Երիտասարդ ՀՅԴ-ական. Աջակցություն ունենք, բայց հրաժարվում են դա անել հրապարակային
«Դաշնակցական երիտասարդները հանձնառու են հզոր, ընկերավար և ժողովրդավար, ազգային արժեքներ կրող պետություն կերտելու գործում: Այնպես որ, մեր բոլոր գործողություններն ուղղված են լինելու այս նպատակին»,- լրագրողների հետ հանդիպմանն ասաց ՀՅԴ երիտասարդական-ուսանողական միության ներկայացուցիչ Արշակ Մեսրոպյանը՝ խոսելով դեկտեմբերի 5-7-ը Երևանում կայացած Հ.Յ.Դ. Երիտասարդական-ուսանողական եռօրյա համահայկական խորհրդաժողովի մասին:
Նա նշեց, որ խորհրդաժողովն իր ընդվզումն է արտահայտել Հայաստանի ներքաղաքական զարգացումների վերաբերյալ, դատապարտել է այդ երևույթները:
Խոսելով իրենց երեք ընկերների մասին, որոնք արտաքսվել են կուսակցությունից՝ կուսակցության կանոնները խախտելու համար, Ա. Մեսրոպյանն ասաց, որ ներքին ժողովրդավարությունը կուսակցության մեջ շատ ամրացած է:
«Ցանկացած հարց, որ մտնում է մեր խմբային ժողով, բոլորն էլ իրավունք ունեն արտահայտվելու, անկեղծ մտահոգությունները, տեսակետն արտահայտելու: Բայց երբ որ ժողովն արդեն կայացնում է որոշում, այդ պահից հետո մենք բոլորս դառնում ենք մի զինվոր, այդ գործը, նպատակը իրագործելու մեջ: Դա մեզ համար ներքին ժողովրդավարություն է: Այդ որոշումից հետո, եթե ցանկացած ոք այլ ուղղությամբ է գնում, գոյություն ունի կուսակցության կանոնագիր, դրան համապատասխան կարգապահական ընթացք է լինում, համապատասխան կետով արժանանում է պատժի»,- նշեց նա:
Ասուլիսին ներկա ՀՅԴ ՀԵՄ ներկայացուցիչ Քրիստինե Վարդանյանն ասաց, որ այդ երեք անդամի՝ կուսակցության շարքերից արտաքսման պատճառը ոչ թե այն է եղել, որ ցույցերին չեն մասնակցել, այլ որ հրապարակային քննադատել են կուսակցությանը, որն արգելված է մեր կանոնագրով:
«Հիմա լավն է, թե վատն է կանոնագիրը, այլ հարց է: Մեզ համար կա այդ մի կանոնագիրը, որին մենք բոլորս ենթակա ենք: Մեզ համար քննադատության տեղը ժողովն է, որտեղ կարող ենք ամենաբարձր պաշտոն զբաղեցնող ՀՅԴ-ականին հրավիրել և պատասխան պահանջել: Դրա տեղը ժողովն է»,- նշեց նա:
Քրիստինե Վարդանյանն ասաց, որ երիտասարդական միության թիվ մեկ օրակարգը մնում է կրթության, գիտության, մշակույթի և սպորտի ոլորոտում վարվող քաղաքականությունը և այդ քաղաքականության պատասխանատու Արայիկ Հարությունյանի հրաժարականը:
«Շարունակում ենք պահանջել նախարար Արայիկ Հարությունյանի հրաժարականը։ Մեր վերջին գործողությունից հետո ոստիկանության կողմից կիրառվեց անհամապատասխան ուժ։ Դրա միակ պատասխանատուն Արայիկ Հարությունյանն էր, ով պարզապես չգնաց հանդիպման երիտասարդների հետ։ Առաջիկա շաբաթվա ընթացքում մենք էլի կունենանք համապատասխան ակցիա», - ասաց նա:
Ք. Վարդանյանի խոսքով, իրենց պայքարը, շարժումը շարունակելու մղիչ ուժը հիմնական այն է, որ շփվելով հասարակության տարբեր անդամների՝ մարզաբանակ, քաղաքաբնակ հետ, հասկանում են, որ այս ոլորոտներում վարվող քաղաքականությունը, նախարարի վարած քաղաքականությունն անհասկանալի և անընդունելի է:
«Այլ հարց է, թե ինչու այդ մարդիկ հրապարակային կամ տեսակետ չեն արտահայտում, կամ մեր կողքը չեն: Մենք մտածում են այդ մասին, փորձում ենք գտնել լուծումներ: Մարդիկ վախենում են դեմ խոսելուց, պիտակավորվելուց, ֆեյքերի հարձակումներից: Այսինքն՝ ի՞նչն է մեզ ցույց տալիս, որ կա աջակցություն, բայց հանրային չէ: Ցույց է տալիս նամակները, մարդկանց այցերը գրասենյակ, որոնք պատրաստ ենք մեզ ամեն ինչում աջակցել, նաև նյութապես, բայց հրաժարվում են դա անել հրապարակային: Իրողությունը սա է, մեր քայլերն էլ բխելու է այդ իրողությունից»,- նշեց ՀՅԴ երիտասարական թևի ներկայացուցիչը:
Հարակից հրապարակումներ`
- Կյուրեղյան. Իշխանությունները մեծ վտանգ են տեսնում ՀՅԴ-ից
- Բագրատ Եսայան. ՀՅԴ երիտասարդների հանդիպման պահանջը փորձ է արվում ուժով ճնշել
- ՀՅԴ երիտասարդները փորձում են ներխուժել ԿԳՄՍ նախարարության շենք
- ՀՅԴ երիտասարդները սպասում են նախարար Արայիկ Հարությունյանին
- ԿԳՄՍ նախարարություն. Արայիկ Հարությունյան-ՀՅԴ հանդիպման որևէ պայմանավորվածություն չկա
- ՀՅԴ երիտասարդները վաղը կհանդիպեն Արայիկ Հարությունյանին
- ՀՅԴ ՀԵՄ-ը պահանջներ է ներկայացրել