Խաժակյան. Փաշինյանի այդ խոսքը բնորոշ է այն ենթամշակույթին, ինչի դեմ պայքարում են
«Կարծում եմ, որ դա նվազագույն գործողությունն էր, ինչ պետք է աներ տվյալ ավագանու անդամը և «Իմ քայլը» խմբակցությունը»,- Եռաբլուր» զինվորական պանթեոնում լրագրողներին ասաց Երևանի ավագանու «Լույս» խմբակցության ղեկավար Դավիթ Խաժակյան՝ խոսելով Երևանի ավագանու «Իմ քայլը» խմբակցության անդամ Հենրիկ Հարթենյանի՝ մանդատը վայր կդնելուն:
Նա նշեց, որ պետք չէ պատասխանատվությունն անհատականացնել, որովհետև դա մեկ անհատի խնդիր չէ. «Դա այն միջավայրն է, այն մթնոլորտն է, այն հռետորաբանությունն է, որը ձևավորվել է իշխող ուժի կողմից, պարզապես երիտասարդը որոշեց իր մասով «իր ներդրումը» ունենալ այդ գործում, պարզապես չափն անցավ, բայց դա չի նշանակում, որ ընդհանուր առմամբ մթնոլորտը դրան չի նպաստել։ Իրականում մթնոլորտը դրան նպաստել է և սա շարունակել չի կարելի»:
Դ. Խաժակյանի խոսքով, «Լուսավոր Հայաստան» կուսակցությունը երբևէ որևէ մեկի նկատմամբ ատելության խոսք չի տարածել, թշնամանք չի տարածել, երբևէ որևէ մեկին անձնական վիրավորանք չի ուղղել, նույնիսկ քաղաքական խոսքում աշխատել են չխախտել մարդկանց անմեղության կանխավարկածը:
«Իսկ տվյալ դրվագով մենք տեսնում ենք, որ այն ճնշումները, որոնք գործադրվում են ՍԴ նախագահի նկատմամբ, դրանք անհամարժեք են, Հարթենյանն էլ որոշել է իր մասով անդրադարձ կատարել։ Սա եզակի դրսևորում չէ, հիշում եք՝ շատ ու շատ այլ դեպքեր են եղել, երբ «Քաղաքացիական պայմանագրի» ներկայացուցիչներ արել են արտահայտություններ, որոնք գուցե սրանից ավելին էին, բայց դրանք ժամանակահատվածից ելնելով հանդուրժվել են։ Պարզապես հիմա հասարակության արձագանքն այդպիսին եղավ, որ ինչ պաշտոնյա էլ լինի, ընտանիքը թիրախավորելն ամենավերջին բանն է, որ կարելի է անել»,- ասաց Դ. Խաժակյանը:
Նրա խոսքով, ճիշտ քայլ էր Հարթենյանի՝ մանդատը վայր դնելը, բայց ոչ առաջին, ոչ վերջին, ոչ էլ դա մեկ անի պատասախանատության հարց է, թիմային պատասխանատվության հարց է՝ քաղաքային իշխանության, կենտրոնական իշխանության, իրենց վարքագծի հարցն է:
Հարցին, թե Կապանում վարչապետը նշեց, որ «Լուսավոր Հայաստանի» ղեկավարը տեղը չի բերում…, առաջին դեպքը չէ, որ նախկին գործընկերների միջև, նախկին համախոհների միջև բանավեճ է ծագում, ի՞նչ կարծիք ունեք, Դավիթ Խաժակյանը պատասխանեց. «Այդ պատասխանը, այդ խոսքը, ինչ ասաց Փաշինյանը, ավելի շատ բնորոշ է այն ենթամշակույթին, ինչի դեմ իրենք Ազգային ժողովի մակարդակով փորձում են պայքարել: Այդ խոսելաոճը հարիր չէ քաղաքական գործչին, առավել ևս վարչապետին: Առավել ևս վարչապետը պետք է նկատի ունենա, թե ում նկատմամբ ինչ հռետորաբանություն է կիրառում: Նա պետք է իր այդ խոսքերը վերանայի»:
Հիեցնենք՝ Կապանում տված իր ասուլիսում, Նիկոլ Փաշինյան(, մեկնաբանելով Էդմոն Մարուքյանի հայտարարությունը, որ այդ քայլով իշխանությունը կորցնում է վստահության քվեն՝ խորհուրդ է տվել ընդդիմադիր գործընկերներին խոսել տանձերի եւ խնձորների մասին, ոչ թե զբաղվել քաղաքական վստահությունը գնահատելով. «Ո՞վ է գնահատում՝ կորցնում ենք մենք քաղաքական վարկանիշը, թե ոչ: Եթե Մարուքյանը շարունակի տեղը չբերել, կհայտնվի Աշոտյանի դերում: Ընտրությունը նրանն է: Մենք խնդիր չունենք: Նա չի կարող գնահատել՝ կորցնում ենք մենք քաղաքական վարկանիշը, թե ոչ: Դա որոշում է ժողովուրդը: Նա դրա իրավունքը չունի. պարզապես չունի»: