Ձեր վստահելի աղբյուրը

Հայաստանում այսօր սակավագիտության և բացամտության պայքար է տեղի ունենում: Այս մասին այսօր կառավարության նիստում ասաց վարչապետ Նիկոլ Փաշինյանը։

Նա նշեց, որ փորձում են մարդկանց  վախեցնել անընդհատ ինչ-որ անհեթեթ վախեր ներշնչելով, օգտվելով մարդկանց տեղեկացվության պակասից, ինչ-որ կեղծ կարգախոսներ դնելով շրջանառության մեջ. «Եթե որևէ մեկին թվում է՝ դրանով մեզ պետք է վախեցնեն, իրենք սխալվում են, որովհետև  նրանք հանրությանը որևէ բան ներշնչելու շանս չունեն, քանի որ հանրության կողմից  մերժված են ու մղված են լուսանցք և այնտեղից  երբեք  դուրս չեն գալու»:

Նիկոլ Փաշինյանն ասաց՝ կարևոր է, որ այս պրոցեսի ընթացքում պաշտոնյաները հանրության  հետ մշտապես լինեն երկխոսության մեջ։

«Այո, մենք պետք է նաև ընդունենք, որ մեր մեղքով հանրությունն ամենայն մանրամասնությամբ չընկալի, թե մենք ինչ ենք անում և ինչի համար ենք անում: Մենք պետք է ապահովենք, որ մեր գործունեության վերաբերյալ թյուրըմբռնում, թերտեղեկացվածություն չլինի: Այսինքն՝ մարդիկ պետք է տեսնեն մեր մոտիվացիան,  թե մենք ինչ ենք անում, ինչի համար ենք անում, ինչու է դա անհրաժեշտ»,- ընդգծեց նա։

Վարչապետը նաև նշեց՝ հասարակության մեջ շարունակում է մնալ մի պատկերացում, որ պետք է իշխանությունից կամ իշխանությանը կցված մարդիկ լինեն, որոնք անցնեն և փողեր, բրինձ, ձեթ բաժանեն։

«Ձեթը բաժանվում էր ոչ  թե մարդկանց աղքատությունը հաղթահարելու համար, այլ աղքատության մեջ պահելու համար, որպեսզի հաջորդ ընտրություններում այդ մարդկանց նույն ձեթով ու բրնձով տանեն ընտրական տեղամասեր և քվեարկել տան։ Այս  պատմությունն ավարտված է Հայաստանում։  Հիմա երբ ասում են՝ բա, մարդն ինչ անի, ասում ենք, թե ինչ անի՝ փողը տալիս ենք, կովը տալիս ենք, խորհրդատվությունը տալիս ենք, աշխատելու համար պայմանները ստեղծում ենք»,- ասաց Նիկոլ Փաշինյանը։

Նա  նաև կարևորեց պատշաճ կրթությունը՝  ընդգծելով, որ 21-րդ դարում ով պատշաճ կրթություն չունի, ապա որ երկրում էլ լինի, չի կարող լավ ապրել։