«Բա հրամանատարական կազմի հետ այսպե՞ս են վարվում»
Հայաստանի ու Արցախի տարբեր զորամասերից մի քանի տասնյակ սպաներ եկել են Երևան՝ ՊՆ Վազգեն Սարգսյանի անվան ռազմական համալսարանում վերապատրաստման դասընթացներ անցնելու համար։ Նրանցից տասնմեկը քննությունների արդյունքում կտրվել են։
Հունվարի 21-ին մյուսներին շնորհավորել են ընդունվելու առթիվ, ապա սկսել են դասերը։ Այդ ընթացքում Արցախից ու Հայաստանի մարզերից սպաներն իրենց ընտանիքներին տեղափոխել են մայրաքաղաք, վարձով բնակարան գտել, երեխաների դպրոցները փոխել։
Panorama.am-ի խմբագրություն զանգահարած սպաներից մեկը պատմում է՝ չորս օր Վազգեն Սարգսյանի անվան ռազմական համալսարանում դասի գնալուց հետո, երբ իրենց անունները ներառված են եղել մատյանում, տեղյակ են պահել՝ ևս 17 սպա ցածր բալերի պատճառով կտրվել է, ուսումը շարունակել չի կարող։ Կտրվածների թվում է նաև խմբագրություն զանգահարած զինվորականը։
«Բայց նման որոշում լինել չի կարող, մեզ ոչ ոք չի ասել, թե անցողիկ շեմն ինչքան է։ Վերջ ի վերջո մենք եկել ենք վերապատրաստման, գործող զինվորական ենք, կարելի էր վերաքննություն նշանակել։ Սա անհիմն որոշում է»,-դժգոհում է զինվորականը՝ նշելով, որ նախորդ տարիներին մեկ առարկայից անբավարար, մեկից՝ բավարար ստացածները վերապատրաստում անցնելու հնարավորություն են ունեցել։
17 կտրվածներից 12-ը հունվարի 26-ին գնացել են պաշտպանության նախարարություն՝ խնդրելով հանդիպում պաշտպանության նախարարի կամ փոխնախարարի հետ, մինչ այդ հանդիպել էին համալսարանի ղեկավարի հետ։
Ոչ նախարարը, ոչ փոխնախարարը նրանց չեն լսել, կադրերի վարչության պետն է մոտեցել, լսել, որևէ հստակ բան չեն ասել, ապա ՊՆ խոսնակ Արծրուն Հովհաննիսյանն է նրանց հետ խոսել, տեղեկացրել, որ նախարարը որոշումը չի փոխել։
Խնդրի վերաբերյալ ՊՆ խոսնակը ֆեյսբուքյան իր էջում գրել էր. «Բարձրացված հարցը քննարկվում է համակողմանիորեն՝ իրավունքների խախտման կամ խտրական վերաբերմունքի որևիցե դրսեորում բացառելու նպատակով։ Միաժամանակ սպաներին հորդորում ենք զերծ մնալ շանտաժի կամ այլ հակաօրինական միջոցներով իրենց իրավունքները պաշտպանելու փորձերից և նման միջոցներով ընդունված իրավաչափ որոշումները փոխելու պատրանքներից։ Նման մոտեցում ցուցաբերող զինծառայողները կպատժվեն օրենքի ողջ խստությամբ»։
Խմբագրության զրուցակիցն ասում է. «Մեզ ասում են, ինչո՞ւ եք ընտանիքները բերել։ Բա որ չընդունվեիք։ Ես էլ պատասխանում եմ, եղբայր, եթե ես քննությունը տայի, հաջորդ օրը դուք ինձ ասեիք, չեք ընդունվել, ես չէի բերի իմ ընտանիքը։ Բայց ինձ շնորհավորել են, ասել են՝ ընդունվել ես, անունս մատյանում եղել է, երեք օր դասի եմ նստել, բարձր առաջադիմություն եմ ունեցել, կարգապահ եմ եղել։ Սնունդ եմ վերցրել, մի խոսքով, լիարժեք ընդգրկված եմ եղել դասապրոցեսում։ Ես էլ զանգել եմ ընկերոջս, խնդրել եմ Արցախից ընտաիքս բերել է Երևան, այնտեղ վարձած տունն էլ հանձնել եմ»։
Գործող սպան նշում է, մինչ այս պահը ոչ համալսարանի որոշումն է ստացել, ոչ էլ՝ զորամասից ծառայության ներկայանալու ծանուցում։ Զորամաս անպայման կգնա, հակառակ դեպքում քրեական գործ կհարուցվի։
Իսկ խնդրի մասին ԶԼՄ-ներին հարցազրույցներ տալու համար, ինչպես իրեն տեղեկացրել են, ԶՈՒ ԳՇ պետը ցանկանում է տույժի ենթարկել։
«Գիտե՞ք՝ մենք ավելի շատ ինչից ենք վիրավորված։ Առաջնագծում ծառայող սպաներ ենք, խնդիր կա, ուզում ենք նախարարին տեսնել, ինքը մեզ ասի՝ ոչինչ սխալ է եղել, գնացեք, հաջորդ անգամ եկեք, այսինքն սրտացավ մոտեցում տեսնենք։ Բայց ոչ նա եկավ, ոչ տեղակալը։ Հրամանատարական կազմի հետ կարելի՞ է նման կերպ վարվել։ Համալսարանից ասում են՝ ուր ուզում եք գնացեք, նախարարությունից էլ չեն ընդունում։ Երբ սկսում ենք մեր ձայնը բարձրացնել, զանգում են ասում՝ լռեք, թե չէ տույժի կենթարկվեք»,-ասաց նա։
Երևան հասած սպան ասաց՝ կօգտվի առիթից, այսօր այցելելու է Եռաբլուր՝ պատերազմում ընկած ընկերների շիրիմներին, կմասնակցի բանակի օրվան նվիրված միջոցառումներին՝ իհարկե չմոռանալով արհամարհված լինելու, իր ձայնը լսելի դարձնել չկարողանալու, ոտնահարված իրավունքների մասին։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
