Ձեր վստահելի աղբյուրը

Սեյսմիկ պաշտպանության և փրկարար ծառայությունների  աշխատակիցները շարունակում են աշխատել Երևանի «Դալմա Գարդեն Մոլ» առևտրի կենտրոնում:

«Շենքերի սեյսմակայնության վարչության աշխատակիցներն այս պահին տարբեր գործիքներով փորձում են համոզվել, որ այդ ամբողջ վիբրացիան գալիս է հիմնականում օդորակիչների համակարգից, որը տեղադրված է տանիքի տարբեր մասերում 10 և ավելի հատ»,- լրագրողների հետ զրույցում ասաց ԱԻՆ Սեյսմիկ պաշտպանության տարածքային ծառայության տնօրենի պաշտոնակատար Սոս Մարգարյանը:

Նա նշեց, որ առևտրի կենտրոնի ղեկավարությունից խնդրել են այդ տեխնիկաների անձնագրերը:

«Պետք է հաշվարկենք հզորությունը, աշխատելու հաճախականությունները։ Վարկածներից մեկն այն էր, եթե մաշվածություն ունի, հնարավոր է, որ որոշ ժամանակ հետո էլ մյուս թևը մաշվածություն ունենա, և դա էլ կարող է վիբրացիա առաջացնել։ Բոլորս տանն ունենք կենցաղային տեխնիկա, օրինակ, լվացքի մեքենա, կա վիբրացիան և դրա մյուս տեսակն էլ հնարավոր է, որ դա է: Մեր միակ հիմնական  վարկածը դա է»,- նշեց ԱԻՆ պաշտոնյան:

Նա ընդգծեց, որ շենքը նորակառույց է, կառուցված է նորմերով:

Հարցին՝ շենքի հետ կապված վտանգ չե՞ք տեսնում, Ս. Մարգարյանը պատասխանեց. «Ընդամենը տեխնիկայի աշխատանքի ազդեցությունն է շենքի վրա: Հիմա փորձում ենք հաշվարկել՝ ի՞նչ շարժիչներ են, ի՞նչ հզորությամբ, ո՞րն է իրենց գերակշռող հաճախականությունը, որպեսզի համոզված լինենք: Սարքերն ամբողջ գիշեր միացված են եղել, նայում ենք, առանձնապես ազդեցություններ չկան: Դեռ մինչև օրվա վերջ կարող ենք գրանցումներ անել, ալիքային պատկերները նորից նայել, 90 տոկոս հավանականությամբ այդ խնդիրն է, ուրիշ խնդիր չկա: Հավանաբար, այսօր երեկոյան ուսումնասիրությունները կավարտենք, ևս մեկ անգամ  եզրակացություն կանենք»:

Պատասխանելով հարցին, թե վարկած կա, որ հարակից տարածքներում իրականացվող շինարարության հետևանք կարող է լինել, նա ասաց. «Վարկած է, բայց մյուս կողմից եթե հարակից տարածքում է, պետք է շենքի տարբեր  հատվածներում  զգացվեր, բայց զգացվել է մի տեղ, մի խանութում շատ, հարակից խանութում ավելի թույլ: Ենթադրաբար տեխնիկան, որ դրված է, մեկի վրա շատ է ազդում, մյուս վրա քիչ»:

Ս. Մարգարյանը նշեց, որ շարունակական ցնցումը զգացվել է երկրորդ հարկում:

Հիշեցնենք, որ երեկ երեկոյան «Դալմա Գարդեն մոլում» արձանագրվել էր տեղային ցնցումներ, մարդիկ տարհանվել էին: ԱԻՆ-ից հաղորդել էին, որ Հայաստանի տարածքում երկրաշարժ չի գրանցվել: