Նիկոլ Փաշինյան. Անսխալական չենք
«Սա շատ բարդ թեմա է: Այլ բան, որ շատ բարդ է հետո վերադարձնել այդ մարդկանց, բայց այդ ուղղությամբ կաշխատենք»,- Ազգային ժողովում կառավորության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին, թե «Մարտի 1»-ի գործով մեղադրանք է առաջադրվել նախկին գլխավոր դատախազ Գևորգ Կոստանյանին, որը Հայաստանում չէ, հետախուզում է հայտարարված, ընդհանրապես՝ ի՞նչ մոտեցում ունեք այն պրակտիկային, որ քրեական գործերով անցնող մարդիկ լքում են Հայաստանը:
Վարչապետն ասաց, որ կհաջողվի մի մասին վերադարձնել, մի մասին չի հաջողվի, բայց այստեղ ամենակարևորն այն է, որ իրենք օրենքի և խղճի, իրավական պետության տեսակետից լինեն մաքսիմալ անաղարտ:
«Այստեղ երկու եզր կա. մի եզրը օրինականությունն է, մյուս եզրը՝ արդարությունը և արդարության հանրային ակնկալիքները: Օրինակ, բնապահպանության նախկին նախարար Արամ Հարությունյանի հարցը: Ըստ էության, նա թողեց և հեռացավ Հայաստանից մի պայմաններում, որ ինքն էլ գիտեր, բոլորին էլ պարզ էր, որ իրեն պետք է մեղադրանք առաջադրվի: Հիմա հարց: Այո, շատ օբյեկտիվ մեղադրանք է հնչում, ինչի՞ ինքը գնաց: Բայց այդ օբյեկտիվ մեղադրանքը քաղաքական մեղադրանք է, իրավական մեղադրանք չէ, որովհետև եթե իրավապահ մարմիններն իրեն թույլ չտային գնալ, նա ԱԺ պատգամավոր էր, օգտվում էր անձեռնմխելիության իրավունքից, լինելու էր ապօրինություն: Մենք ունենում ենք նման իրավիճակներ:
Երեկ մի այդպիս իրավիճակ էինք քննարկում: Կա անձ, որը ենթադրում ենք, որ ինքն էլ գիտի, որ հեսա իրեն մեղադրանք է առաջադրվելու: Մեծ հավանականություն կա, երբ հասունանան մեղադրանք առաջադրելու պահը, ինքը ՀՀ-ում չլինի: Երեկ, օրինակ, այդ հարցը տալիս էի՝ կարո՞ղ ենք արգելել իր ելքը Հայաստանից: Ինձ ասում էին՝ եթե մեր սկզբունքն օրինականությունն է, օրենքով մենք նման բան անել չենք կարող, սկզբունքորեն կարող ենք ուղղակի փակել և թույլ չտալ: Բայց մենք հանրայնորեն պետք է հասկանանք՝ ինչ ենք ուզում»,- ասաց վարչապետը:
Նիկոլ Փաշինյանի խոսքով, նման գործելաոճը քննարկումների տեղիք է տալիս, ասում են՝ իշխանությունները թույլ են և այլն, բայց պետք է հասկանալ, թե ինչ նկատի ունեն ուժեղ և թույլ իշխանություն ասելով. «Եթե ուժեղ է այն իշխանությունը, որ քաղաքական հակառակորդներին պադեզդներում կրակում, սպանում էր, հիմա կամ վաղը պատասխանատվության պահն անխուսափելիորեն գալու է, մենք, համենայնդեպս, մեր արժեքային համակարգով ուժեղ իշխանություն ասելով դա նկատի չունենք: Ուժեղ իշխանություն ասելով՝ նկատի ունենք իշխանություն, որն ունի սկզբունքներ, դրանք հրապարակային են և ստացել են ժողովրդի աջակցությունը, իշխանությունը հետևողական է այդ սկզբունքները կյանքի կոչելու գործում: Իմ ընկալման ուժեղ իշխանությունը բիրտ իշխանությունը չէ, բիրտ իշխանությունը թույլ իշխանությունն է, որ անընդհատ վախենում է, որ իր դեմ ոչինչ չխոսեն: Մենք պատրաստ ենք լսել մեր հասցեին քննադատությունները: Ընդ որում՝ անսխալական չենք, գործում էլ, խոսքում էլ կարող ենք սխալվել, բայց մի բանում վստահ լինենք, որ իրավական և ժողովրդավարական պետություն կառուցելը մեր առաջնահերթությունն է, մենք վստահ գնում ենք այդ ճանապարհով»:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
