Ձեր վստահելի աղբյուրը

Բիզնես խորհրդատու Արեն Ապիկյանն այն կարծիքն է, որ Հայաստանում ավտոմեքենաների գները նվազելու են։

Ինչպես այսօր լրագրողների հետ հանդիպման ժամանակ նշեց Ապիկյանը, նախորդ տարի մեծ քանակությամբ մեքենա է բերվել Հայաստան, որոնք հիմնականում ներմուծվել են բիզնես նպատակով։ Սակայն, ըստ նրա, ներկրողները չկարողանալով վաճառել դրանք, փորձելու են շատ էժան գնով իրացնել, որպեսզի կարողանան մարել բանկերից վերցրած գումարները։

«Դա կբերի ավտոմեքենայի շուկայի փլուզման, քանի որ գները կնվազեն։ Իհարկե, դա լավ նորություն է այն մարդկանց համար, որոնք նախատեսում են մեքենա գնել»,- ասաց Արեն Ապիկյանը։

Նրա խոսքով՝  2019 թ-ին ՀՀ է ներմուծվել մոտ 190 հազար մեքենա, ինչն աննախադեպ է, քանի որ կազմում է Հայաստանի տրանսպորտային միջոցների 1/3-ը։

«Նախկինում հաշվել էին, որ Հայաստանում կա 500 հազար մեքենա, իսկ  անցած տարի ներմուծվել է մոտ 200 հազար մեքենա, ինչը խայտառակ մեծ թիվ է Հայաստանի նման փոքր երկրի համար։ Բնական է, որ Հայաստանում մեքենաների այդքան մեծ պահանջարկ չի եղել, քանի որ այդքան վճարունակ մարդ չկա։ Այսինքն՝ այն մարդիկ, որոնք իրենց համար են ներմուծել, իրենք շահել են, բայց մեքենաների մեծ մասը ներմուծվել է վաճառելու նպատակով»,- ասաց Արեն Ապիկյանը։

Ըստ նրա՝  Ղազախստանից և այլ երկրներից շատերը Հայաստանից  մեքենա են ձեռք բերել, սակայն եթե նույնիկս 50 տոկոսը արտահանվել է, մնացած 50 տոկոսը մնացել է երկրում, իսկ դա լուրջ խնդիր է ստեղծելու բոլոր տեսանկյուններից։ «Նախ այն մարդիկ են տուժելու, որ այդքան մեքենա են ներմուծել, և փորձելու են շատ էժան գնով վաճառել, որպեսզի կարողանան վարկային պարտավորությունները կատարել։ Այսինքն՝ ավտոմեքենայի գները կտրուկ նվազելու են»,- ընդգծեց նա։

Արեն Ապիկյանը նշեց նաև, որ ներկրված մեքենաների շնորհիվ պետությունը մոտ 90 մլրդ դրամի չափով հավելյալ եկամուտ է ստացել, բայց հիմա պետությունը կագնելու է մեկ այլ խնդրի առաջ. «Եթե մարդիկ տուժեն, դա սոցիալական դժգոհություն է առաջացնելու»։

Անդրադառնալով Ղազախստանում ավտոմեքենաների ներկրման հետ առաջացած խնդիրներին՝ բիզնես խորհրդատուն ասաց, որ դրա մեղավորը ղազախներն են, որոնք  ԵԱՏՄ անդամ երկրներից, այդ թվում՝ Հայաստանից,  մեքենա են ներմուծել իրենց երկիր՝ չիմանալով իրենց երկրի օրենքները։

«Հայաստանում օրենսդրության խախտում չկա, այլ բան, եթե ՀՀ պետական մարմինները կանխատեսեին, որ նման խնդիր կարող էր առաջանալ Ղազախստանի հետ, կարող էին զգուշացնել ՀՀ քաղաքացիներին, որ Ղազախստանի քաղաքացիների հետ նման գործարքները կարող են հանգեցնել լուրջ խախտումների»,- ասաց Արեն Ապիկյանը։