Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի աջակիցներն այցելեցին «Եռաբլուր» զինվորական պանթեոն: Լրագրողների հետ զրույցում Ռ.Քոչարյանի որդին՝ Լևոն Քոչարյանը շնորհավորեց բոլորին Հայոց բանակի օրվա առիթվ:

«Իրապես այսօրն այն օրն է, որը բոլորիս միավորում է՝ անկախ քաղաքական հայացքներից ու մնացածից: Բանակն այն կառույցն է, որի մեջ ներդրում ունենք երևի յուրաքանչյուրս՝ ամեն մեկն իր ընտանիքով զինվոր ուղարկելով բանակ: Իմ շնորհակալական խոսքերն եմ հայտնում ու խոնարհվում այն մարդկանց առջև, ովքեր բանակի կայացման գործում ունեցել են մեծ ներդրում, ոմանք նաև իրենց կյանքն են զոհաբերել այդ գործի համար»,- ասաց նա:

Լ. Քոչարյանի խոսքով, ապրիլյան դեպքերը ցույց տվեցին, որ Հայաստանն ունի կայուն բանակ, որը պատրաստ է դիմակայելու թշնամու ոտնձգություններին:

«Ինձ թվում է՝ ամենակարևոր ձեռքբերումը հենց կայացած բանակ ունենալն է»,- ընդգծեց նա:

Լևոն Քոչարյանն ասաց, որ հետևում է ներքաղաքական զարգացումներին, Սահմանադրական դատարանի շուրջ ստեղծված իրավիճակին:

«Եթե ժամանակագրական նայենք, ինձ թվում է, կհասկանանք, թե ինչից սկսվեց այս ամեն ինչը, երբ սկսեցին իշխանությունները հասկանալ,  որ Սահմանադրական դատարանը պետք է փոխվի: Դա ուղիղ կապ ունի հորս գործի հետ: Անցած տարվա մայիսից սկսած, երբ առաջին ատյանի դատարանը գործն ուղարկեց Սահմանադրական դատարան, սկսվեց այդ ամբողջ գործընթացը, թիրախավորվեցին ՍԴ դատավորները: Սեպտեմբերի 4-ի հայտնի որոշումից օրեր անց հրաժարական տվեց ԱԱԾ տնօրենը: Ինձ թվում է՝  այս ամենը ինչ-որ նույն գործողության շարունակական էլեմենտներ են: Հանգուցալուծումը  չեմ կարող ասել, թե ինչքանով տեղի կտան այն հսկայական ճնշումներին, որոնք  գործադրվում են ՍԴ  դատավորների հանդեպ: Չեմ կարող ասել, չեմ կարող կռահել: Իսկ երկրի ղեկավարի նման  պահվածքը, խոսելաոճը, անպատասխանատու հայտարարությունները, կարծում եմ,  առաջին հերթին վնասում են մեր պետությանը, անընդունելի եմ համարում»,- ասաց Լևոն Քոչարյանը:

ԱԺ նախկին պատգամավոր, նախկին դաշնակցական, Ռոբերտ Քոչարյանի ազատության հանձնախմբի համակարգող Աղվան Վարդանյանը նշեց, որ բանակը մեր ողնաշարն է, մեր անկախ պետական հիմքն է, ոգին է, Եռաբլուրում խաղաղ ննջում են այն մարդիկ, ովքեր իրենց կյանքի գնով  բանակ ու պետություն են կառուցել, իրենց կյանքի գնով իրենց պարտքը կատարել են:

Նրա խոսքով, կցանկանար, որ այսօր շատ ավելի տոնական լիներ. «Այսօր պակասում է մեր հավատարմությունը մեր զոհերի հիշատակի առաջ, նրանց փառաբանումն ամեն օր: Ոգին է պակասում, վերաբերմունք է պակասում, բանակի, զինվորականության, հրամանատարության, բանակի ստեղծման, մեր խաղաղ կյանքն ապահովող նախագահների հանդեպ վերաբերմունքն է պակասում: Սա է այսօրվա  իրականությանը: Ժամանակավոր իրականություն է, բայց սա է»,- ասաց նա:

Ա.Վարդանյանը նշեց, որ իրեն չի բավարարում զինված ուժերի նկատմամբ քաղաքականությունը, Արցախի ռազմաքաղաքական ղեկավարության հանդեպ վերաբերմունքը. «Նայեք՝ տասնյակ զորահրամանատարներ ճնշումների տակ են, հալածանքների տակ են, դա անում է  մի թիմ, որի առնվազն 50 տոկոսը բանակի հետ որևէ առնչություն չի ունեցել»: 

«Ինքներս մեզ վստահեցնենք, որ մեր բանակը շարունակելու է ապահովել մեր անվտանգությունը, պաշտպանվածությունը, տարածաշրջանում նաև կայունությունն է երաշխավորելու»,- ասաց Ռոբերտ Քոչարյանի ազատության հանձնախմբի համակարգող Աղվան Վարդանյանը: