Ձեր վստահելի աղբյուրը

«Սպանդանոցներում անասունների պարտադիր մորթն ավելացնում է գյուղացու ծասերը, անասնապահությամբ զբաղվելն այլևս օգուտ չապահովող գործ է։ Կառավարության շենքի դիմաց այսօր էլ իրենց խնդիրներն ու դժգոհությունները ներկայացնում են անասնապահները, որոնք Երևան են եկել տարբեր մարզերից։ Նրանք հանդիպում են պահանջում վարչապետ Նիկոլ Փաշինյանի հետ՝ ներկայացնելու իրենց դժգոհությունները, նաև խնդրի լուծման առաջարկներ ունեն։

«Գյուղացու կողքը պետք է կանգնեն, նրան աջակցեն, ոչ թե կոտրեն։ Գյուղացին սնունդ է մատակարարում ամբողջ երկրին, զորքին, էգուց ճանապարհները որ շրջափակեցին, դո՞ւ սնունդ կունենա՞ս»,-ասաց նրանցից մեկը։

Գյուղացիներն առաջարկում են անասնաբուժական քննության ենթարկել ներկրված միսը։

«Հինգ օր է՝ ես զանգում եմ սպանդանոց, ասում եմ՝ միս ունեմ, եկեք տարեք։ Ոչ մեկ մեքենա չունի, ասում է՝ բերեք, հասցրեք,  մորթենք։ Մեկ շաբաթ է՝ մորթ չենք արել»,-ասում են նրանք՝ հիշեցնելով, որ վարկ ունեն վճարելու, հիվանդ ունեն, դեղ պետք է գնեն, հազար ու մի այլ կարիքներ։

Անասնատերերը դժգոհ են, որ իրենց դիմաց մեծ թվով ոստիկաններ են բերել։

«Պետք է իրենք իջնեին, մեզ հետ խոսեին։ Բոլորս այստեղ աշխատող, քրտինք թափող տղերք ենք։ Մարդիկ կոպեկներ են աշխատում, որ իրենց երեխեքին պահեն։ Քանի ժամ է, ոչ մեկ կառավարությունից չի իջնում, որ մեզ հետ խոսի։ Մենակ ավտոբուսներով, տաքսիներով ոստիկան են բերում։ Բայց սրանք հզոր ու անվնաս տղերք են, ոստիկաններն էլ մեր ընկերներն են, հարազատներն են, ուրիշ մարդիկ չեն»,-նշում են նրանք։