Պարզվում է՝ կովերի համար մինչև մինուս 30 աստիճանը նորմալ է. Փաշինյան
Մի կողմից խնդիր ունենք, որ կաթ արտադրողներն այնքան էլ գոհ չեն մթերման գներից ու պրակտիկայից, մյուս կողմից ունենք արտադրողներ, որոնք Հայաստանում չեն կարող իրենց անհրաժեշտ կաթնային հումքը ձեռք բերել: Այսօր գործադիրի այսօրվա նիստում ասաց վարչապետ Նիկոլ Փաշինյանը։
Նրա խոսքով՝ սա այն դիլեման է, որը փորձում են լուծել, այդ թվում՝ խելացի անասնագոմերի ծրագրով։ «Այս ուղերձը մենք պետք է հստակ ուղղենք, որ այն ձևերը, որոնցով սովոր ենք կաթ արտադրել, այդ ձևով արտադրված կաթն այլևս մրցունակ չէ շուկայում լուրջ արդյունաբերական, բիզնես գործունեություն ծավալելու համար»,- ասաց Նիկոլ Փաշինյանը՝ հավելելով, որ դրա համար մարդկանց քաջալերում են, որ նրանք ներգրավվեն «խելացի» գոմերի կառուցման ծրագրում:
Նա հիշեցրեց, որ եթե մարդիկ իրենց սեփական միջոցներով են կառուցում «խելացի» անասնագոմը, ապա 50 տոկոսը պետությունը հետ է վերադարձնում, իսկ սահմանամերձ բնակավայրերի բնակիչներին և զինթոշակառուներին՝ ծախսված գումարի 70 տոկոսը։
Նիկոլ Փաշինյանը նշեց, թե այս ծրագրում, կարծես թե, սկսվել է որոշակի շարժ նկատվել. «Եկեք պայմանավորվենք, որ մենք այս հարցում ֆինանսական սահմանափակումներ չենք ունենալու, մարդիկ ինչքան կառուցեն, մենք այդքան ֆինանսավորելու ենք՝ պայմանով, որ նրանք պետք է կառուցեն ճշգրիտ՝ տեխնիկական պայմաններին համապատասխան անասնագոմեր»։
Վարչապետը նաև ասաց, որ այսօր ամենակարևոր խնդիրը ստացված կաթի պահպանման պայմաններն են ու ջերմաստիճանը, քանի որ արդյունաբերության համար անհրաժեշտ կաթը հատուկ տարաներում պետք է պահպանվի 4 աստիճան ջերմությամբ։
Նիկոլ Փաշինյանը նկատեց, որ սովորական անասնագոմերում միշտ հեղձուցիչ տաք մթնոլորտ է, քանի որ մարդիկ մտածում են՝ այնպես անեն, որ կովերը հանկարծ չմրսեն։ «Բայց պարզվում է, որ կովերի համար մինչև մինուս 30 աստիճանը նորմալ է: Ընդհակառակը, տաք ջերմաստիճանը խանգարում է նորմալ կաթնատվությանը: Նրանց պետք է ապահովել մաքուր օդով»,-ասաց նա:
Հարակից հրապարակումներ`
- Արարատի մարզի ֆերմերները ծանոթացել են «խելացի» անասնաշենքերի կառուցման ծրագրին
- Եթե կենդանին թրիքի մեջ է, մեզ համար ի՞նչ տարբերություն՝ գոմը խելացի է, թե ոչ. վարչապետ
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում