Ձեր վստահելի աղբյուրը

Դեռևս ամռանը բնապահպանները ահազանգեցին, որ Արարատի մարզի Հովտաշեն համայնքում արագիլներն անկում են։ Թռչունները նմանվել էին սև ագռավների՝ մրակոլոլ ու մոլոր։ Վերին ծածկող փետուրները, գլուխը, վիզը, առավել նվազ՝ թափահարողները, ծածկվել էին յուղանյութով՝ ապա փոշիով:

Այս մասին շատ ենք գրել (տես հարակից նյութերը)։ Հիմա տխուր դեպքեր են սպասվում՝ ըստ մասնագետների խոսքի՝ նույնիսկ լվացած արագիլների մի մասը ձմռանը կսատկի, քանի որ լվանալով հնարավոր է փոխվել են փետուրների կառուցվածքը ու պաշտպանիչ հատկությունը՝ նրանք չեն կարողանա չվել ու կմնան Հայաստանում։ Մնացածը կախված է, թե ինչպիսի ձմեռ կլինի։

Սա դեռ միայն արագիլների պահով։ Ժամանակը անցնում է, մյուս խնդիրների մեջ մոռացվում է արագիլների ու գետի աղտոտման փաստը, անպատժելիությունը։ Panorama.am –ը այօր հարց ուղղեց դատախազությանը՝ ճշտելու, թե ինչ քայլեր են արվում՝ մեղավորներին գտնելու և պատժելու համար։

«Ջրերի աղտոտման հետ կապված հանցագործության հատկանիշներով քրեական գործ է հարցուցվել՝ Քրեական օրենսգրքի 287-րդ հոդվածի 1-ին մասով։ Եվ այդ շրջանակներում քննություն է տարվում ոչ միայն Հովտաշենի, այլ նաև հարակից տարածքներով անցնող ջրերի աղտահարման պատճառների պարզման ուղղությամբ։ Այսինքն՝ թռչունների նման վիճակում հայտնվելու հանգամանքը դիտարկվում է այս շրջանակներում»,- մեզ հետ զրույցում նշեց ՀՀ գլխավոր դատախազի խորհրդական Գոռ Աբրահամյանը։

Իսկ թե ով կամ ինչն է եղել ջրերի աղտոտման պատճառը,Աբրահամյանը չասաց, նշելով, որ այս պահին այլ հանգամանքներ ճշտված չեն և քրեական գործով նախաքննությունը շարունակվում է։

Մենք ստացանք պատասխան, որն ունի նույն բովանդակությունն, ինչ Բնապահպանության և ընդերքի տեսչական մարմնից մեր հարցմնն ուղարկված պատասխանը, ըստ որի՝ աղտոտվածության փաստի վերաբերյալ Բնապահպանության և ընդերքի տեսչական մարմնում հարուցված է վարչական վարույթ։

Թեև տեսչական մարմինը հայտնում է, որ ամեն ինչ արվում է՝ ջուրն աղտոտող օղակը բացահայտելու և այն վերացնելու համար, միևնույն է խնդիրը չի լուծվում։ Բնապահպան Սիլվա Ադամյանը նշում է, որ ջրի աղտոտվածության խնդիրը ժամանակավորապես լուծվել է բնապահպանների, գիտնականների և ակտիվիստների ջանքերով։

«Տեսչական մարմինն էլ գնաց, իբր ստուգումներ արեց, բում արեց, թե ստուգել են, այնինչ հայտնաբերողներն էլ էին հասարակական գործիչները, կամավորներն էլ։ Էն, ինչ տեսչական մարմինն ասում ա հայտնաբերելէ, իրականում ոչ մի բան էլ չի հայտնաբերել»,-հստակեցնում է նա։

Բնապահպանի խոսքով, դեռ 2016 թվականին իրենք բարձրաձայնել են խնդիրը, սակայն տեսչական մարմինը կամ չէր ուզում հայտնաբերել, կամ ուղղակի «անկարող» է եղել հայտնաբերել աղտոտման աղբյուրը. «Եթե անկեղծ լինենք, ես չեմ հավատում, որ 3 տարվա ընթացքում տեսչական մարմինը չկարողացավ բացահայտել աղտոտման աղբյուրը։ Ես փաստ չունեմ, որ խախտումներ և խարդախություն է արել տեսչական մարմինը, բայց չեմ հավատում, որ չեն բացահայտել»։

Բնապահպանը նշում է, որ ջրի աղտոտումը ոչ միայն արագիլներին է վնասում, այլև կարող է մյուս թռչուններին վնասել, որոնցից շատերը «Կարմիր գրքի» ենթակա թռչուններ են։

«Հստակ չեմ կարող ասել՝ որ թռչունները կարող են վնասվել, քանի որ խնդրի աղբյուրը հայտնի չէ։ Ջրային և բուսական աշխարհը ևս վտանգված է։ Ամբողջ էկոլոգիան փոփոխվելու է։ Բայց քանի որ դեռ հստակ ուսումնասիրություն չի եղել, չենք կարող ասել՝ ինչ կարող է լինել։ Հստակ է, որ եթե էկոլոգիայի փոփոխություն եղավ, մենք կունենանք նաև թռչունների կերի խնդիր»։
Ըստ բնապահպանի՝ հետաքրքիր է նաև, որ աղմուկից հետո ջրի աղտոտումը դադարում է, սակայն որոշ ժամանակ անց խնդիրը նորից գլուխ է բարձրացնում։ «Այստեղ կարող ենք ենթադրել, որ մարդկային գործոն կա»,- նշում է Սիլվա Ադամյանը։

Մնում է լիահույս լինել, որ ամիսներ անց մեր հարցումները նույն բովանդակությունն ունեցող պատասխան չեն ստանա, և երբեմնի «բախտի» արագիլների հետագա ճակատագիրը չի մնա բախտի կամ պատկան մարմինների քմահաճույքին։