Ձեր վստահելի աղբյուրը

«Մարդիկ տները տաքացնելու կարիք ունեն, այս առումով անհրաժեշտ է արդյունավետ կազմակերպել թափուկի բաշխումը: Այս պահին դրությամբ արդեն մոտ 80 հազար խմ թափուկ բաշխվել է»,-լրագրողների հետ հանդիպմանն ասաց Շրջակա միջավայրի նախարարի տեղակալ Վարդան Մելիքյանը: Նա նշեց, որ օրինական ծառահատուների արդյունքում վաճառվում է  փայտ, այս տարի մոտ 25 հազար խմ է նախատեսում: 80 տոկոսն արդեն մթերված է:

«Իրականում ավելի շատ տեղափոխվում է  Հայաստանի կենտրոնական մարզեր, քանի որ գյուղաբնակների համար բավական թանկ է: Բյուջեով սահմանված գինը 21 հազար դրամ է խորանարդ մետրի համար: Սա այն գինն է, որ մարդիկ վճարում են անտառից դուրս բերված փայտի համար»,- նշեց փոխնախարարը:

Նա տեղեկացրեց, որ երկու շաբաթից այցելելու են Մոլդովա. «Երկարաժամկետ ծրագիր ունենք՝ վառելափայտը փոխարինել կենսավառելիքով: Խոսքը բրիկետների արտադրության մասին է, որի հումքը պետք է դառնա գյուղատնտեսական մնացորդը, մասնավորապես, ծղոտը: Մոլդովան ԵՄ-ի և ՄԱԿ-ի Զարգացման ծրագրի հետ բավական հաջող ծրագիր է իրականացրել այս ուղղությամբ: Հինգ տարվա ընթացքում էներգետիկ բալանսում կենսավառելիքի բաժինը գրեթե զրոյից հասել է 10 տոկոսի: Զրոյից շուկա է զարգացվել, ինչը նախատեսվում է անել նաև Հայաստանում»:

Վ. Մելիքյանը նշեց, որ այս ծրագրի իրականացման դեպքում ոչ միայն կբավարարվի  մարդկանց էներգետիկ կարիքները, այլև աշխատատեղեր են ստեղծվում, արդյունաբերության ճյուղն է զարգանում: Նա ասաց, որ Հայաստանում ունեն ներուժ բրիկետներ պատրաստելու համար անհրաժեշտ սարքավորումները, մեքենաներն արտադրելու համար:  Խոսքը  Չարենցավանում, Հրազդանում երբեմնի հզոր արդյունաբերական հաստատությունների մասին է:

Փոխնախարարի խոսքով, այս ծրագիրը նաև պայքար է հրդեհների դեմ:
«Հաճախ անտառային հրդեհները սկսվում են հատկապես հացահատիկային բույսերի դաշտերից: Այսինքն եթե կարողանան ծղոտը վաճառել կամ փոխարինել բրիկետներով, շահագրգռված կլինեն դա անել, ոչ թե այրել դաշտերը»,- ասաց Վ.Մելիքյանը:

Խոսելով կանաչ տարածքներ ավելացման առաջիկա ծրագրերի մասին, փոխնախարարն ասաց, որ մոտակա ծրագիրը 2020 թվականին 10 մլն ծառեր կամ տնիկներ տնկելն է, արդեն առանձնացված որոշակի տարածքներ կան: Նրա խոսքով, 10 մլն ծառը տնկելու համար անհրաժեշտ կլինի մոտ 3300 հա տարածք, սակայն կլինեն տնկումներ նաև բնակավայրերում:

Նա նշեց, որ Հայաստանը պարտավորություն է ստանձնել մինչև 2050 թվականը անտառածածկը կրկնապատկել, ինչը ենթադրում է 265 հազար հա լրացուցիչ անտառի տնկում, խոսքը գնում է 800-900 մլն տնկիների մասին: Դա նշանակում է՝ տարեկան պետք է սկսել տնկել 30 մլն ծառ:

«10 միլիոնը կդառնա նախավարժանքը մեր ավելի մեծ և ապագայում սովորական աշխատանքների համար»,- ասաց Վ. Մելիքյանը: