Ձեր վստահելի աղբյուրը

«Ես հաղորդում եմ տվել հանցագործության մասին. Երևանի քաղաքապետի կողմից եղել է պաշտանական կեղծիք»,- այս մասին այսօր ավագանու արտահերթ նիստում նշեց ավագանու «Լույս» խմբակցության անդամ Դավիթ Խաժակյանը։

Խաժակյանի խոսքով, ինքը ստացել է տեղեկանք, որտեղ նշված է Երևանի քաղաքապետ Հայկ Մարությանի արձակուրդ մեկնելուն, որով լիազորությունները նաև վերապահվում էին Երևանի քաղաքապետի տեղակալ Հայկ Սարգսյանին, սակայն վերջինս իրավունք չուներ այդ լիազորությունն իրականացնելու. «Նոյեմբերի 4-ին այս որոշումը ստեղծվել է հետին ամսաթվով՝ հոկտեմբերի 17-ով։ Իմ ձեռքի տակ կա փաստաթուղթ, որով ես դիմում եմ դատախազությանը, երբ ցանկանան, ես կտրամադրեմ։ Կա փաստաթուղթ, որը դուք փոխել եք, բռնվեցիք, ժողովուրդ ջան։ Ես պաշտոնական պատասխան եմ ստացել քաղաքապետի ստորագրությամբ փաստաթուղթը, բայց իմ ձեռքի տակ այլ ստորագրությամբ ու տարբերվող փաստաթուղթ կա»։

Խաժակյանն առաջարկեց կամ իրեն դատի տալ՝ զրպարտելու պատրվակով, կամ թող դատախազությունն իրենից պահանջի փաստաթուղթը, որտեղ նույն որոշումը քաղաքապետի ստորագրությամբ չէ։

«Թող դատախազությունը վերցնի սա, տանի էքսպերտիզայի պարզի՝ իմ ձեռքի տակ եղածը ֆոտոշոփի արդյունք է, թե ոչ։ Եվ ես հույս ունեմ, որ պաշտոնական կեղծիքի հարցով մենք որոշումներ կունենանք։ Երբ խոսում եք իրավականությունից, օրինականությունից, նախ ինքներդ պահեք օրինականությունը»,- նշեց Դավիթ Խաժակյանը։

Ավելի վաղ Խաժակյանը տարածել էր Գլխավոր դատախազին ուղղված հանցագործության մասին հաղորդումը, որտեղ մասնավորապես նշված է.

«Հարգելի՛ պարոն Դավթյան,
ս.թ. նոյեմբերի 26-ին Երևանի ավագանու հերթական նիստին հանդես եկա հայտարարությամբ և ներկայացրեցի հաղորդում հանցագործության մասին։ Հայտարարությամբ ներկայացրեցի այն էական հանգամանքները, որոնք շարադրում եմ ստորև։ Բանն այն է, որ ս.թ. հոկտեմբերի 22-ից նոյեմբերի 8-ը Հայկ Մարությանը գտնվել է արձակուրդում։ Հոկտեմբերի 22-ից նոյեմբերի 4-ը Հայկ Մարությանի արձակուրդում գտնվելու ընթացքում Երևանի քաղաքապետին փոխարինել է քաղաքապետի առաջին տեղակալ Հրաչյա Սարգսյանը, հիմք ընդունելով «Երևան քաղաքում տեղական ինքնակառավարման մասին» օրենքի 48-րդ հոդվածի 2-րդ մասը։

Նույն ժամանակահատվածում՝ հոկտեմբերի 25-ին քաղաքապետի առաջին տեղակալ, քաղաքապետի պաշտոնակատար Հրաչյա Սարգսյանը 3975-Ա քաղաքապետի որոշմամբ Հրաչյա Սարգսյանին գործուղել է արտասահման նոյեմբերի 5-ից 13-ը ժամանակահատվածով։ Ինչպես քաղաքապետարանի պաշտոնական կայքից ծանոթանում ենք քաղաքապետի որոշումներին և կարգադրություններին Հայկ Մարությանի և Հրաչյա Սարգսյանի բացակայության ժամանակ քաղաքապետի լիազորությունները կատարել է քաղաքապետի տեղակալ Հայկ Սարգսյանը:
«Երևան քաղաքում տեղական ինքնակառավարման մասին» օրենքի (այսուհետ Օրենքի) 48-րդ հոդվածի 2-րդ մասը հստակ ամրագրում է, որ «Քաղաքապետի առաջին տեղակալը փոխարինում է քաղաքապետին վերջինիս բացակայության ժամանակ»։ Սա քաղաքապետի առաջին տեղակալի բացառիկ իրավասությունն է, քանի որ վերջինս հանդիսանում է ավագանու անդամ, այդպիսով լինելով քաղաքապետից հետո գործադիր պաշտոն զբաղեցնող միակ պաշտոնյան, ով իրավասու է իրականացնելու քաղաքապետի բացառիկ լիազորթյունները, ինչպիսիք են քաղաքապետի որոշումներ և կարգադրություններ ընդունելը, ստորագրելը։

Ներկայացրած հանգամանքներից և Օրենքից բխում է, որ քաղաքապետի տեղակալ Հայկ Սարգսյանը չի կարող փոխարինել քաղաքապետին և չունի իրավասություն կատարելու քաղաքապետի բացառիկ լիազորությունները՝ մասնավորապես քաղաքապետի որոշումներ և կարգադրություններ ստորագրելը։ Մինչդեռ քաղաքապետարանի պաշտոնական կայքում հրապարակված որոշումներից և կարգադրություններից կարող ենք տեսնել, որ հիշյալ ժամանակահատվածում Հայկ Սարգսյանը ստորագրել է 7 տասնյակից ավել այդպիսի փաստաթղթեր։

Այս գործողությունները անհրաժեշտ ենք համարում դիտարկել Քրեական օրենսգրքի 309-րդ հոդվածի ներքո, քանի որ Հայկ Սարգսյանի կողմից իրացվել է մի լիազորություն, որը վերջինիս Օրենքով վերապահված չէ, այդպիսով անցնելով պաշտոնեական լիազորությունները։ Նկատի ունենալով այն հանգամանքը, որ իր լիազորությունները Հայկ Սարգսյանին փոխանցվել են առանց իրավական պատշաճ հիմքերի, նույն հոդվածի շրջանակներում պաշտոնեական լիազորություններն անցնելու դեպք պետք է դիտարկել նաև քաղաքապետի կողմից»։

Նա նաև պատրաստակամություն է հայտնել աջակցելու քննությանը և մատնանշելու բազմաթիվ այլ հանգամանքներ։