152 միլիոն դոլար պարտք՝ 2019 թվականի բյուջեի դեֆիցիտը լրացնելու համար
«Մենք 152 մլն դոլարի պարտավորություն ենք ստանձնում, որովհետև մեր բյուջեում ճեղքն այդքան է եղել»,- այս մասին այսօր խորհրդարանում նշեց ՀՀ ֆինանսների փոխնախարար Արմեն Հայրապետյանը՝ պատասխանելով «Բարգավաճ Հայաստան» խմբակցության պատգամավոր Սերգեյ Բագրատյանի հարցին։
«Մենք 130 մլն եվրոյից ավելի վարկային միջոցներ ենք վերցնում, և դուք խոստանում եք, որ սա վերջին բյուջետային վարկը կլինի։ Հիմա սա կարո՞ղ ենք ամրագրել, թե մյուս տարի էլ կասեք, որ 2019-ինը նախավերջինն էր, վերջնն էս տարի ա լինելու»,- նշել էր Բագրատյանը։
Հայրապետյանի խոսքով, 2020 թվականի պետական բյուջեն հաստատվել է, և հստակ նշված է, որ նման միջոցներով Հայաստանի պետական բյուջեի դեֆիցիտը չի լրացվելու։ Եվ կառավարության ընդունած միջնաժամկետ ծախսերի ծրագրերում ևս նման պլաններ՝ օտարերկրյա դոնորներից օգտվելու, չկան։
«Բարգավաճ Հայաստան» խմբակցության պատգամավոր Միքայել Մելքումյանը նշեց, որ 152 միլիոն դոլարը մտնելու է ընդհանուր պետական բյուջե, և կարելի է դրանից հրաժարվել, քանի որ պետությունն ունի հարաճուն մուտքերի աճ և 300 միլիարդ 5.5 տոկոսով դեպոզիտով դրված գումար. «Ինչո՞ւ եք նորից պարտքով բեռնում պետությանը, սկի եղած գումարը չեք կարողանում ծախսել, հայտարարեք, որ հրաժարվում եք այդ վարկերից, երկրաշարժ չի լինի»։
Արձագանքելով Մելքումյանի հայտարարությանը՝ ֆինանսների փոխնախարարը նշեց, որ տրամադրվող վարկերը կոնկրետ նպատակայնություն չունեն, գումարը ծախսվելու է բյուջեի պակասորդը լրացնելու համար։
«Լուսավոր Հայաստան» խմբակցության պատգամավոր Արկադի Խաչատրյանը նշեց, որ հոկտեմբեր ամսվա տվյալներով՝ Հայաստանն ունի 58 միլիարդ 642 միլիոն դրամի, իսկ դեկտեմբերի տվյալներով՝ 9 միլիարդի հավելորդ։
Ֆինանսների փոխնախարարը նշեց, որ այդ 9 միլիարդ դրամը 2020 թվականի առաջին տասնօրյակի համար նախատեսված պետական ծախսերը չի կարող հոգալ և կարող է գումարի պակաս զգացվել։
«Մենք կարող ենք հրաժարվել վարկից, բայց դա ռիսկային է, քանի որ խնդիր ենք ունենալու հարկային եկամուտների 56 միլիարդը վերադարձնելու հարցում»,- նշեց Արմեն Հայրապետյանը։