Ձեր վստահելի աղբյուրը

2020 թվականի հունվարի 1-ից  ուժի մեջ մտնող Հարկային օրենսգրքի փոփոխված տարբերակը դրական ազդեցություն կունենա բանկային համակարգի վրա: Այս մասին «Բիզնեսի ֆինանսավորում․թվային նոր լուծումներ» խորագրով քննարկման ժամանակ ասաց Ամերիաբանկի մանրածախ բանկինգի տնօրեն Արման Բարսեղյանը:

Նրա խոսքով՝  բոլոր փոփոխությունները հիմնականում մեղմացնում են հարկային ռեժիմը, բացի այդ, փոքր և միջին բիզնեսը, միկրոբիզնեսը, ըստ էության, ազատվելու են հարկերի վճարումից:

«Եթե հարկերից ազատվում են, դա նշանակում է, որ կմեծանան բիզնեսի եկամուտները, ինչի արդյունքում էլ բիզնեսի զարգացման և վարկավորման հնարավորությունը կմեծանա։  Բացի այդ,  հարկերից միկրոբիզնեսի ազատումը կհանգեցնի նրան, որ կվերանա ստվերում մնալու կամ շրջանառությունը թաքցնելու անհրաժեշտությունը։ Այս տրամաբանությամբ՝ ստվերից դուրս կբերվեն մեծ ծավալով միջոցներ, իսկ սա բանկերի համար շատ կարևոր է, քանի որ մեր վերլուծություններն ու որոշումները կայացնում ենք  ունեցած տեղեկությունների հիման վրա»,- ասաց Արման Բարսեղյանը։

Հարցին, թե բիզնեսին տրվող վարկավորման ծավալների աճն  ինչով է պայմանավորված, Ամերիաբանկի մանրածախ բանկինգի տնօրենը նախ նշեց, որ 2019 թվականի ընթացքում առավել արագ տեմպերով աճել են ֆիզիկական անձանց տրամադրված վարկերը։ Ըստ նրա՝ մասնավորապես աճել են հիպոթեքային ու սպառողական վարկերը։

«Հիպոթեքային վարկերի առումով աճի գործոնները բազմաթիվ են։ Նախ և առաջ 2015 թվականի ՀՆԱ-ի անկումից հետո, ըստ էության, որոշակի հետաձգված  պահանջարկ կար։ Եվ մոտ երեք-չորս տարի շուկան պասիվ էր, իսկ այդ բացը պետք է շուկան լրացներ։ Երկրորդ, բնակչության սպասումների առումով լուրջ փոփոխություններ են տեղի ունեցել։ Քանի որ բնակչության մեծամասնությունը սպասում է, որ գների բարձրացում պետք է տեղի ունենա, այս հանգամանքը նույնպես նպաստում է, որ պահանջարկն աճի։ Կարևոր ու վճռական է նաև եկամտահարկի վերադարձի մեխանիզմը, որից օգտվում են բազմաթիվ քաղաքացիներ։ Բացի այդ, շինարարությունն է ակտիվացել։ Այսինքն՝ գործոնները բազմաթիվ են»,-ընդգծեց Արման Բարսեղյանը։

Նրա խոսքով՝  հիպոթեքային վարկերի պորտֆելն այս տարվա ընթացքում ավելի քան 50 տոկոսով աճել է։ Ըստ նրա՝ վարկային պորտֆելը կարելի է գնահատել որպես առողջ, քանի որ դրանք բոլորը վճարունակ, գրանցված աշխատավարձեր ունեցող, գերազանցապես առաջնային շուկայում գործարքներ կատարած ու բնակարաններ ձեռք բերած մարդիկ են. «Այսինքն՝ պորտֆելը բավական բարձր որակ ունի»։

Անդրադառնալով բիզնեսի վարկավորմանը՝ Արման Բարսեղյանն ասաց, որ այդ ուղղությամբ այս տարվա ընթացքում գրանցված ակտիվությունն ընդամենը գործընթացի սկիզբն է։

«Ռեգիստի տվյալները վկայում են, որ բազմաթիվ նոր ձեռնարկություններ են գրանցվել, և ակնկալում ենք, որ հաջորդ տարի կզգանք բիզնես վարկերի մասով իրական ակտիվություն։ Գուցե և մյուս տարի բիզնես վարկավորման առումով տեմպերը գերազանցեն ֆիզիկական անձանց վարկավորման ծավալները։ Նաև հարկային փոփոխությունները նույնպես կնպաստեն, որպեսզի մեր ակնկալիքներն իրականություն դառնան»,- ընդգծեց նա։

Հարցը, թե բանկային համակարգն արդյոք զգո՞ւմ է ստվերային տնտեսության դեմ պայքարի  արդյունքները, Ամերիաբանկի մանրածախ բանկինգի տնօրենը նշեց, որ ամեն օր դրա ականատեսն են լինում։

«Գործատուների կողմից  բանկային համակարգի միջոցով աշխատակիցներին աշխատավարձերի փոխանցումները կտրուկ աճել են։ Հատկապես վերջին ամիսներին մեծ հոսք ունենք։ Այսինքն՝ աշխատավարձերն ավելի շատ սկսել են բանկերի միջոցով վճարել, այլ ոչ թե կանխիկ։ Այս առումով մեծ առաջընթաց կա, որը տեսնում ենք ըստ մեր ցուցանիշների»,- նշեց Արման Բարսեղյանը։

Նա նաև ասաց, որ փոխվել է հայտարարագրված և չհայտարարագրված շրջանառությունների հարաբերակցությունը,  այսինքն՝ բիզնեսներն ավելի թափանցիկ են դառնում: