«Տղաները հողի տակ են, դուք ձեզ համար հանգիստ ման եք գալիս, չեք էլ ամաչում»
ՊՊԾ գնդի գրավման գործով «Սասնա ծռերի» խմբի անդամների այսօրվա դատավարությանը հարցաքննվեց ամբաստանյալ Պավել Մանուկյանը: Նա հայտարարեց, որ չի ընդունում իրեն առաջադրված մեղադրանքը: Այնուհետև նա հայտարարեց, որ որևէ հարցի չի պատասխանելու: Մեղադրող դատախազի բոլոր հարցերը մնում էին անպատասխան:
«Պատրաստել էինք 30-35 հարց հանգամանքները պարզելու, բազմակողմանի, լրիվ, օբյեկտիվ քննություն ապահովելու համար: Նկատի ունենալով, որ մեր կողմից բարձրացված որևէ հարցի պատասխան չի հնչեցվում, ավելորդ եմ համարում մյուս հարցերը հնչեցնել»,- հայտարարեց մեղադրող դատախազը:
Սպանված ոստիկան Գագիկ Մկրտչյանի կինը՝ Հասմիկ Ոսկանյանը հարցով դիմեց Պ. Մանուկյանին. «Եթե ասում եք Արմեն Բիլյանը չի կրակել Գագիկ Մկրտչյանին, խնդրում եմ ասեք՝ ո՞վ է»:
Պ. Մանուկյանն ասաց, որ դեռ մեկ տարի երկու ամիս առաջ է հայտարարել, որ Էդվարդ Գրիգորյանն է պատահական կրակել, ինքը եղել է այդտեղ:
«Այդ ժամանակ Բիլյանը եղել է զորամասի մուտքի մոտ: Կրակոցը պատահական էր, օգնել ենք Գագիկին, փաթաթել ձեռքը, միասին զրուցել ենք, կես ժամից ավելի մնացել է զորմասում, հետո մեքենայով տեղափոխել են»,- ասաց Պ. Մանուկյանը:
Նա նաև դիմեց դատավոր Մեսրոպ Մակյանին՝ հարցնելով. «Ես եղել եմ արդարության մարդ: Շատ վատ է, որ այսօր ողջ հանրապետությունով մեկ տարածում են, որ Նիկոլ Փաշինյանն է մեզ ազատել: Չեմ հասկանում՝ մեզ ազատեց Նիկոլ Փաշինյա՞նը, թե՞ մեր արդարադատությունը»:
Ամբաստանյալ Արմեն Բիլյանը նույնպես հրաժարվեց պատասխանել հարցերի: Նշեց, որ այս փուլում ցուցմունք չի տալիս, տեսնի, թե ինչպես է գնում դատական գործընթացը, իր խոսքը կասի: Նա նույնպես նշեց, որ իրեն առաջադրված մեղադրանքը չի ընդունում, մեղադրանքն իր վրա գրել են, բերել են թուղթը, դրել:
«Առաջին օրվանից ասել եմ, որ մեղադրանքը շինծու է, լկտի սուտ: Մեղադրանքը ներկայացնող քննիչներին ասել եմ՝ սրա համար պատասխան եք տալու:
Մեղադրանքը գրողը, ներկայացնողն այդ կեղծիքի համար պատասխան են տալու, հետամուտ եմ լինելու, որպեսզի արդարադատություն հաստատվի Հայաստանի դատարաններում, պայքարելու եմ արդարության համար: Գնացել եմ ապստամբության իմ ժողովրդի, արդարության համար»,- ասաց Ա. Բիլյանը:
Նիստի ավարտին Հասմիկ Ոսկանյանը խոսքն ուղղելով ամբաստանյալներին՝ նշեց. «Երեք ջահել տղամարդու կյանք եք խորտակել… Ինչո՞ւ եք ճպացնում, ճիշտ չեմ ասո՞ւմ: Երեք ընտանիք եք քանդել, դուք ցանկանում եք նոր ընտանիք կառուցել երեք զոհերի հիշատակի վրա՞: Դուք տեղյակ եք այդ երեք հոգու ծնողների, քույրերի վիճակից: Արել եք, պատասխան տվեք: Եթե ինձանով լիներ, բոլորդ պետք է ճաղերի հետևում լինեիք, սպասեիք մինչև դատավորի վճռին, ոչ թե ազատ պտտվեիք: Տղաները հողի տակ են, դուք ձեզ համար հանգիստ ման եք գալիս, չեք էլ ամաչում»:
Հիշեցնենք, որ ՊՊԾ գնդի գրավման ժամանակ զոհվել են գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։
ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը։ Վերջինս նույնպես մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝ պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։
Պավել Մանուկյանին մեղադրանք է առաջադրվել այն բանի համար, որ նա մի խումբ անձանց հետ նախնական համաձայնությամբ, 2015թ. ապրիլի 24-ին Երևան քաղաքում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014թ. մայիսից կատարել է դրա կազմակերպմանն ուղղված նախապատրաստական գործողություններ, ինչպես նաև 17.07.2016թ. կազմակերպված խմբի կազմում ապօրինի կերպով ձեռք է բերել, պահել, փոխադրել և կրել հրազեն ու ռազմամթերք, ապա կազմակերպված խմբի կազմում, զենքի գործադրմամբ, կյանքի և առողջության համար վտանգավոր բռնությամբ՝ զավթել և պահել է շենքեր, շինություններ և տրանսպորտային միջոցներ՝ զուգորդված դրանք ոչնչացնելու, վնասելու սպառնալիքով, ինչպես նաև նույն եղանակներով պատանդ է վերցրել և պահել երկուսից ավելի անձանց, որոնք կատարել է զավթածը և պատանդներին ազատելու պայմանով պետությանը գործողություններ կատարելուն հարկադրելու նպատակով, նույն ժամանակ կազմակերպված խմբի կազմում, կյանքի համար վտանգավոր բռնություն գործադրելով, ինչպես նաև դրա գործադրման սպառնալիքով՝ հափշտակել է հրազեն ու ռազմամթերք , բացի այդ հրկիզման եղանակով դիտավորությամբ ոչնչացրել է տրանսպորտային միջոցներ՝ սեփակատատերերին պատճառելով առանձնապես խոշոր չափերի վնաս։
Արմեն Բիլյանին մեղադրանք է առաջադրվել այն բանի համար, որ նա 2016թ. հուլիսի 17-ին կազմակերպված խմբի կազմում ապօրինի կերպով ձեռք է բերել, պահել, փոխադրել և կրել հրազեն ու ռազմամթերք, ապա կազմակերպված խմբի կազմում, զենքի գործադրմամբ, կյանքի և առողջության համար վտանգավոր բռնությամբ՝ զավթել և պահել է շենքեր, շինություններ և տրանսպորտի միջոցներ՝ զուգորդված դրանք ոչնչացնելու, վնասելու սպառնալիքով, ինչպես նաև նույն եղանակներով պատանդ է վերցրել և պահել երկուսից ավելի անձանց, որոնք կատարել է զավթածը և պատանդներին ազատելու պայմանով պետությանը գործողություններ կատարելուն հարկադրելու նպատակով, նույն ժամանակ կազմակերպված խմբի կազմում կյանքի և առողջության համար վտանգավոր բռնություն գործադրելով, ինչպես նաև դրա գործադրման սպառնալիքով՝ հափշտակել է հրազեն ու ռազմամթերք։ Բացի այդ, հիշյալ հանցանքների կատարումը հեշտացնելու նպատակով, զուգորդված պատանդ վերցնելով, հրազենային վիրավորումով, դիտավորությամբ կյանքից ապօրինաբար զրկել է ծառայողական գործողություն իրականացնող ՀՀ ոստիկանության աշխատակցին, կազմակերպված խմբի կազմում <<Ակբա Կրեդիտ Ագրիկոլ Բանկ>> ՓԲԸ բանկոմատից կատարել է առանձնապես խոշոր չափերով՝ 14.808.000 ՀՀ դրամի գաղտնի հափշտակություն, իսկ հանցավոր գործողությունն ավարտել է 2016թ. օգոստոսի 31-ին ժամը 20-ի սահմաններում, երբ կամովին ազատել է զավթած շենքերը և շինություններն ու տրանսպորտի միջոցները, հրաժարվել իր պահանջներից և հանձնվել իրավապահ մարմիններին։
Հարակից հրապարակումներ`
- Դատարանը մերժեց «Սասնա ծռերի» պաշտպանների միջնորդությունը
- ՊՊԾ գնդի դարպասին հարվածած բեռնատարի տիրոջը չեն ասել, թե ինչու են տանում մեքենան
- «Սասնա ծռեր»-ից Լամբարյանը չպատասխանեց, թե ով է կրակել ոստիկան Գագիկ Մկրտչյանի վրա
- Արթուր Ղազինյան. Հիմա արդեն պարզ է, թե ինչպես Փաշինյանը հանգիստ և ապահով մուտք գործեց ՊՊԾ գնդի տարածք
- «Սասնա ծռերի» գործով դատարանում հետազոտվեցին իրեղեն ապացույցները
- Յուրի Տեփանոսյանը չի ուզել վարի մեքենան. ՊՊԾ գնդի գրավման գործով վկա
- Ռոբերտ Մելքոնյան. Այսօր էլ «Սասնա Ծռեր»-ն իրենց պահում են լկտի և ցինիկ
- ՊՊԾ գնդի գործով դատական նիստը ընդամենը մի քանի րոպե տևեց
- Երբ այս մարդկանց բաց թողեցիք բանտից, մեր ընտանիքը գլխիվայր շուռ եկավ. ՊՊԾ գնդի տարածքում սպանված ոստիկանի այրի
- ՊՊԾ գնդի գրավման գործով տուժող. Երեխաները ուժեղ սթրեսի մեջ էին
- «Թուրքի նման գիշերվա կեսին հարձակվելը ...». ՊՊԾ գնդի նախկին հրամանատարի հարցաքննությունից
- Դատարանում վիճեցին «Սասնա ծռերի» անդամներն ու ՊՊԾ գնդի նախկին հրամանատարը
- ՊՊԾ գնդի գրավման գործով դատական նիստին զուգահեռ՝ բողոքի ակցիա
- ՊՊԾ գնդի գրավման գործով դատավարությունը կրկին դռնբաց է
- Վալերի Օսիպյանը դատարանում պատմեց, թե ինչ է կատարվել ՊՊԾ գնդում