Փաշինյան. Մեզ մի կողմից քննադատում են անհանդուրժողականության մեջ, մյուս կողմից՝ հանդուրժողականության

Քաղաքական 18:28 04/12/2019 Հայաստան

Փաշինյան. Մեզ մի կողմից քննադատում են անհանդուրժողականության մեջ, մյուս կողմից՝ հանդուրժողականության

ՀՀ Սահմանադրական դատարանում հաստատված իրավիճակը չի համապատասխանում ՀՀ Սահմանադրությամբ նախատեսված իրավիճակին, և եթե լուծումներ չլինեն, այդպես շարունակվելու է մինչև 2035 թվականը: Ազգային ժողովում կառավարության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին, թե Սահմանադրական դատարանի անդամների վաղաժամ կենսաթոշակների մասին նախագիծն արդեն ԱԺ-ում է, արդյո՞ք հնարավոր է դրանով հանգուցալուծել ՍԴ-ում ստեղծված իրավիճակը:

«Պարզվում է, որ հիմա որոշ գործողությունների, այդ թվում նաև կեղծիքի արդյունքում, ստեղծվել է այնպիսի իրավիճակ, որ ՍԴ-ն չի կարող լինել այնպիսին, ինչպիսին նախատեսված է Սահմանադրությամբ»,- նշեց նա:

Վարչապետի խոսքով, Հայաստանը պետք է համապատասխանեցվի սահմանադրական կարգին. «Մեզ մի կողմից քննադատում են անհանդուրժողականության մեջ, մյուս կողմից քննադատում են հանդուրժողականության մեջ: Նրանք, ովքեր քննադատում են հանդուրժողականության մեջ, այս օրենքի պարագայում ավելի շատ կքննադատեն, ովքեր քննադատում են անհանդուրժողականության մեջ, այլ բան կգտնեն քննադատելու»:

Նիկոլ Փաշինյանի խոսքով, ՍԴ անդամներին նույն գումարն են վճարելու, եթե վաղաժամ գնան թոշակի կամ շարունակեն մնալ ՍԴ անդամ:

«Մենք ասում ենք՝ եթե այսպես թե այնպես վճարելու ենք, եկեք վճարենք, բայց միևնույն ժամանակ ունենանք Սահմանադրական դատարան նախատեսված Հայաստանի Սահմանադրությամբ: Այդ գումարը չվճարելու տարբերակ սկզբունքորեն չունենք: Մեր նկատառումն է՝ ոչ այնքան հաճելին, այնուամենայնիվ, համատեղել օգտակարի հետ»,- ասաց կառավարության ղեկավարը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: