Ձեր վստահելի աղբյուրը

ԱԺ «Իմ քայլը» խմբակցության պատգամավոր, ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանին դուր չէր եկել «ԱԺ կանոնակարգ» օրենքում փոփոխություններ կատարելու քվեարկության ժամանակ ընդդիմադիր խմբակցությունների դիրքորոշումը։

«Ժողովուրդ, մենք գործ ունենք սահմանադրական օրենսդրության հետ ու խոսում ենք խորհրդարանական երկիր կառուցելու մասին, մենք խոսում ենք խորհրդարանի դերի մասին, մենք խոսում ենք խորհրդարանական վերահսկողության ինստրումենտների մասին, գործիքակազմն ամրացնելու մասին, և ի՞նչ է տեղի ունենում, ասում եք՝ առաջարկ ենք արել,  չի ընդունվել, դրա համար դեմ ենք քվեարկում: Իսկ կարելի՞ է ընդհանրապես հաշվի առնել մի կարևոր հանգամանք, մենք ինչո՞վ ենք առաջնորդվել օրինագիծը կազմելիս, խմբակցության ղեկավարները տեսականորեն կարող էին լինել Անվտանգության խորհրդի կազմում: Երեկ էլ քաղաքական ուժերը սատարեցին նախագծին, բացասական ելույթ չենք լսել, ի՞նչ է տեղի ունենում այսօր՝ դեմ քվեարկություն ԼՀԿ կողմից՝ առանց որևէ հիմնավորման, և ձեռնպահ քվեարկություն ԲՀԿ կողմից՝ առանց որևէ հիմնավորման: Երեկ դուք սատարել եք, պարոն Բագրատյան, հիմնավորում չի եղել»:

Վարդանյանի ելույթին ի պատասխան ելույթ ունեցավ ԲՀԿ պատգամավոր Միքայել Մելքումյանը։

«Քանի որ պարոն Վարդանյանը ցուցումներ էր ուզում տալ, որ քաղաքական խմբակցությունները պետք է հիմնավորումներ ներկայացնեն, ի՞նչ իրավունքով, դրա իրավունքն ունե՞ք, չունեք: Մեր ասածը որն է, ոնց որ դուք եք մերժում, չեմ ասում՝ մերժումների համար ենք մերժում, մեր ասածն այն է, որ մենք պետք է վերաիմաստավորենք մերժումների, քննարկումների որակը, ո՞վ է ասել, որ կառավարության բոլոր նախագծերը որակյալ են կամ այլ օրենքներ, մենք որ կողմ ենք քվեարկում, մեր կուսակցական շահը ստորադասում ենք պետական շահին, կարող է այդ օրենքի մեջ մի դրույթ դրական է, մյուսները՝ բացասական, բայց կողմ ենք քվեարկում, որ չասեն՝ միտումնավոր դեմ քվեարկեցին: Հիմա եթե գնում ենք այն մշակույթին, որ բոլոր օրենքների անունները պիտի դնենք հատվածային, կիսահրամայական ժպիտներով։ Աշխատում եք, աշխատեք, ո՞ւմ է ձեռ տալիս առճակատումը: Ես երեկ առաջին դեպքն էր, որ հայտարարություններին բացակայում էի, ուր որ գնում էի, ժողովուրդը զարմանում էր՝ ի՞նչ է կատարվում, երբ որ Գևորգ Պետրոսյանը խոսում է, մեր խմբակցությունը կողմ է դրան, դուք չպետք է ցուցումներ տաք՝ եթե գնաք այդ ճանապարհով, դրանով դնում եք ժողովրդավարական գործընթացի ճգնաժամի սկիզբը: Գիտեք, որ հեղափոխությունների ժամանակ մակընթացություններն ու տեղատվությունները շատ են լինում, խոշորները մնում են։ Մենք մնալու ենք հաստատ»: