«Էդ Ձեր մասնավոր դիտարկումն ա՞, որ մեզ սկուտեղի վրա իշխանություն ա մատուցվել». բորբոքված կրքեր ԱԺ-ում
«Իմ խորհրդարանական գործունեության պատմության ընթացքում սա չորրորդ կառավարությունն է, որի օրոք բարձրացնում եմ թոշակառուների՝ մշտնջենական և պրոբլեմատիկ հարցը»,- այս մասին այսօր խորհրդարանում «Պետական կենսաթոշակների մասին» ՀՀ օրենքում լրացումներ կատարելու մասին նախագծի քննարկման ժամանակ ասաց ԲՀԿ-ական պատգամավոր Տիգրան Ուրիխանյանը։
Նախագծի հեղինակի խոսքով՝ հայտնի է, որ Հայաստանում սոցիալ-տնտեսական վիճակը, մեղմ ասած, դեռևս փոփոխված չէ, և ամենածանր վիճակում գտնվողների շարքին պատկանում են այն մարդիկ, որոնց կենսաթոշակը չի բավարարում գոնե մեկ շաբաթ հոգալ նվազագույն կարիքները:
Նշենք, որ այս նախագծին ևս Կառավարությունը բացասական եզրակացություն էր տվել՝ պատճառաբանելով, որ հաշվարկելը դժվար է լինելու։
«Եթե, ինչպես հայտարարվում է՝ երկրում կա փող, բայց այն ծախսելու տեղը գրեթե հայտնի չէ, երբ հայտարարում են, որ բյուջե ապահովում են հավելյալ մուտքեր, հայտարարում են՝ կա տնտեսական աճ և, եթե երկրի գործերը գնալով լավանում են, ապա որտեղ ուղղել այդ լրացուցիչ միջոցները, եթե ոչ թոշակառուներին։ Այն էլ այն թոշակառուների, որոնք աշխատել են, վճարել են եկամտահարկ»,- նշեց Տիգրան Ուրիխանյանը։
Պատգամավորի խոսքով՝ սա պարզ տրամաբանություն էր, որը պետք է ընդունվեր այս իշխանության, այս կառավարության կողմից, բայց «եկեք ու տեսեք, որ կառավարության կողմից տրվեց բացասական եզրակացություն»։
«Եթե ՀՀ քաղաքացին իր միաբան ոգով 1,5 տարի առաջ փողոց դուրս գալով իր կյանքում որակ փոխելու նպատակով չստանա այն, ինչի համար մատուցեց Ձեզ սկուտեղի վրա իշխանություն, ապա դրանով կոտրելու եք 800 հազար աղքատների այն միաբան հոգու ճրագը, որը վառվեց 1,5 տարի առաջ»,- նշեց Տիգրան Ուրիխանյանն՝ առաջարկելով նախագիծը նորից մտցնել օրակարգ։
ԱԺ նախագահ Արարատ Միրզոյանին, կարծես թե, դուր չեկավ պատգամավորի հայտարարությունը. «Պարոն Ուրիխանյան, էդ Ձեր մասնավոր դիտարկումն ա՞, որ մեզ սկուտեղի վրա իշխանություն ա մատուցվել»։
Տիգրան Ուրիխանյանն արձագանքեց. «Իմ պաթոսի մասին այստեղ Ձեզ հայտնի տարբեր մարդկանց տարբեր մարմնի մասեր հատելու սպառնալիքներով հանդես եկող «հանրաճանաչ գործիչներ» նույնիսկ չեն կարողացել մեկնաբանել: Խնդրում եմ կոռեկտություն պահպանեք: Ինչ վերաբերում է կենսաթոշակներին, այո, պետք է ջանալ հաշվել: Պարոն Միրզոյան, այո, ժողովուրդը ձեզ մատուցեց իշխանությունը»:
Արարատ Միրզոյանն էլ հակադարձեց. «Պարոն Ուրիխանյան, մենք շատ լավ հիշում ենք մեր իշխանության աղբյուրը, իսկ դա ՀՀ քաղաքացին է ու նրա տված քվեն: Դուք չէ, որ մեզ պետք է այդ մասին անընդհատ հիշեցնեք: Խոսքը «սկուտեղի վրա մատուցել» ձևակերպումն էր, որն, ինձ թվաց ոչ այնքան ճշմարտությունն արտացոլող: Իսկ այդ ամբիոնից ելույթի իրավունքը ձերն է, ինչ ուզեք, կարաք խոսաք, այ քեզ բան»:
«Իմ քայլը» խմբակցության պատգամավոր Գայանե Աբրահամյանը նշեց, որ ԲՀԿ-ական պատգամավորը նախորդ գումարման Ազգային ժողովում գուցե իրավունք է ունեցել այդ կերպ խոսելու. «Վստահեցնում եմ, որ այս Ազգային ժողովում որևէ կերպ այդ իրավունքը չունեք, այս բառամթերքով, այս տոնայնությամբ, այս մուննաթով խոսել։ Գոնե այս Ազգային ժողովը 70 տոկոս վստահության քվե է ստացել՝ կասկածի տակ չդրված ընտրություններում:Կարծում եմ, որ ժամանակն է վերջ տալ այդ պոպուլիստական հայտարարություններին»:
«Իմ քայլը» խմբակցության պատգամավոր Հովհաննես Հովհաննիսյանն էլ նշեց. «Ես միանում եմ կոչին, որ պետք է պաթոսին վերջ տալ: Այս դահլիճին հարիր չեն պաթոսախառը հայտարարությունները: Ես ուզում եմ հիշեցնել, թե ով է բարձրացրել թոշակառուների աշխատավարձը, թե ով է բարձրացրել ուսուցիչների աշխատավարձը, որ տարիներ շարունակ բարձրացված չէր, ուզում եմ հիշեցնել, թե ով է բարձրացրել ԱԻՆ աշխատակիցների աշխատավարձերը և այսպես շարունակ: Որևէ մեկը չլինի այս իշխանությունից և կառավարությունից ավելին, որ մտածում է ժողովրդի հոգսերի մասին»:
Նշենք, որ «Պետական կենսաթոշակների մասին ՀՀ օրենքում» լրացումներ կատարելու մասին Տիգրան Ուրիխանյանի նախագիծը լիագումար նիստերի օրակարգ չընդգրկվեց։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
