Ձեր վստահելի աղբյուրը

Վարչապետ Նիկոլ Փաշինյանը գործադիրի այսօրվա նիստում անդրադառնալով օրեր առաջ ֆեյսբուք սոցիալական ցանցում իր կատարած գրառմանը՝ ազատվել ժանգոտած ու անպետք մետաղի ջարդոնից, նշեց, որ այն շատ հետաքրքիր արձագանք է ստացել։

Վարչապետի խոսքով՝ ամբողջ երկրում համատարած լցված ավտոմեքենաների, կուզովների և ժանգոտ բուտկաների պատմությունը պետք է լուծվի։

«Մենք պետք է գնանք նաև կոշտ միջոցների և ասենք, որ եթե ոչ պիտանի մեքենան շարունակում ես պահել և միջավայրը աղտոտել, եթե այդքան թանկ է ձեզ համար, ուրեմն պետք է տուրք վճարեք, հակառակ դեպքում՝ մենք փոսից դուրս չենք գա»,- ասաց Նիկոլ Փաշինյանը՝ նշելով, որ չնայած դրան՝ այս հարցում որոշակի հաջողություն ունեն:

Էկոնոմիկայի նախարար Տիգրան Խաչատրյանն ասաց, որ  երկու ամսվա ընթացքում կազմակերպություններին 3600 տոննա՝ բրիկետների ձևով ջարդոն է հանձնվել, որոնց 95 տոկոսը մեքենաներից ձևավորված ջարդոններն են, սակայն առկա են մի շարք այլ խնդիրներ։

«Խնդիրն այն է, որ կազմակերպության ղեկավարը գնում է ասում՝ եկել եմ վճարելու և տանելու, ասում են՝ մերն է, չենք տալիս, մեզ պետք է։ Հիմա մտածում ենք, ինչպիսի՞ իրավակարգավորումներ առաջարկենք, որ օրենքի կարգավորման ուժով կարողանանք հարցը լուծել։ Կա գնորդ, բաց չի կարողանում հարաբերվել այդ գույքի սեփականատերերի հետ»,- ասաց նախարարը։

Նիկոլ Փաշինյանը կրկին անդրադառնալով իր գրառմանը՝ նշեց. «Որ գրառում էի արել, ասում են, փաստորեն, դուք մարդկանց պարտադրում եք, որ մետաղը ջրի գնով հանձնեն Սերժ Սարգսյանի հետ կապ ունեցող ընկերությանը: Այդ մետաղը, որ հիսուն տարի մնացել է և ժանգոտում է, մեկ կոպեկի շահույթ չի բերել այդ մարդում, որ էրեխեք են բարձրացել այդտեղ, ընկել, էրեխեքի վիզուալ գեղագիտությունը հիսուն տարի փչացրել է, դա ոչինչ: Այստեղ էլի գալիս է ներքաղաքական դավադրություն, որ, փաստորեն,  սաղ հեղափոխությունը նրա համար էր, որ ժեշտի կուզովները տանեն հին կոռումպացված ռեժիմի նպատակներին ծառայեցնեն: Խելագարվելու բան է, թե ոնց են մարդիկ ռեակցիա տալիս։ Ես չեմ թաքցնի, երբեմն այս մարդիկ մեր կուսակցության անդամներն են, երբեմն ԱԺ պատգամավորներն են սենց բաներ գրում, ուզում ես պատուհանը բացես ու…։ Դրա համար մեր անվտանգությունը պատուհանները նենց է դասավորել, որ չեն բացվում։ Մեկ-երկու նման փորձից հետո, հիմա էլ ցանց են ուզում տակերը դնել»։