Ձեր վստահելի աղբյուրը

Այո, պարգևավճարներ տրվելու են։ Այս մասին այսօր լրագրողների հետ հանդիպման ժամանակ ասաց ՀՀ ֆինանսների նախարար Ատոմ Ջանջուղազյանն՝ անդրադառնալով հարցին, թե արդյոք պարգևատրումներ լինելո՞ւ են։

Նրա խոսքով՝ պետք է առհասարակ կարևորել վարձատրության համակարգը, այլ ոչ թե պարգավճարը։

«Այս ժամանակահատվածին վերաբերվում ենք որպես միջանկյալ, քանի դեռ չի գտնվել վարձատրության համակարգը կանոնակարգող լավագույն լուծումը»,- ընդգծեց նա։

Ատոմ Ջանջուղազյանը նշեց՝ պետական և մասնավոր հատվածում այս կամ այն աշխատատեղի համար վարձատրության համակարգը ենթադրում է, որ պետք է լինի համադրելի, հակառակ դեպքում, մշտապես կունենան իրավիճակ, որ այդ վարձատրությամբ հնարավոր չէ պետական համակարգում նորմալ մասնագետ ունենալ։ Ըստ նրա՝ աշխատատեղի համար պետք է լինի վարձատրությունը, այլ ոչ թե նրա համար, թե որ համակարգում է այդ աշխատատեղը տեղակայված։

«Այո, պարգևավճարներ տրվելու են, որովհետև դա նախատեսված է: Ավելին ասեմ՝ ֆինանսների նախարարությունում աշխատակազմի թվաքանակի փոփոխության արդյունքում ունենք կոնկրետ տնտեսումներ, պոտենցիալ հնարավորություն պարգևավճարներ տալու:  Դրանք կառաջացնե՞ն նույն արձագանքն, ինչ անցած տարի, թե ոչ, կյանքը ցույց կտա», -  նշեց Ատոմ Ջանջուզյանը։