Ձեր վստահելի աղբյուրը

Խորհրդարանն ընդունեց շրջիկ առևտուրը կարգավորող օրենքի նախագիծը։ Օրինագծին կողմ քվեարկեց  74 պատգամավոր, դեմ էին ՝ 41-ը։

ԱԺ «Լուսավոր Հայաստան» խմբակցության պատգամավոր Անի Սամսոնյանը նշեց, որ իրենց խմբակցությունը դեմ չէ՝ շրջիկ առևտրի կարգավորմանը, սակայն վստահ է, որ օրենքը կամ վերացնելու է շրջիկ առևտուրը՝ որպես բիզնես, կամ էլ դառնալու է մենաշնորհ որոշ տնտեսվարողների համար։

«Նախագիծը նաև շատ մեծ հայեցողական որոշումների տեղ է թողնում Երևանի քաղաքապետարանի համար՝ որպես համայնք, ինչը անթույլատրելի է բիզնեսի համար։ Այդ իսկ պատճառով «Լուսավոր Հայաստան» խմբակցությունը դեմ է քվեարկելու օրենքի նախագծին»,- նշեց Սամսոնյանը։

Ըստ օրենքի, Երևան քաղաքի տարածքում շրջիկ առևտրի կետերի միջոցով վաճառք իրականացնելու իրավունք ունենալու են միայն իրավաբանական անձինք, նրանց այդ իրավունքը տալու է Երևանի քաղաքապետը, կարգն ու պայմանները տալու է Երևանի ավագանին, տուրքը լինելու է 50 հազար դրամի չափով։

Տնտեսվարողներին քաղաքապետարանը  կարող է մերժել, եթե տվյալ տնտեսվարող սուբյեկտի ներկայացրած չափանիշները չեն համապատասխանում ավագանու կողմից հաստատված նորմերին։ Այդ թույլտվությունը կարող է տրամադրվել կամ մերժվել հայտը ներկայացնելուց հետո 10-օրյա ժամկետում։