Պետական բյուջեի բացը լրացնելը՝ դոնորների հույսին
«4 վարկային համաձայնագրերը ստորագրվել են 2018 թվականին և նախատեսված են 2019 թվականի ՀՀ պետական բյուջեի դեֆիցիտը լրացնելու համար»,- այս մասին այսօր ԱԺ-ում հայտարարեց ՀՀ ֆինանսների նախարարի տեղակալ Արմեն Հայրապետյանը՝ պատասխանելով «Լուսավոր Հայաստան» խմբակցության պատգամավոր Կարեն Սիմոնյանի հարցին։
Պատգամավորին հետաքրքրում էր, թե ինչով է պայմանավորված 4 վարկային պայմանագրերի վավերացումը արտահերթով դեկտեմբեր ամսին օրակարգ բերելը։
Հայրապետյանի խոսքով, 2019 թվականի բյուջեով կար ֆինանսական հոսքերի դեֆիցիտ, որի ֆինանսավորման համար նախատեսվել էր արտաքին ֆինանսական միջոցների ներգրավում. ֆինանսական միջոցների այն մասը, որ բաց է մնացել, դոնորները պետք է լրացնեն։
«Հարցի հրատապության պատճառն այն է, որ 2019 թվականի պետական բյուջեն իրականացնենք, և երկրորդ, մենք ունենալու են էդ միջոցների բաց, եթե դա տեղի չունենա, և ստիպված ենք լինելու այլ աղբյուրներից լրացնել, ինչը արդեն ֆինանսական անկայունության կարող է հանգեցնել»,- նշեց Արմեն Հայրապետյանը։
Արձագանքելով հնչած պատասխանին՝ Կարեն Սիմոնյանը հարցրեց, թե արդյոք այս համաձայնագրերից է կախված 2019 թվականի պետական բյուջեի կատարողականությունը։
«Այո»,- պատասխանեց Արմեն Հայրապետյանը՝ հավելելով, որ կառավարությունը պարտավորություն ունի արտաքին աղբյուրներից միջոցներ ներգարվվելուն։
Հիշեցնենք, որ ԱԺ արտահերթ նիստի օրակարգում ներկայացված է 10 հարց։
Հարակից հրապարակումներ`
- Մեկնարկել է ԱԺ արտահերթ նիստը. օրակարգում 10 հարց է
- Ատոմ Ջանջուղազյան. 2020 թ. բյուջեն կազմվել է ընթացիկ տարվա բյուջեի արդյունքների հիման վրա