Ձեր վստահելի աղբյուրը

Հատուկ քննչական ծառայությունն անկախ մարմին է, բայց պետք է արձանագրել, որ այդ մարմնի գործունեության համար շատ կարևոր են այն քաղաքական համատեքստը և մթնոլորտը, որ երկրում առկա են: Հատուկ քննչական ծառայության ծառայողի օրվան նվիրված միջոցառմանն ասաց ՀՀ վարչապետ Նիկոլ Փաշինյանը:

Նա նշեց, որ ինստիտուցիոնալ անկախությունն ինքնին չի նշանակում միջավայրային, մթնոլորտի անկախություն:

Կառավարության ղեկավարն իր ելույթում նշեց, որ այսօր Հայաստանում բարձրատիճան պաշտոնատար անձանց կողմից կատարված հանցանքների հետաքննության, քննության համար ստեղծված են հնարավոր ամենալավ պայմանները:

«Ուզում եմ ընդգծել, որ երբ խոսում ենք բարձրաստիճան պաշտոնյաների մասին, ընդհանրապես կոռուպցիայի դեմ պայքարի, չարաշահումների մասին, քաղաքական իրավիճակի և նրբությունների բերումով, ցավոք, երբեմն ընկալվում է, որ մենք նկատի ունենք միայն նախկին պաշտոնյաներին: Ուզում եմ առիթը օգտագործել արձանագրելու համար, որ ամենևին, գուցե թե սկզբունքայնության առումով մենք ավելի շատ նկատի ունենք գործող պաշտոնյաներին, որովհետև եթե չարաշահումների դեմ պայքարը վերաբերի միայն անցյալին, դա ընդամենը կլինի քաղաքական կոնյուկտուրա, քաղաքական նպատակահարմարություն և չարաշահումների հին կուլտուրան չարաշահումների նոր կուլտուրայով փոխարինելու ձգտում, չարաշահումների հին անձնակազմը նոր անձնակազմով փոխարինելու ձգտում»,- ասաց նա:

Վարչապետը նշեց, որ ՀՀ-ում պետական պաշտոնյաները չեն կարող լինել օրենքից վեր: Նրա խոսքով, միշտ չէ և ընդհանուր առմամբ չի կարող ասել, որ շատ բավարարված է կոռուպցիոն գործերի և ընդհանրապես պաշտոնյաների հետ կապված գործերի քննության արդյունքներով:
Կառավարության ղեկավարն ասաց, որ քննչական բոլոր մարմիներում, նաև ՀՔԾ-ում, մեծ խնդիր ունեն քննիչների ծանրաբեռնվածության առումով, «մարդիկ աշխատում են անմարդկային պայմաններում»:

Նիկոլ Փաշինյանի խոսքով, մեծ հաշվով իրենց քաղաքականության մեծագույն նպատակը պետական պաշտոնյանի ինքնազգացողությունը, ինքնաընկալումը փոխելն է, մարդկանց ընկալումը փոխելն է պետական  պաշտոնյայի նկատմամբ:

«Եկեք արձանագրենք, որ Հայաստանում եղել է, դեռևս կա, շարունակում է,  դեռ որոշ ժամանակ կլինի հետևյալը՝  պաշտոնյաները շատ արագ ձեռք են բերում իշխանի, բդեշխի, տիրողի բարդույթ և մեր խնդիրն է, որ պետական պաշտոնյայի իշխանի և բդեշխի բարդույթը փոխակերպվի, կներեք այդպիսի ձևակերպման համար, Հիսուսի բարդույթով»,- նշեց նա:

Վարչապետը բացատրեց, թե «Հիսուսի բարդույթ» ասելով  ինչ նկատի ունի. «Յուրաքանչյուր պաշտոնյա հասկանա, որ ինքը և ծառա է, և տեր է միաժամանակ, այդ երկուսը մեկը մյուսից անջատելով՝ պետական պաշտոնյայի դեպքում չի լինի բավարար չափով օգտակար: Հիսուսը ծառա է և տեր միաժամանակ, ծառա է 100 տոկոսով, տեր այնքանով, որ կարող է կայացնել որոշումներ, կարող է իր որոշումների տրամաբանությունը բացատրել ուրիշներին, այդ որոշումների տրամաբանությունը հարազատ դարձնել ուրիշներին»: