«Տեսչական մարմնի ղեկավարը մասնագետներին աշխատանքից հեռացնում է՝ պատաճառաբանելով, որ ազատվում է հներից»
«ՀՀ բնապահպանության և ընդերքի տեսչական մարմինը փլուզման եզրին է։ Պատճառը մարմնի ղեկավարի կողմից ոլորտի ոչ պատշաճ կառավարումն է»,- այս մասին այսօր լրագրողների հետ զրույցում ասաց Արարատի տարածքային բաժնի ավագ տեսուչ Արթուր Բադալյանը՝ անդրադառնալով Բնապահպանության և ընդերքի տեսչական մարմնի խնդիրներին։
Արթուր Բադալյանի խոսքով, տեսչական մարմնի ղեկավար Վիգեն Ավետիսյանը բոլոր պրոֆեսիոնալ մասնագետներին ասում է, որ դիմում գրեն և ազատվեն աշխատանքից՝ պատճառաբանելով, որ այդ ձևով ազատվում է հներից. «Օրինակներ կան, բայց որևէ մեկը չգիտի՝ ինչ հիմունքով է աշխատանքից ազատում։ Էդ իրենից կարող եք հարցնել»։
Բացի այդ, Բադալյանը նշում է, որ մարմնի ղեկավարն իր նշանակած Արարատի տարածքային բաժնի պետ՝ Արմեն Բավոյանը չի վերահսկում, վերջինս էլ անօրինականություններ է անում. «Օգոստոսի 12-ից Բավոյանը բաժնի պետ է, այդ օրվանից մինչ օրս 2 տեսուչների հատկացրել է ընդամենը 10 լիտր բենզին։ Էդ էն դեպքում, երբ այդ տեսուչները վերահսկողություն են իրականացնում մի ամբողջ մարզում։ Էլ չեմ ասում, աշխատանքային մեքենան որպես «պադավատ» օգտագործելը։ Ժամը 16.30 գալիս ա աշխատանքի, էն էլ մի պահ»։
Արթուր Բադալյանը նշեց, որ ձեռքի տակ ունի «շինծու» փաստաթուղթ, որով Բավոյանը իրենց ուղարկել է ասֆալտի գործարան՝ ստուգման. «Դրա իրավունքը Բավոյանը չուներ, նա պետք է ստուգում բացեր, նոր մեզ ուղարկեր։ Կազմել ենք այնտեղ խախտման արձանագրություն 300 հազար դրամի և վնասի հաշվարկ պետք է արվեր՝ մթնոլորտ արտանետվող նյութերի վերաբերյալ։ Սակայն Բավոյանը փաստաթղթերը հետ պահանջեց, փոխարենը ասֆալտի գործարանի տնօրենի հետ համաձայնեցվեց, որ պետք է իրեն տուգանեն 150 հազար դրամով։ Բայց ասֆալտի գործարանի տնօրենը ստորագրել ու ընդունել էր իր մեղքը, սակայն վարչական վարույթը կասեցվեց»։
Այդ դեպքից հետո Արթուր Բադալյանը զեկուցագիր է ներկայացրել տեսչական մարմնի ղեկավարին. «Արմեն Բովոյանի անօրինականություններին մասնակից չդառնալու համար ես հայտնել եմ, որ հրաժարվում եմ որևէ քննություն իրականացնել։ Սրանից հետո մի զեկուցագիր էլ Բավոյանն է գրում, թե ես հրաժարվում եմ աշխատանքի գնալ, ինձ բացակա ա դնում»։
Արդյունքում, 2019 թվականի հոկտեմբերի 24-ին ՀՀ ԲԸՏՄ Արարատի տարածքային բաժնի պետ՝ Արմեն Բավոյանի և նույն բաժնի ավագ պետական տեսուչ՝ Արթուր Բադալյանի ներկայացրած զեկուցագրերի հիման վրա, նրանց նկատմամբ, համապատասխանաբար կայացվել է ծառայողական քննություն նշանակելու մասին որոշումներ:
Ըստ նրա, խնդրի լուծման համար երեք փուլ են նախատեսում. «Առաջինը հենց սա է, մյուսները դեռ չեմ կարող ներկայացնել»։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ