Ձեր վստահելի աղբյուրը

Տնտեսական մրցակցության պաշտպանության պետական հանձնաժողովն ընթացիկ տարում ուսումնասիրություններ է կատարել յոթ շուկայում։ Այս մասին այսօր լրագրողների հետ հանդիպման ժամանակ ասաց ՏՄՊՊՀ նախագահ Գեղամ Գևորգյանը։

Մասնավորապես, անդրադառնալով բենզինի, դիզելային վառելիքի շուկաներում կատարված ուսումնասիրություններին՝ նա նշեց, որ բենզինի դեպքում կա մեծ կենտրոնացվածություն, այսինքն՝ գերիշխող դիրք ունեցող ընկերություն: Հայաստան հիմնական բենզին ներկրողը «Ռոսնեֆտ Արմենիա» ընկերությունն է, որից հայկական ընկերությունները ձեռք են բերում բենզին։ Բենզինի շուկայում իրացման տեսանկյունից ևս կենտրոնացվածությունը մեծ է, «Սի Փի Էս» ընկերությունը գերազանցում է բոլոր մնացած ընկերություններին, սակայն երեք ընկերություն համարվում է գերիշխող դիրք ունեցող։

Ինչ վերաբերում է դիզելային վառելիքին, ապա այստեղ իրավիճակն ավելի լավ է: Ըստ Գեղամ Գևորգյանի՝ 2019 թվականին արդեն 18 ընկերություն դիզելային վառելիք է ներմուծում Հայաստան, սակայն դրանց մասնաբաժինները բավական փոքր են և շուկայի վրա որևէ ազդեցություն չեն դրսևորել։. «Այսինքն՝ կենտրոնացվածությունը բավականին բարձր է և խաղացողները հիմնականում այդ երեք ընկերությունն են»։

ՏՄՊՊՀ նախագահը նաև հայտնեց, որ մի շարք խնդիրներ կան բենզալցակայաններում։

Մասնավորապես,  ըստ նրա, դրանց մի մասը չի համապատասխանում օրենսդրության պահանջներին:

«Այստեղ գլոբալ լուծում է պետք։ Օրինակ, բենզալցակայանի տեղադիրքը, սանիտարահիգիենիկ պայմանները չեն համապատասխանում օրենսդրության պահանջներին: Սա, իհարկե, ուղիղ չի ազդում մրցակցության վրա, բայց մի ընկերության կողմից այդ պահանջների պահպանումն ու մյուսի չպահպանելը բերում է անհավասար մրցակցության»,- ասաց նա՝ հավելելով, որ բենզալցակայաններում  համատարած ստուգումները շարունակվելու են։

Ինչ վերաբերում է գազալցակայաններին, Գեղամ Գևորգյանն ասաց, որ ԱԳԼՃԿ-ներում խմ-ից անցումը կգ-ի որևէ խնդիր չի առաջացրել ի վնաս տնտեսվարող սուբյեկտների։ Հիմնական խնդիրն, ըստ նրա, օրենսդրական պահանջներին չհամապատասխանելն է։

«Մենք ասում ենք, որ պետք է լինի 200 մթնոլորտային ճնշման գազ, սակայն ստուգումները ցույց են տվել, որ այդ պահանջները չեն պահպանվել: Դա անվտանգության խնդիր է, և մենք այն տվյալները փոխանցել ենք համապատասխան տեսչական մարմիններին»,- ասաց Գեղամ Գևորգյանը:

Գլոբալ խնդիրն այս ոլորտում, ըստ նրա, այն է, որ այստեղ կամ կա ստվեր, կամ այլ տեղից գազ է թաքցվել։