Իմ անձի հանդեպ անվտանգության ռիսկեր եմ տեսնում. Զոհրաբյան
«Հորդորում եմ մնալ կոռեկտության սահմաններում և չփորձեք վիրավորել»,- խորհրդարանում հայտարարեց ԱԺ «Լուսավոր Հայաստան» խմբակցության պատգամավոր Էդմոն Մարուքյանը։
Պատգամավորը նշեց, որ իշխանական խմբակցությունը պետք է ներողություն խնդրի ընդդիմությանը ձիու հետ համեմատելու համար։
ԱԺ «Իմ քայլը» խմբակցության պատգամավոր Համազասպ Դանիելյանը, անդրադառնալով Մարուքյանի խոսքին, նշեց, որ իր խոսքը հերթական անգամ նենգափոխվել է։
«Իմ խոսքը եղել է ալեգորիկ, ձիու հետ համեմատությունը հանրահայտ խոսք է, ինչպես օրինակ անգլերենում ասվում է, որ ընդդիմությունը պահապան շան դեր է կատարում։ Այնպես որ, չարժի վիրավորվել էդ խոսքից, հետո էլ լրատվամիջոցներին, դեսպանատներին ներկայացնել, որ ընդդիմությունը էնքան խեղճացած ա ներկայիս Հայաստանում, ու էնքան դժվարությունների ա հանդիպում։ Այո, եթե դուք ալեգորիկ խոսքը չեք կարողանում հասկանալ, այլ հարց է։ Եվ այդ խոսքը մեկ մարդու է ուղղված եղել, մի տարածեք ամբողջ ընդդիմության վրա»,- նշեց Դանիելյանը։
Հիշեցնենք, որ Համազասպ Դանիելյանը ԱԺ քննիչ հանձնաժողով ստեղծելու հարցի քննարկման ժամանակ իր խոսքը սկսել էր անգլիական ասացվածքով՝ «ձիուն կարող ես տանել աղբյուրի մոտ, բայց երբեք չես կարող ստիպել, որ նա ջուր խմի»։
ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը հարցրեց, թե այդ դեպքում իրենց խոսքը ինչու ալեգորիա չի համարվում։ Պատգամավորի կարծիքով, պետք է որևէ ձևով սահմանել փոխադարձ էթիկայի կանոններ։
«Ես ինքս այլևս չեմ պատրաստվում հանդուրժել որոշ պատգամավորների՝ անձնապես իմ հասցեին այս ամբիոնից հնչեցրած անձնական վիրավորանքները։ Որոշների վերաբերյալ ես արդեն մտածում եմ սկսել իրավական գործընթաց, որովհետև ինձ ուղղակի մտահոգում է մտասևեռումն իմ անձի հանդեպ։ Ես նաև իմ անձի հանդեպ անվտանգության ռիսկեր եմ տեսնում»,- նշեց Զոհրաբյանը։
ԱԺ նախագահ Արարատ Միրզոյանն էլ նշեց, որ Մարուքյանն իրեն կոռեկտության կոչ է անում, բայց երեկ ինքն է հատել այդ սահմանը. «Երեկ պարոն Ռուբինյանի ելույթի ընթացքում դուք իջաք, կանգնեցիք այստեղ, և սկսեցիք զուգահեռ խոսել, գոռալ և ընդհատել Ռուբինյանի խոսքը։ Ես այդ արարքի համար Ձեզ նախազգուշացրի։ Իսկ դուք ասացիք, որ դա միակողմանի նախազգուշացում էր, թեև դա կոռեկտությունից դուրս է»։
ԱԺ նախագահի խոսքին զուգահեռ Մարուքյանն ասաց, որ պետք չէ անընդհատ կրկնել, որ ինքը չի հասկանում։ Միրզոյանն էլ հորդորեց. «Այ ցավդ տանեմ, թող խոսամ»։
Հարակից հրապարակումներ`
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ