Սարհատ Պետրոսյան. Եթե ուզում ենք մեր հանրությանը տալ որակյալ կենսամիջավայր, պետք է նախագծողն անհատական պատասխանավություն կրի
«Մեր ոլորտում վերջին երկու, երկուս ու կես տարվա միակ հիմնարար բարեփոխումը 2017-ին ընդունված «Ճարտարապետական գործունեության մասին» օրենքն է: Հեղափոխությունից հետո այս ոլորտում որևէ բարեփոխում չի եղել»,- ԱԺ «Լուսավոր Հայաստան» խմբակցության անդամ Էդվարդ Անդրեասյանի կողմից խորհրդարանում կազմակերպված քաղաքաշինության բնագավառում կատարվող բարեփոխումների և առկա խնդիրների վերաբերյալ լսումների ժամանակ ասաց ճարտարապետ, քաղաքաշինարար Սարհատ Պետրոսյանը:
Նրա խոսքով, 2017 թվականին, երբ Ազգային ժողովն ընդունեց «Ճարտարապետական գործունեության մասին» օրենքը, ճարտարապետական հանրույթը մոտ 9 տարվա իր աշխատանքի արդյունքում հասավ նրան, որ պետությունից ինչ-որ լիազորություններ տրվեցին ինքնակարգավովող մարմնին՝ Ճարտարապետների պալատին:
«Այսինքն, այս բարեփոխումն իրականացվել է դեռևս «կոռումպացված» ենք ասում, ինչ ենք ասում, իշխանությունների ժամանակ, և հիմա հստակ դիրքորոշում ունեն՝ պետական լիազոր մարմնի կողմից այդ գործառույթը չտալ ինքնակարգավորվող մարմնին։ Ընկերներ, գնացքը գնացել է, Հայաստանում եղել է հեղափոխություն, Հայաստանի վարչապետը հայտարարել է, որ այն բոլոր լիազորությունները, որոնք պետությունը կարող է տալ ինքնակարգավորման, տալու ենք ինքնակարգավորման։ Քաղաքաշինության կոմիտեի վերջին երկու ղեկավարների ժամանակ մտացված, հետևողական կերպով ամեն ինչ արվել է, որպեսզի այս լիազորությունը չտրվի Ճարտարապետների պալատին: Ինչո՞ւ։ Որովհետև հենց որ այս գործառույթը մնում է Քաղաքաշինության կոմիտեն մոտ, ապա մենք բոլորս՝ ճարտարապետներս, կոնստրուկտորներս, վիզներս ծռած պետք է գնանք ինչ-որ մի չինովնիկի մոտ, որ ինքը լիցենզիա տա կամ չտա»,- ասաց Ս.Պետրոսյանը:
Նրա կարծիքով, մարդկանց 4 խումբ կա, որոնք չեն ուզում, որպեսզի արտոնագրումն անի Ճարտարապետների պալատը. «Այն շինարարական կազմակերպություններն են, որոնք ունենալով կամ չունենալով ճարտարապետներ, անում են նախագծման աշխատաքն: Երկրորդ, այն չինովնիկներն են, ովքեր ուզում են իրավաբանական կազմակերպության հետևը կանգնել և զբաղվել նխագծմամբ: Երրորդ՝ անորակ նախագծողներն են, ովքեր չեն ուզում ստանձնել պատասխանատվություն: Չորրորդ խումբը մեր այն գործընկերներն են, որոնց դեռ չենք կարողացել համոզել, որ սա ճիշտ ճանապարհ է: Պետք է աշխատել այս չորրորդ խմբի հետ, մնացածը մեր թիրախում չեն: Եթե ուզում ենք մեր հանրությանը, երկրին տալ որակյալ կենսամիջավայր, իմանալ, որ շենքն ով է նախագծել, միանշանակ պետք է նախագծողը անհատական պատասխանավություն կրի»:
urbanlab.am-ից տեղեկանում ենք, որ գործող օրենքով Ճարտարապետների պալատն ունի այդ լիազորությունը, սակայն Քաղաքաշինության կոմիտեն օրենսդրական փոփոխություններ է մշակել, որոնցով առաջին, երկրորդ, երրորդ դասերի լիցենզավորում է վերապահվում Կոմիտեին։ Ավելին, առանց օրենսդրական փոփոխությունների էլ, Քաղաքաշինության կոմիտեն օրերս հայտարարությամբ հանդես եկավ, որով ծանուցում է, թե «ճարտարապետների պալատի կողմից տրվող արտոնագրի առկայությունը կամ բացակայությունը չի կարող հիմք հանդիսանալ շինարարության թույլտվության տրման կամ մերժման համար»։
Ճարտարապետների պալատի նախագահ, ճարտարապետ Մկրտիչ Մինասյանը ԱԺ-ում հայտարարեց. «Պահպանելով գործող օրենքի տառը՝ մենք անցել էինք աշխատանքի։ Արտոնագրեր են ստացել 255 ճարտարապետներ և 110 կոնստրուկտորներ, ևս 25 ճարտարապետների և 15 կոնստրուկտորների գործերը պատրաստ են քննարկման։ Մենք գրել ենք քննությունների կարգերը, համաձայն օրենքի, սեպտեմբերի 25-ին ներկայացվել է Քաղաքաշինության կոմիտեի հաստատմանը: Մինչև հիմա որևէ արձագանք չենք ստացել, մենք կարգի հաստատում չունենք, չենք կարողանում աշխատել: Եթե ունենք օրենք և դա չենք կատարում, դա արդեն մեծ բաց է: 2 տարի առաջ քայլ ենք արել, որպեսզի այս ամբողջ խնդիրները պարզեցվեն և բաց աշխատենք, մեր միակ և վերջնական ցանկությունը եղել է այն, որպեսզի կարողանանք բաց աշխատել»։
Ճարտարապետ Բորիս Քոչարյանն ասաց, որ ռիսկերի կառավարման համար լավագույն լուծումն անձնական պատասխանատվությունն է, ուրիշ ավելի լավ լուծում աշխարհում հորինված չէ:
«Այս ճանապարհը տանում է անձնական պատասախանատվության, ոչ թե իրավաբական անձի հետևը թաքնված, չգիտես… Շենքին նայում ես, դուրդ չի գալիս, անճոռնի է, երբեք չես կարող իմանալ, թե ով է նախագծել և անանուն նախագծումից պետք է անցնել անվանական պատասխանատվության»,- ասաց ճարտարապետը։
Հարակից հրապարակումներ`
- Սարհատ Պետրոսյան. Վերմիշյանի ղեկավարած կառույցը մի կոկիկ թատրոն չի կարողանում գրագետ կառուցել, ինչ մնաց 28 էջանոց փաստաթուղթը
- Փոփոխությունից հետո հայտնի առանձնատան համար սեփականատերը 8 անգամ ավելի հարկ կվճարի. Սարհատ Պետրոսյան
- Ճարտարապետ. Գաղտնիք չէ, որ այսօր լիցենզավորման գործընթացը կոռումպացված է
- Անհրաժեշտ է ճարտարապետների հավատարմագրման գործընթաց իրականացնել. Մ. Մինասյան