Ձեր վստահելի աղբյուրը

Էներգախնայողության և վերականգնվող էներգետիկայի ոլորտները Հայաստանում զարգանում են  բավականին բարձր տեմպերով։ Ինչպես այսօր լրագրողների հետ հանդիպման ժամանակ ասաց Վերականգնվող էներգետիկայի և էներգախնայողության հիմնադրամի տնօրեն Կարեն Ասատրյանը, եթե համեմատում են նախկին ԽՍՀՄ երկրների հետ, ապա վերականգնվող էներգետիկայի ոլորտում Հայաստանը առաջատար դիրքերում է։

Նրա խոսքով՝ 2004 թ-ին ընդունվել է «Էներգախնայողության և վերականգնվող էներգետիկայի մասին» օրենքը, որն էլ թույլ է տվել մեր երկրում զարգացնել վերականգնվող էներգետիկան։ 2016 թ-ին օրենքում կատարվել են փոփոխություններ, համաձայն որի, սահմանվել են մի շարք պարտադիր պահանջներ էներգախնայողության ոլորտում, մասնավորապես՝ բարձր, միջին և ցածր, նոր կառուցվող բնակելի բազմաբնակարան շենքերում, ինչպես նաև պետական միջոցների հաշվին կառուցվող (վերակառուցվող, նորոգվող) օբյեկտներում պետք է ներդնել  էներգախնայողության և էներգաարդյունավետության պարտադիր տեխնիկական պահանջներ։

«Դա նշանակում է, որ բոլոր նոր կառուցվող շենքերը պետք է լինեն ջերմամեկուսացված, այսինքն՝ պետք է օգտագործեն ջերմամեկուսիչ նյութեր, էներգախնայող սարքավորումներ, ինչպես նաև սահմանվել է, որ պետության ֆինանսավորմամբ կառուցվող բոլոր շինությունները նույնպես պետք է իրենց մեջ ներառեն էներգախնայողության տարրեր, որպեսզի կանխվեն էներգիայի կորուստները»,- ասաց Կարեն Ասատրյանը։

Նա նշեց, որ Հայաստանում էներգիայի խնայողության պոտենցիալը գնահատվում է շուրջ 40 տոկոս, ինչը բավականին մեծ թիվ է. «Մենք դա ժառանգել ենք Խորհրդային միությունից, քանի որ այդ տարիներին շինարարությունում ու արդյունաբերությունում կարևորություն չի տրվել  էներգախնայողությանն ու վերականգնվող էներգետիկային։ Ուստի, էներգետիկայի խնայողության համար պետք է լուրջ աշխատանքներ իրականացնենք»։

Կարեն Ասատրյանն նաև ասաց, որ մեր երկրում էներգիայի սպառման մեծ մասը՝ 37 տոկոսը,  բաժին է ընկնում բնակարանային ֆոնդին։

Նրա խոսքով՝ ՄԱԿ-ի Զարգացման ծրագրի հայաստանյան գրասենյակի համագործակցությամբ նախատեսվում է մինչև 2023 թվականը Երևանի 290 բազմաբնակարան շենքում իրականացնել էներգախնայողության ծրագիր, մասնավորապես՝ շենքերի արտաքին պատերի ջերմամեկուսացում. «Ակնկալվում է՝ էներգաարդյունավետության բարձրացման աշխատանքներից հետո շենքերում ապահովվել  շուրջ 50% էներգախնայողությունը»։

Անդրադառնալով վերականգնվող էներգետիկային՝ Կարեն Ասատրյանն ասաց, որ Հայաստանում էլեկտրաէներգիայի ընդհանուր արտադրության 30 տոկոսը վերականգվող էներգետիկայից է ստացվում, որում մեծ բաժինը փոքր ՀԷԿ-ներն են ապահովում։ Ըստ նրա՝ նախատեսվում է վերականգնվող էներգետիկայի բաժինը  հասցնել 40%-ի։

Նշենք, որ այսօր ամբողջ աշխարհում նշվում է Էներգախնայողության միջազգային օրը։ Տոնը հիմնելու մասին որոշումն ընդունվել է 2008 թվականին, Ղազախստանում SPARE-ի համակարգողների միջազգային խորհրդակցության ժամանակ: 

Տոնի հիմնական նպատակն է՝ երկրների կառավարությունների եւ հասարակության ուշադրությունը գրավել էներգետիկ պաշարների եւ էներգիայի վերականգնվող աղբյուրների զարգացման խնդիրներին: Էներգիայի տնտեսումը թույլ կտա նվազեցնել շրջակա միջավայրի աղտոտումը: