի այն հայտարարությանը, թե ժամանակը ջնջում է փոքրերին և որ ինքը դասալիք է, ուստի իրավունք չունի վիրավորել Արցախի հերոս Վիտալի Բալասանյանին, Արմեն Գրիգորյանը պատասխանեց. «Հիմա, օրինակ, ես էլ հեղափոխությունում ներդրում եմ ունեցել, արդյոք իրավունք ունեմ հավելյալ այլ բաներ անելու, իհարկե՝ ոչ: Ես չեմ կարծում, որ իրավունք ունեմ օրենքը խախտելու»։

Նրա խոսքով՝ բոլորն էլ պարտավոր են հարգել Արցախի հաղթանակը, հեղափոխությունը և ավելի պատասխանատու դիրքորոշում ու վարքագիծ դրսևորել:

Ինչ վերաբերում է իր դասալիք լինելուն, Արմեն Գրիգորյանն ասաց, որ դա կեղծ լուր է. «Այս լուրը պարբերաբար ֆեյք լուրի միջոցով տարածվել է, և ես ուզում եմ ևս մեկ անգամ ասել՝ 2003 թվականի դեկտեմբերից մինչև 2005-ի դեկտեմբերը ծառայել եմ Պաշտպանության բանակում: Աղվան Վարդանյանը այն դաշնակն է, չէ,  որ հեղափոխությանը դեմ է քվեարկել։ Բնականաբար, պետք է այդպես ասի: Նրա կարիերան ընդհատվել է հեղափոխությամբ, որի մեջ ես ներդրում եմ ունեցել: Դա իր անձնական կարծիքն է, որ հիմնված է կեղծ լուրի վրա: Այսինքն՝ կեղծ լուր վերարտադրող քաղաքական գործիչ է»։