Սպանված զինծառայողի մայր. Արյուն էլ թափվի, ես Փաշինյանի հետ պիտի հանդիպեմ
Դեկտեմբերի 2-ին Արցախի ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում դեռևս չպարզված հանգամանքներում սպանված Արթուր Աջամյանի հարազատները շարունակում են բողոքի ակցիա իրականացնել կառավարության շենքի դիմաց։
Մայրը՝ Գոհարը պահանջում է, որ կառավարության նիստը վարող Նիկոլ Փաշինյանը դուրս գա և հանդիպի իրենց հետ։
«Ես պահանջով եմ եկել, թող գան, ինձ ասեն, թե ինչպես է սպանվել իմ որդին։ Ես հինգ րոպե ժամանակ եմ տալիս, հետո քարերով, բանով մտնելու ենք կառավարության շենք»,-բարկացած գոռում էր մայրը։
Հիշեցնենք, որ նույն օրը ևս մեկ զինծառայող է վիրավորվել։ Սպանվածի մայրը պահանջում է իրեն թույլ տան տեսնել վիրավորին։
«Մենք հանդիպեցինք նաև Անդրանիկ Քոչարյանին։ Ձեռ ձեռ տվեց սկեսրայրիս, ասաց՝ Խատիֆ ջան, դուք ձեր երեխու դիակը հանձնեք հողին, կհանդիպենք, կխոսենք։ Դրանից հետո ոչ զանգերին է պատասխանել, ոչ գործով հետաքրքրվել»,-ասաց մայրը։
Բողոքի ակցիայի մասնակիցներին կառավարությունից առաջարկեցին շենք մտնել, սպանվածի պապը թույլ չտվեց որևէ մեկին համաձայնել առաջարկին։ Սակայն քիչ անց փաստաբանը, տուժողի իրավահաջորդ ճանաչված Խատիֆ Աջամյանը, զինծառայողի մայրը մտան կառավարություն։
Քիչ անց շենքից դուրս եկած մայրը հայտարարեց, ամեն գնով հանդիպելու է Նիկոլ Փաշինյանի հետ. «Ես ասում եմ, Նիկոլ Փաշինյանի տղան էլ է զինծառայող։ Արյուն էլ թափվի, ես պիտի հանդիպեմ նրան, գետնին էլ կպառկեմ»։
Նրա խոսքով, կառավարության շենքում իրենց հանդիպել է քննիչը, ասել է, քննություն է իրականացվում. «Նույն բանը ասեց Քոչարյան Անդրանիկը, տղամարդու խոսք տվեց, ասեց՝ հարցի լուծումը կտամ։ Ոչ մի բան էլ չարեց, խնդրում եմ, թույլ տվեք, ես մտնեմ շենք»։
Քննչական կոմիտեից ավելի վաղ հայտնել էին, որ Դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում պարտադիր ժամկետային զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ երրորդ կայազորային քննչական բաժնում ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/ հարուցվել է քրեական գործ, կատարվում է նախաքննություն:
Քրեական գործով կատարվել են մի շարք անհետաձգելի և անհրաժեշտ քննչական գործողություններ՝ կատարվել է դեպքի վայրի զննություն, դիակի արտաքին զննում, նշանակվել են դիակի, ինչպես նաև` Դ.Մելիքբեկյանի վերաբերյալ դատաբժշկական փորձաքննություններ, մի շարք զինծառայողներ հարցաքննվել են որպես վկա, տուժող Ա.Աջամյանի պապը՝ Խատիֆ Աջամյանը, ճանաչվել է տուժողի իրավահաջորդ և հարցաքննվել, փաստաբաններ Հայարփի Սարգսյանը և Խաչատուր Ստեփանյանը ճանաչվել են տուժողի իրավահաջորդի ներկայացուցիչներ և մասնակցել են դիակի դատաբժշկական փորձաքննությանը, վերցվել են մարտական դիրքի տեսախցիկների տեսագրությունները, միջնորդություններ են հարուցվել դատարան՝ Ա.Աջամյանի հեռախոսային միացումների վերծանման և նրա բջջային հեռախոսը զննելու վերաբերյալ, նշանակվել է դատաձգաբանական փորձաքննություն: