Ձեր վստահելի աղբյուրը

«Լուսավոր Հայաստան» խմբակցության գործընկերներ, դուք շատ լավ գտել եք, թե ինչպես մեզ լավագույնս խոցել»,- այսօր խորհրդարանում ասաց «Իմ քայլը» խմբակցության անդամ Մարիա Կարապետյանն՝ անդրադառնալով «Լուսավոր Հայաստան» կուսակցության կառավարման խորհրդի հայտարարությանը։

Նրա խոսքով՝  հունվարի 23-ին  «Լուսավոր Հայաստան» խմբակցության ղեկավար Էդմոն Մարուքյանը հայտարարեց, որ ըստ իրենց, ԱԺ նախագահն անաչառ արբիտոր չէ, ներկայացնում է միայն «Իմ քայլը» դաշինքը, չի կարողանում ապահովել  ԱԺ-ի բնականոն գործունեությունն ու ոտնահարում է իրենց իրավունքները, չարաշահում սանկցիաները։

Ավելի ուշ, ըստ Մարիա Կարապետյանի,  «Լուսավոր Հայաստան» կուսակցության կառավարման խորհուրդը հայտարարություն տարածեց,  ըստ որի, կառավարող ուժը նահանջում է ժողովրդավարության մեջ և դավաճանում հեղափոխության արժեքներին։

«Սրանք լուրջ մեղադրանքներ են ԼՎԿ խմբակցության գործընկերներ, դուք շատ լավ գտել եք, թե ինչպես մեզ լավագույնս խոցել, չէ որ մեզ համար ժողովրդավարությունը կարևորագույն արժեք է, իսկ շատ լավ ճանաչելով ԱԺ նախագահին՝  գիտեք, որ ազնվությունն այդ մարդու այն առաքինությունն է, որի վրա խարսխվում է նրա ողջ քաղաքական գոյը։ Արդյոք արժե՞ր քննիչ հանձնաժողովի ստեղծման մասին, ըստ մեզ՝ իրավական, ըստ ձեզ՝ քաղաքական վեճը դարձնել ԱԺ նախագահի անաչառության և Հայաստանում ժողովրդավարության հարց։ Գուցե արժեր։ Սակայն նմանատիպ տարաձայնությունները հետագայում կրկնվեն, դուք պատրաստվո՞ւմ եք մեզ հռչակել ավտորիտար, գուցե փողոցային պայքա՞ր սկսեք մեր դեմ»,- ասաց Մարիա Կարապետյանը։

Նրա խոսքով՝  իրենց խմբակցությունն արդեն համակերպվել է այն մտքի հետ, որ իրենք քաղաքական թիմի ամենասուր միտք ունեցող գործիչներից մեկին «կորցրել» են, բայց ձեռք են բերել անառարկելի հեղինակություն ունեցող ԱԺ նախագահ, որն իր հեղինակությունը կծառայեցնի ոչ թե մի քաղաքական ուժի, այլ ի շահ պառմալենտարիզմի տարածմանը:

Իմքայլական պատգամավորին արձագանքեց Գևորգ Գորգիսյանը։ Նրա խոսքով՝ քաղաքական թիվ մեկ կառույցում քաղաքական ուժը մեկ այլ քաղաքական ուժի կողմից արժանացել է քաղաքական գնահատականի։ «Հարգելիներս, այս շենքում ինչ կատարվում է՝ քաղաքական է, և դրանից պետք չէ բողոքել, ուղղակի պետք է նկատի ունենալ, որ ցանկացած արարք ունենում է քաղաքական հետևանքներ»,- ասաց պատգամավորը։

Գևորգ Գորգսիյանը նշեց, որ փաստացի իմքայլականներն ասում են՝ «եկեք դուք մեր քաղաքապետի կոռուպցիոն սխեմաների մեջ մի մտեք, ու երբ վաղը դուք ունենաք քաղաքապետ՝ մենք չենք մտնի»։

« Չէ, սիրելիներս, կոռուպցիայի դեմ այդպես չեն պայքարում, միայն խոսքերով չի կարելի։  Խոսում եք լեգիտիմության մասին, այո, շատ լավ է, որ իշխանությունն ունի լեգիտիմություն, բայց այդ լեգիտիմությունը չպետք է բերի ամենաթողություն, քանի որ դա միշտ ունենում է վատ հետևանքներ»,- ընդգծեց Գևորգ Գորգիսյանը՝ հավելելով, որ դա տեսել են 90-ականներին։

Ինչ վերաբերում է Մարիա Կարապետյանի՝ ԱԺ նախագահին ուղղված խոսքերին, ԼՎԿ խմբակցության պատգամավորն ասաց, որ փաստորեն, ըստ իմքայլականների, եթե Արարատ Միրզոյանը չլինի, ապա նրանք քաղաքական դեգրադացիայի կենթարկվեն։ «Էլի ենթարկվեք, եթե Միրզոյանը պետք է Ձեզ զսպի, որ քաղաքական դեգրադացիայի չենթարկվեք, ուրեմն ցավում եմ Ձեզ համար սիրելիներս։ Եւ կարծում եմ՝ Արարատ Միրզոյանը Ձեր պաշտպանության կարիքը չունի»,- նշեց Գևորգ Գորգիսյանը։