Dimum.am՝ քաղաքացիների խնդիրների հանրայնացման հարթակ, իրավունքների պաշտպանության այլընտրանքային ուղի
Տարբեր հարցերով, խնդիրներով, դժգոհություններով պետական մարմիններին դիմում գրած քաղաքացիները հաճախ ստանում են անբովանդակ պատասխաններ։ Չնայած պետական մարմինը դիմումատուին պատասխանում է «Տեղեկատվության ազատության մասին» ՀՀ օրենքով նախատեսված ժամկետում, սակայն պատասխանը սպառողի, քաղաքացու խնդրի մասին չէ։
Օրինակ, իրավական անարդարության մասին ուղղված հարցին ի պատասխան պետական մարմինը կարող է լրացուցիչ 30 օր ժամանակ խնդրել, ապա ժամկետը լրանալուց հետո քաղաքացուն հայտնել, որ նրա ներկայացրած հարցը դատախազության կամ էլ իրավապահ այլ մարմնի վարույթում է։
Քաղաքացիների դիմումները հանրայնացնելու, դրանք ավելի հասցեական դարձնելու, նաև պետական մարմինների աշխատանքի նկատմամբ հանրային վերահսկողություն իրականացնելու նպատակով գործարկվել է նոր հարթակ՝ dimum.online : Նույն հարթակն են ուղղորդելու նաև www.consumer.am, www.dimum.am , www.request.am հասցեները։
Քաղաքացիները կարող են այս հարթակում ներբեռնել իրենց դիմումներն այ կամ այն խնդրի վերաբերյալ, փորձագետները կորոշեն, թե դրանում նշված հարցը պետական որ մարմնի իրավասության ներքո է, կամ որ ՀԿ-ն կարող է առավել մասնագիտացված օգնություն ցուցաբերել տվյալ խնդիրն ունեցող քաղաքացուն։
Կայքը ստեղծվել է Եվրոպական միության ֆինանսական աջակցությամբ, «Ինֆորմացիայի ազատության կենտրոն» ՀԿ-ի կողմից իրականացվող «Տեղեկատվության մատչելիություն և հետաքննական լրագրություն առավել իրազեկված քաղաքացիների համար» ծրագրով տրամադրված ենթադրամաշնորհի շրջանակում։
«Սա այլընտրանքային ուղի է քաղաքացու, սպառողի իրավունքների, շահերի պաշտպանության համար»,-լրագրողների հետ հանդիպմանն այսօր հայտարարեց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ ընդգծելով, որ դիմում ներկայացրած քաղաքացու անձնական տվյալները պաշտպանված են լինելու։
ՀԿ նախագահը շեշտեց նաև մեկ այլ փաստ՝ հրապարակվելու են բոլոր բողոքները, դիմումները, դժգոհությունները՝ անկախ այն բանից, թե ում կամ ինչին են դրանք վերաբերում։
«Չի բացառվում, որ դիմումներից մեկը կարող է վերաբերել իմ մորաքրոջ տղայի խանութին, կամ իմ պաշտոնյա ընկերոջը, դրանք բոլորը հրապարակվելու են մուտքագրումից անմիջապես հետո, առանց որևէ մեկի ընտրության կամ միջամտության։ Այստեղ գործելու է հանրային վերահսկողություն հանրային վերահսկողության նկատմամբ սկզբունքը»,-ասաց նա՝ միաժամանակ ներկա ու բացակա լրագրողներին հիշեցնելով, որ բողոքներ ու դիմումներ կարող են լինել նրանց մտերիմների, ընկերների, հարազատների մասին։
Նախագծի մշակման ընթացքում քննարկումներ են եղել նաև պետական մարմինների ներկայացուցիչների հետ, նրանք բոլորն էլ համաձայնել են համագործակցել։
Հարթակը կազմված է մի քանի բաժիններից, որոնց թվում են «Իրավակարգավորումները», «Օգնություն սպառողին» և այլն։
Ըստ ՀԿ նախագահի, կայքի ստեղծման աշխատանքներն ավարտական փուլում են, 1-2 շաբաթից քաղաքացիներն արդեն կարող են ներբեռնել իրենց դիմումներն ու հետևել դիմումի ընթացքում։ Արդեն 1-1.5 ամսվա ընթացքում այն կստանա վերջանական տեսք։
Նշվում է, որ կայքի բովանդակության համար պատասխանատվություն է կրում «Իրազեկ և պաշտպանված սպառող» ՀԿ-ն և պարտադիր չէ, որ այն արտահայտի Եվրոպական միության և/կամ «Ինֆորմացիայի ազատության կենտրոն» ՀԿ-ի տեսակետները։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ