Մենք բյուջեի ավելցուկ ունե՞նք, հիմա որոշել ենք, որ շաբաշներ ենք տալիս. Սերգեյ Բագրատյան
Խորհրդարանն այսօր քննարկեց «Իմ քայլը» խմբացկության անդամներ Հայկ Կոնջորյանի և Նարեկ Զեյնալյանի կողմից ներկայացված «Պետական կենսաթոշակների մասին» և հարակից օրենքներում փոփոխություններ կատարելոի մասին նախագծերի փաթեթն առաջին ընթերցմամբ ընդունելու հարցը։
Նախագծող առաջարկվում է կերակրողին կորցնելու դեպքում համալսարանում առկա ուսուցմամբ սովորող երեխաներին տրամադրվող աշխատանքային կենսաթոշակ ու նպաստ ստանալը երկարաձգել՝ 23 տարեկանից դարձնելով 26 տարեկան:
Հիմնական զեկուցող Հայկ Կոնջորյանը ներկայացնելով նախագծերի փաթեթը, նշեց, որ գործող օրենսդրությամբ, կերակրողին կորցնելու դեպքում, այն երեխաները, որոնք բուհերում սովորում են առկա ուսուցմամբ, կարող են ստանալ կերակրողին կորցնելու աշխատանքային կենսաթոշակ և կերակրողին կորցնելու նպաստ։ Այդ իրավունքն, ըստ նրա, կարող են պահպանել մինչև 23 տարեկանը:
Նրա խոսքով՝ այդ դրույթը հաստատվել է 10-ամյա կրթական համակարգի և միաստիճան բարձրագույն կրթության հիման վրա, սակայն 2009 թ-ից ՀՀ-ում անցում է կատարվել 12-ամյա միջնակարգ կրթության, իսկ 2004թ-ից՝ երկաստիճան բարձրագույն կրթական համակարգի։ «Այսօր նշված իրավունքից օգտվող ուսանողները բուհն ավարտում են ոչ թե 23 տարեկանում, այլ ավելի ուշ՝ 24, 25 տարեկանում և շատերը զրկվել են այդ իրավունքից»,- ասաց Հայկ Կոնջորյանը։
Այժմ, նախագծի հեղինակներն առաջարկում են, որ այդ իրավունքը պահպանվի մինչև 26 տարեկանը:
«Բարգավաճ Հայաստան» խմբակցության անդամ Սերգեյ Բագրատյանը նշեց, որ 26 տարեկաններն արդեն հասուն մարդիկ են, հնարավոր է, որ ընտանիք ունեն: «Ես չեմ առարկում, բայց հնարավոր է այս միջոցները հատկացնել հաշմանդամություն ունեցող ուսանողներին»,-ասաց պատգամավորը։
ՀՀ աշխատանքի և սոցիալական հարցերի նախարարի տեղակալ Սմբատ Սաիյանն էլ նշեց, որ կառավարությունը դեմ է արտահայտվել այս նախաձեռնությանը: Փոխնախարարը նշեց, որ կերակրողին կորցնելու դեպքում նպաստի չափը կազմում է 26.5 հազար դրամ:
Այնուհետև Սերգեյ Բագրատյանն իր ելույթում անդրադառնալով նախագծին, որ այնքան չեն աշխատել նախագծի վրա, որ պատգամավորներն են հաշվարկներ անում, թե դրա համար որքան գումար է հատկացվելու պետբյուջեից։
«Նախագիծը ներկայացնում են թվերով, հայոց լեզվի ու գրականության շարադրություն չէ, օրենքի նախագիծը պետք է ունենա հստակ թվեր։ Մենք բյուջեի ավելցուկ ունե՞նք, հիմա որոշել ենք, որ շաբաշներ ենք տալիս: Հարգելիներս, ծննդատուն է փակվում՝ տասնյակ միլիոն դրամ չունենալու պատճառով: Եթե սա կազմում է 360 միլիոն, իմ գործընկերոջ (խմբ. նկատի ունի Միքայել Մելքումյանին) հաշվարկն եմ ասում, որովհետև այլ հաշվարկ չունեմ, կարող եք այդ ծննդատներն աշխատացնել» ,- նշեց նա։
Սերգեյ Բագրատյանի խոսքով՝ 26 տարեկանին պետք չէ համարել երկկողմանի ծնողազուրկ։ «Եթե սովորելու հետ եք կապում, ապա երբ ես սովորում էի Կառավարման ակադեմիայում, 63 տարեկան մարդ կար այնտեղ, գուցե իր թոշակի մասին էլ մտածեք, անպայման ծնողազուրկ կլինի: Վերջապես, մենք չպետք է գնանք մի ճանապարհով, որը հաշվարկ չունի, դիլետանտի մակարդակով խոսակցություն եք տանում ընկերներ, սենց օրենք է լինու՞մ: Ստիպված պարոն Մելքումյանը սկսեց ձեր փոխարեն բազմապատկել թվերը: Խնդրում եմ այս օրենքը հետ տարեք, նորմալ մշակեք, աշխատեք, պարոն Սաիյան նորմալ թվերով ներկայացրեք, չի կարելի այսպիսի վերաբերմունք ունենալ»,- նշեց ԲՀԿ-ական պատգամավորը։