Թունյանը Ջրային կոմիտեի նախագահին կոչ է անում հարգանքով վերաբերվել ԱԺ-ին
Ազգային ժողովում այսօր քննարկվեց «Ջրօգտագործողների ընկերությունների և ջրօգտագործողների ընկերությունների միությունների մասին» օրենքում լրացումներ կատարելու մասին» ՀՀ օրենքի նախագիծը, որով առաջարկվում է բարձրագույն մասնագիտական կրթության պահանջն ամրագրել օրենքով։ Oրենքի նախագիծը հեղինակել է «Բարգավաճ Հայաստան» խմբակցության պատգամավոր Միքայել Մելքումյանը:
Նախագծով մեկ այլ խստացում է առաջարկվում աշխատանքային փորձի վերաբերյալ։ Մասնավորապես, ՋՕԸ տնօրենը պետք է ունենա առնվազն մեկ տարվա մասնագիտական աշխատանքային փորձ կամ 3 տարվա աշխատանքային փորձ` այլ ոլորտների ղեկավար պաշտոններում։
Բաբկեն Թունյանն իր ելույթում անդրադառնալով բարձրագույն մասնագիտական կրթության պահանջին՝ հիշեցրեց, որ Ջրային կոմիտեի նախագահ Վարդան Մելքոնյանից երեկ ԱԺ-ում հետաքրքրվել է, թե ներկա պահին ՋՕԸ–ներից քանիսն ունեն բուհական կրթությամբ ղեկավարներ, սակայն իր հարցը մնաց անպատասխան։
Պատգամավորի համար անընդունել է, որ համապատասխան կառույցի ղեկավարները «մատների արանքով» են նայում հարցերին։
«Սա շատ լավ օրենք է, ես կողմ եմ քվեարկելու։ Բայց սյստեղ խնդիրը ոչ թե բուն նախագիծն է, այլ վերաբերմունքը ԱԺ-ի նկատմամբ։ Եթե երկու հիմնական փոփոխություն է առաջարկվում ու դրա վերաբերյալ, պարոն Մելքոնյան, դիրքորոշում եք հայտնում, բայց հարցին չեք պատասխանում, մեղմ ասած, դա մեզ համար անհասկանալի է։ Խնդրում եմ, ո՛չ, ավելի ճիշտ պահանջում եմ՝ հաջորդ անգամ հարգանքով վերաբերվել ԱԺ-ին։ Եթե դուք բուն հարցի պատասխանը չգիտեք, դա նշանակում է մատների արանքով եք դրան նայում։ Հույս ունեմ, որ կգաք ու մանրամասն կպատասխանեք երեկվա հարցին»,- դիմելով Ջրային կոմիտեի նախագահին՝ ասաց Բաբկեն Թունյանը։
Կոմիտեի նախագահ Վարդան Մելքոնյանն իր ելույթում անկեղծացավ՝ երեկ նման վիճակագրական տվյալներ չի ունեցել և ներողություն խնդրեց դրա համար։ Իսկ այսօր արդեն տվյալներ ներկայացրեց։
Ըստ նրա՝ գործող 15 ընկերությունների բոլոր ղեկավարներն էլ ունեն բարձրագույն կրթություն, որից 4-ը՝ մասնագիտական, իսկ 10-ն ունենք տարբեր մասնագիտություններ՝ տնտեսագետի, պատմաբանի։ Վարդան Մելքոնյանը նշեց նաև, որ ՋՕԸ-ներից մեկի ղեկավարն էլ այս պահին ստանում է մասնագիտական կրթություն։
Նրա խոսքով՝ պետք է այս հարցում ավելի ուշադիր լինեն և ունենան ոլորտին համապատասխան մասնագետներ։