Ձեր վստահելի աղբյուրը

Շրջանառության մեջ է դրվել Երևանում մեքենաներով կամ դրանց կցորդներով (շրջիկ առևտրի կետ) առևտուր իրականացնելու կամ ծառայություններ մատուցելու հարաբերությունները կարգավորող նախագիծը։

ԱԺ «Իմ քայլը» խմբակցության պատգամավոր Սիսակ Գաբրիելյանն այսօր լրագրողների հետ հանդիպման ժամանակ ներկայացնելով նախագիծը՝ նշեց, որ ներկայումս քաղաքի տարբեր հատվածներում , այդ թվում՝ պատմամշակութային հուշարձանների մոտ, փողոցի բանուկ հատվածներում  տեղակայված են մեքենաներ, որոնք իրականացնում են առևտուր կամ մատուցում են որոշակի ծառայություններ։

«Տեղեկացված եմ, որ կա շրջիկ վարսավիրանոց, ատամնաբուժարան, մերսման սրահ և այլն։ Այստեղ օրենքի բաց կա, քանի որ Երևանի քաղաքապետարանը  չունի լիազորություններ՝ կարգավորելու այս իրավահարաբերությունները։  Օրենքի նախագիծը նպատակ ունի կարգավորել ոլորտը, առևտուր կազմակերպող, ծառայություններ մատուցող շրջիկ կետերի իրավահարաբերությունները»,- ասաց պատգամավորը։

Սիսակ Գաբրիելյանի խոսքով՝ օրենքի ընդունումից հետո Երևան համայնքի վարչական տարածքում շրջիկ առևտրի կետերի միջոցով վաճառքի կազմակերպումը կամ ծառայության մատուցումը կիրականացնեն՝ միայն իրավաբանական անձինք և անհատ ձեռնարկատերերը՝ Երևանի քաղաքապետի կողմից տրամադրված թույլտվության հիման վրա:

Նախագծով  նախատեսվում է, որ շրջիկ առևտրի կետերին ներկայացվող պահանջները, պայմանները և վաճառվող ապրանքների կամ մատուցվող ծառայությունների տեսակները, շրջիկ առևտրի իրականացման թույլատրելի վայրերը, դրանց տրամադրման  կարգը, պայմանները և գործունեության իրականացման  ժամերը կսահմանի Երևան համայնքի ավագանու որոշմամբ։ 
Սիսակ Գաբրիելյանը նշեց, որ սահմանվելու է նաև տեղական տուրք։ «Հանդիպել եմ մի քանի տնտեսվարողների հետ, որոնք ողջունում են այս գաղափարը և փաստում են, որ  առևտրից իրենք եկամուտ են ստանում, ուստի կողմնակից են դրա դիմաց տեղական տուրք վճարել»,- ասաց պատգամավորը։

Նա նաև նշեց, որ քաղաքային իշխանությունները նպատակ չունեն Երևանում արգելելու շրջիկ առևտուրը, խոսքը բացառապես իրավահարաբերությունների կարգավորման մասին է։
Պատգամավորը նաև ասաց, որ ըստ նախագծի՝ շրջիկ առևտուր իրականացնողները պետք է ապահովեն պայմաններ՝ վաճառվող ապրանքների կամ մատուցվող ծառայությունների սանիտարական կանոններին և նորմերին համապատասխան անվտանգությունը և որակը պահպանելու համար:

Երևանի քաղաքապետի խորհրդական Կարեն Համբարձումյանը նշեց, որ քաղաքապետարանը հակված է այդ տնտեսվարողների հետ համագործակցության:

Նրա խոսքով՝ սահմանվելու են համապատասխան գծանշված վայրեր, որտեղ թույլատրվելու է կայանել միայն թույլտվություն ունեցող շրջիկ առևտրի կետերին:

Անդրադառնալով տուրքին՝ Կարեն Համբարձումյանն ասաց, որ տեղական տուրք կլինի ամիսը  50 հազար դրամի չափով։ Նա նաև ասաց, որ տարածքների տրամադրումը նախատեսում են իրականացնել էլեկտրոնային տարբերակով, որպեսզի շրջիկ առևտուր իրականացնող տնտեսվարողն այդ հարթակում  ինքնուրույն ընտրի քաղաքում առկա թույլատրված վայրերը։