Վրաստանի ներկայիս իշխանության վերաբերմունքը ավելի շատ Հայաստանի օգտին է. քաղաքագետ
«Իշխող կուսակցությունը մեկուսացման մեջ է։ Վրաստանում կարող է տեղի ունենալ հեղափոխություն։ Պահը դեռ չի հասունացել, բայց ամեն դեպքում այն բացառել պետք չէ»,- այս մասին այսօր լրագրողների հետ զրույցում ասաց «Կովկաս» ինստիտուտի գիտաշխատող, քաղաքագետ Հրանտ Միքայելյանը՝ անդրադառնալով Վրաստանում տեղի ունեցող ցույցերին։
Ըստ քաղաքագետի, Վրաստանում հասունացած ցույցերում գլխավոր ընդդիմադիր ուժը՝ «Միացյալ ազգային շարժումն». «Վրաստանի խորհրդարանում քվեարկություն է եղել և պետք է ընդունվեր անցում դեպի 100 տոկոսանոց համամասնական ընտրական համակարգ, որը չի ստացվել, որովհետև իշխող կուսակցության մի քանի ներկայացուցիչ դեմ է քվեարկել։ Եվ դա անմիջապես պատճառ է հանդիսացել այս ցույցերի սկսվելու համար։ Դրա հետևանքով միավորվեց Վրաստանի ընդդիմությունը։ Նույնիսկ այն կուսակցությունները, որոնք շատ թե քիչ չեզոք էին, դուրս եկան իշխանության դեմ։ Այդտեղ է նաև ավելի կոշտ ընդդիմությունը՝ «Միացյալ ազգային շարժումը»՝ ի դեմս Միխեիլ Սաակաշվիլիի»։
Միքայելյանի խոսքով, ցույցերի մասնակիցները շատ չեն՝ մոտավորապես 3000 հոգի, սա քաղաքական սրացումներից մեկն է, որ վերջին 2 տարում հասունացել է Վրաստանում. «Սա կարծես 4-րդ դեպքն է, որը ներքաղաքական ճգնաժամի մասին է խոսում։ Կարող ենք հիշել, որ Հայաստանի վարչապետ Նիկոլ Փաշինյանը արդեն Վրաստանի 3-րդ վարչապետի հետ է հանդիպել»։
Վրաստանում քաղաքական անկայուն իրավիճակը, Միքայելյանի համոզմամբ, ազդեցություն է ունենալու նաև Հայաստանի վրա. «Հայաստանն անընդհատ ուզում է Վրաստանի հետ հարաբերությունները լավացնի, բայց չի ստացվում, քանի որ մյուս դաշտում հենց մեկի հետ հաստատվում են հարաբերությունները, իշխանությունը փոխվում է։ Եվ Վրաստանը հիմա զբաղված է ներքին խնդիրներով։ Այս սրացման պատճառը նաև այն է, որ Վրաստանում մի տարուց պետք է խորհրդարանական ընտրություններ լինեն»։
Անդրադառնալով Վրաստանում բնակվող հայերի դիրքորոշմանը՝ Հրանտ Միքայելյանը նշեց, որ այն միշտ եղել է պրոիշխանական. «Դա եղել է որոշ պայմաններից ելնելով։ Պատճառներից մեկն այն է, որ իշխանությունը միշտ ճնշել է էթնիկ փոքրամասնություններին՝ հատկապես հայերին։ Օրինակ՝ Ջավախքում մենք ունենք փորձ, որ ոստիկանական ռեժիմ է սահմանված, նույնիսկ՝ հայատառ գրքերի մուտքն է արգելվել։ Անգամ հայերի ցուցակ կա, որոնց մուտքը արգելված է։ Նրանք հիմնականում այն մարդիկ են, ովքեր նախկինում ունեցել են Վրաստանի քաղաքացիություն, իսկ հիմա Հայաստանի քաղաքացիներ են»։
Հրանտ Միքայելյանը նշում է, որ եթե Ջավախքում ավելի շատ ձայն է ստացել «Վրացական երազանքի» թեկնածուն, ապա ադրբեջանցիները հակված են սատարել «Միացյալ ազգային շարժմանը»։
«Դրա պատճառն այն է, որ Սաակաշվիլիի իշխանության ժամանակ Թուրքիայի և Ադրբեջանի հետ հարաբերությունները ավելի ակտիվ էին զարգանում։ Իսկ Վրաստանի ներկայիս իշխանության վերաբերմունքը ավելի շատ Հայաստանի օգտին է։ Վրաստանը ցանկանում է տարածաշրջանում, ինչպես նաև Ռուսաստանի և Իրանի հետ հարաբերությունները լավացնել, իսկ այդ հարցում Հայաստանի հետ հարաբերությունները ավելի կարևոր են դառնում։ 2 օր առաջ Վրաստանում անցկացված հարցումներով Հայաստանը քաղաքական կարևոր գործընկեր են համարել հարցվածների 10, և տնտեսական առումով՝ 8 տոկոսը»,- նշեց Հրանտ Միքայելյանը։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում