Ձեր վստահելի աղբյուրը

Դեկտեմբերի  21-ին,  ժամը 20:00-ին Երևանի Հանրապետության  հրապարակում տեղի կունենա ամանորյա  տոնական լույսերի վառման արարողությունը, որը կուղեկցվի հայկական մոտիվներով, հայաֆիկացված համաշխարհային ամանորյա հիթերի գործիքավորմամբ մյուզիքլով, որի համար մեծ ստեղծագործական, բեմադրական խումբ է աշխատում: Լրագրողների հետ հանդիպմանն ասաց Երևանի փոխքաղաքապետ Տիգրան Վիրաբյանը:

Նրա տեղեկացմամբ, դեկտեմբերի 31-ին Հանրապետության հրապարակում տոնական  ծրագիրը մեկնարկելու է 22:00-ից: Նախ ելույթ են ունենալու հայ արտիստները, կայանալու է Գարիկ Պապոյանի և Սոնա Ռուբիյանի «Երևան 20/20» երգի պրեմիերան:

«Համերգային ծրագիրը կշարունակվի մինչև 23:45-ին: Այնուհետև կլինի վարչապետ Նիկոլ Փաշինյանի ամենորյա ուղերձը Հանրապետության հրապարակից՝ ուղիղ եթերում, որից հետո արդեն ելույթ կունենա Գորան Բրեգովիչն իր նվագախմբի հետ՝  ընտրված հետաքրքիր երգացանկով: Նրա համերգից հետո տոնական միջոցառումները կշարունակվեն մինչև լուսաբաց»,- ասաց Տ. Վիրաբյանը:

Նա նշեց, որ Բրեգովիչի և ընդհանուր խմբի հետ կնքած պայմանագրի արժեքն է 65 հազար եվրո. «Խումբը լինելու է տասից ավելի արտիստներով, կենդանի նվագակցությամբ: Խմբի հետ Հայաստան է ժամանում նույնիսկ բեկ-վոկալ կատարող արտիստներ, այսինքն իր ամբողջական խմբով»:

Փոխքաղաքապետը հայտնեց, որ Հանրապետության հրապարակում՝ շատրվանների տարածքում, կառուցվում է հեքիաթային տարածք՝ նոր մոտեցումներով, հետաքրքիր դեկորներով և ժամանակակից լուծումներով:

«Այս միջոցառման և տոնական օրերի համար Երևանի քաղաքապետարանը պատվիրել է վերգետնյա անցում դեպի գլխավոր եղևնին՝ ապահովելով մեր համաքաղաքացիների անվտանգ երթևեկությունը: Տարիներ շարունակ մարդիկ փորձել են մոտենալ հիմնական եղևնուն անվտանգության կանոնները խախտելով»,- ասաց նա:

Տ. Վիրաբյանի ներկայացմամբ, 2750-ամյակի այգում կազմակերպվելու է  ամանորյա և սուրբծննդյան  տոներին նվիրված  տոնավաճառ:

«Կարծում են՝ ամանորյա  տոնավաճառը պետք է լինի ընդհանուր մշակութային միջոցառումների բովանդակության մեջ, չի կարող լինել զուտ առանձին վաճառք կազմակերպելու համար տրամադրված տարածք և ուղղակի տաղավարներ: 2750-ամյակի այգին ձևավորել ենք ամանորյա տրամաբանության մեջ, այս տարածքում նույնպես կլինի հետաքրքիր ամանորյա միջավայր»,- ասաց նա:

Տոնական միջոցառումները շարունակվելու են մինչև հունվարի 13-ը: 2750-ամյակի այգում միջոցառումները կլինեն ամենօրյա:

Խոսելով ծախսերի մասին, Տ. Վիրաբյանն ասաց, որ Երևանի քաղաքապետարանն իր բյուջեով նախատեսված ամանորյա ծախսերը վերջին երկու տարիներին որևէ կերպ չի ավելացրել: Նա ներկայացրեց թվեր, ըստ որոնց՝ 2017 թվականի Երևանի քաղաքի ամանորյա ծախսերի բյուջեն կազմել է 199 միլիոն 46 հազար դրամ՝ կենտրոնական և վարչական շրջանների միջոցառումները միասին,  2018 թվականին՝  167 միլիոն 860 հազար դրամ, 2019-ին՝ 158 միլիոն 512 հազար դրամ:

«Սա նշանակում է  վերջին երկու տարիներին, երբ ամանորյա ծախսերը պլանավորել և իրականացել է Երևանի քաղաքապետարանը, ծախսային մասով  40 միլիոն  դրամի նվազում ունենք 2017-ին և 2019-ին արված ծախսերի մասով»,- նշեց փոխքաղաքապետը:

Ինչ վերաբերում է կառավարության կողմից հատկացված բյուջեին, նա մանրամասնեց. «Սա պատվիրակված լիազորություն է, որ մենք իրականացնում ենք: Միջոցառումների ծավալը Երևանի քաղաքապետարանը 2019 թվականի բյուջեով արդեն իսկ ուներ նախատեսված՝ 54 միլիոն դրամ: Այնուհետև կառավարության կողմից եղել է առաջարկ կատարել ծավալների փոփոխություն,  միջոցառումները դարձնել համապետական, հրավիրել միջազգային հեղինակության արտիստ»: 

Ինչ վերաբերում է ընտրված ընկերություններին, Տ. Վիրաբյանն ասաց, որ հոկտեմբերին կառավարության որոշմամբ մշակութային միջոցառումներին հնարավորություն է  տրված գնումները կատարել մեկ անձից:

«Այս պարագայում մենք մշակութային միջոցառման համար գնում ենք կատարել 4 տարբեր ընկերություններից: Եթե գեղարվետսկան ստեղծագործական մասով պատասխանատու է մի ընկերություն, ապա այդ ընկերության տեխնիկական սպասարկումն իրականացնում է մեր կողմից ընտրված  մեկ այլ ընկերություն: Այսպիսով, հնարավորություն ենք տվել չորս տարբեր ընկերությունների ներկայացնել իրենց աշխատանքը: Ընտրությունը կատարվել է համատեղ  քննարկումների արդյունքում, ուսումնասիրվել է նման աշխատանք կատարելու նրանց փորձը, այն ստեղծագործական հաջողություներն ու աշխատանքը, որոնք գրանցել են ընկերությունները»,- ասաց Տ. Վիրաբյանը: 

Նա հայտարարեց, որ ամանորյա միջոցառումների համար 271  միլիոն դրամ հատկացրել է կառավարությունը, ևս 54 միլիոն  դրամ համայնքային բյուջեից է ծախսում՝  Երևան քաղաքի Հանրապետության հրապարակում և հարակից տարածքներում իրակացվող 23 օրվա միջոցառումների համար: Վարչական շրջաններում  իրականացվող միջոցառումների բյուջեն կազմում է 81 միլիոն դրամ: