Ձեր վստահելի աղբյուրը

Կոռուպցայի կանխարգելման հանձնաժողովի անդամի պաշտոնում ԲՀԿ կողմից առաջադրված թեկնածու Նարեկ Համբարձումյանից ԱԺ նախագահ Արարատ Միրզոյանը հետաքրքրվեց, թե նախկին աշխատանքում կոռուպցիոն ինչ-որ կծիկ բացահայտե՞լ է։

«Իմ աշխատանքային գործունեության ընթացքում կոռուպցիոն հանցագործություններ անձամբ չեմ քննել, իմ հիմնական ուղղվածությունը եղել է կիբեռհանցագործությունների դեմ պայքարի ոլորտում»։

ԱԺ նախագահը նաև նշեց, որ թեկնածուն աշխատել է «Գլանժալկո» ՍՊԸ-ում՝ որպես ֆինանսական գծով փոխտնօրեն, և հարցրեց. «Այս ՍՊԸ-ն որևէ կապ ունի՞ որևէ հանրային պաշտոն զբաղեցնող անձի հետ, թե՞ ոչ»:

«ՍՊԸ-ն որևէ քաղաքական ուժի հետ կապ չունի, այն մեր ընտանեկան կազմակերպությունն է, հիմնադրվել է 1995 թվականին, հորս կողմից, մեր գերդաստանում բացի ինձնից որևէ պաշտոնատար անձ չկա»,- պատասխանեց թեկնածուն։

ԱԺ պատգամավոր Արման Բաբաջանյանը դիմելով թեկնածուին՝ ասաց. «Պատկերացնենք մի իրավիճակ, երբ հանձնաժողովում քննարկվում են Նիկոլ Փաշինյանին, Արարատ Միրզոյանին, Գագիկ Ծառուկյանին, Էդմոն Մարուքյանին և ԲԴԽ նախագահ Ռուբեն Վարդազարյանին վերաբերող հարցեր: Ի՞նչ երաշխիքներ կան, որ այս հարցերի քննարկմանը հանձնաժողովի անդամները զերծ կմնան քաղաքական և կորպորատիվ նեղ շահերից, և առհասարակ հանձնաժողովը կաշկանդված չի լինի անաչառ որոշումներ կայացնելիս»։

Համբարձումյանն ի պատասխան նշեց, որ ինքն ինը տարի աշխատել է մի պաշտոնում, որը պահանջել է միայն լինել օբյեկտիվ. «Իմ համար հիմնարար սկզբունքներից մեկը եղել է օրենքի առջև բոլորի հավասարության սկզբունքը, տվյալ պաշտոնում նշանակվելու դեպքում շարունակելու եմ աշխատել նույն սկզբունքներին համապատասխան։ Ինձ համար բացարձակ նշանակություն չեն կարող ունենալ կոնկրետ անձանց անուններ»։