Քաղաքացին ահազանգում է. Գյումրու մաքսատանը մեքենաներ են թալանում
Քաղաքացի Տիգրան Լորսաբյանը պատվիրած մեքենան Գյումրու մաքսատանը մաքսազերծելուց հետո հայտնաբերել է, որ մեքենան թալանել են։ Նա պնդում է՝ գողությունը կատարվել է հենց մաքսատան տարածքում, քանի որ փոխադրող ընկերությունը այդ տարածք մտնելուց հետո լուսանկարներ է արել ու իրեն ուղարկել, որոնց մեջ երևում են աջ կողային հայելին, աջ անվաթևը, մարտկոցը, անվաթևերի տակի պաշտպանիչ պլասմասները։ Հիմա դրանք չկան։
Panorama.am-ի հետ զրույցում Տիգրան Լորասբյանն ասաց, ինքը մի քանի հարյուր հազար դրամի վնաս է կրել։ Նախ դիմել է տարածքի անվտանգության աշխատակիցներին, ապա նաև այդ ծառայության ղեկավարին, ասել են՝ ոչնչից տեղյակ չեն, խորհուրդ են տվել դիմել ոստիկանություն։ Քաղաքացին դիմել է ոստիկանություն, եկել են, լուսանկարել են, բայց մեծ հույսեր չի կապում ոստիկանության հետ, քանի որ մաքսատան տարածքում գողության բազմաթիվ դեպքեր են եղել։
«Տարածքում ոչ մի տեսախցիկ չկա։ Ով ուզում է, մտնում-դուրս է գալիս, Երևանում այդ տարածքում կարող էին մուտք գործել միայն բեյջերով, մինչդեռ այստեղ օրական հազար մարդ է մտնում ու դուրս գալիս, անվտանգության աշխատակիցները քիչ են։ Իմ բողոքից հետո երեկ նոր բերել են շլագբաուն են դրել, խոսք էր գնում, որ էսօր պետք է բերեն տեսախցիկներ դնեն։ Դեռ չգիտեմ, դրե՞լ են, թե՞ ոչ։ Երեկ լիքը մարդ նույն բանն էր ասում, իրենց ապրանքն էլ չկա, շատերի մեքենաների բանալիներն են գողացել»,-իրավիճակը ներկայացրեց տուժած քաղաքացին։
Տիգրան Լորասբյանը համոզված է, որ ինքն ու ավտոմեքենա ներկրած մյուս քաղաքացիները տուժել են ՊԵԿ աշխատակիցների անգործության, անվտանգության աշխատակիցների ոչ պատշաճ վերահսկողության ու անպատասխանատու վերաբերմունքի պատճառով։
Տիգրանի խոսքով, իր մեքենայի մասերը տարել են պտուտակները հանելուց հետո, ինչի համար պետք է որ պահանջվեր մեկ ժամ։ Այսօր նա զանգահարել է նաև Պետական եկամուտների կոմիտե։ Հեռախոսին պատասխանած աշխատակցուհիներին հիշեցրել է, որ ինքը 6.500 դրամ էլ վճարել է մեքենայի պահպանության համար, մինչդեռ որևէ ծառայություն վճարի դիմաց իրեն չեն մատուցել։
«Մաքսային օրդերում գրված է, որ ես գումար եմ վճարել պահպանության համար։ Հեռախոսը փոխանցեցին մեկը մյուսին, տեսան տակից չեն կարողանում դուրս, գնաց խորհրդակցելու ինչ-որ մեկի հետ, եկավ, ասաց՝ ոչ մի բան չեմ կարող ասել, սպասեք ոստիկանության պատասխանին։ Բայց ոստիկանություն ի՞նչ, նրանք են պատասխանատու այդտեղ գտնվող գույքի համար»,-նշեց նա։
Մեքենա ներկրած քաղաքացին պետական մարմինների վատ աշխատանքի պատճառով ոչ միայն ֆինանսական վնասներ է կրել, այլև բարոյական, ժամանակի կորուստ է ունեցել։
«Հասկանո՞ւմ եք, տարել են մեքենայի վրայի օրգինալ մասերը՝ գործարանային տեղադրմամբ, եթե ես պատվիրեմ օրգինալ մասեր, ապա դրանք ԱՄՆ-ից կհասնեն մի քանի ամսվա ընթացքում, ստիպված եմ լինելու պատվիրել կրկնօրինակը, մի խոսքով, լիքը խնդիրներ են առաջանում։ Բացի այդ, ես երեկ մինչև ժամը 19-ը ոստիկանությունում եմ եղել, կեսգիշերանց եմ տուն հասել»,-գողությանը հետևած խնդիրները թվարկում է նա։
Քաղաքացին մտադիր է պայքարել իրեն պատճառած վնասի փոխհատուցումը ստանալու համար, նաև փաստաբանների ու իրավաբանների աջակցությունն է ակնակալում՝ խնդրի կանխարգելման ու լուծման գործում։
«Տեսեք, կարդում են՝ «Տոյոտա Քեմրի», տեսնում են նույն մակնիշի մեքենա է, առանց կոդի թողնում են տարածքից դուրս գա։ Բայց միգուցե ես ուրիշի «Տոյոտա Քեմրին» եմ տանում, նոր արտադրության»,-նշեց նա։
Մինչ կբացահայտվեն մեղավորները, որպես ցավը սեփական կաշվի զգացած մարդ, նա առաջարկում է պետական մարմիններին պարսպապատել տարածքը, մուտքի հնարավորություն տալ միայն անցաթուղթ ունեցող քաղաքացիներին, ուժեղացնել վերահսկողությունը, ավելացնել անվտանգության աշխատակիցների թիվը, տեղադրել տեսախցիկներ։
Մեքենան մինչև Գյումրի հասնելն ու դրանից հետո։
Լրահոս
Տեսանյութեր
Փաշինյանի կնոջը «Նիկոլ ցեղասպան» վանկարկումով դիմավորեցին Ծիծեռնակաբերդի հուշահամալիրում
