Ձեր վստահելի աղբյուրը

«Հանրային ճանաչման համար Արթուր Վանեցյանը բացառապես պարտական է հեղափոխությանն ու այն թիմին, որ իրեն տվել է վստահություն»,- խորհրդարանական ճեպազրույցի ընթացքում նշեց ԱԺ «Իմ քայլը» խմբակցության պատգամավոր Հայկ Կոնջորյանը

Վերջինիս խոսքով, ենթադրյալ քաղաքական հայտ ներկայացնող Վանեցյանի քաղաքական հայտարարությունները մակերեսային են. «Վանեցյանը չունի ոչ մի քաղաքական կապիտալ, նրա հանրային գործունեությունը եղել է որպես ԱԱԾ տնօրեն։ Քաղաքական կոնկրետ ասելիքի բացակայություն կա նրա հայտարարություններում։ Դա սոցիալական տիրույթում երևալու ցանկության հետ է կապված»։

ԱԺ «Իմ քայլը» խմբակցության ղեկավար Լիլիթ Մակունցն էլ նշեց, որ կարծում է՝ այլևս չպետք  է անդրադառնալ Արթուր Վանեցյանին, քանի որ նա դեռևս հանրային կերպով քաղաքական հայտ չի ներկայացրել։

«Երբ ԱԱԾ նախկին պետը կհայտարարի, որ զբաղվում է քաղաքականությամբ, այդ ժամանակ հստակ կլինեն բոլորի դիրքավորումները, և մենք կհասկանանք որպես ինչ ենք արձագանքում Վանեցյանին։ Մինչ այդ մենք այլևս չենք մեկնաբանելու նրա հայտարարությունները»,- նշեց Մակունցը։

Անդրադառնալով ՍԴ նախագահ Հրայր Թովմասյանի երեկվա հայտարարությանը, որ նա չի պատրաստվում զենքերը վայր դնել՝ Մակունցը նշեց, որ ՍԴ-ն որպես ինստիտուտ 2015 թվականի սահմանադրական փոփոխություններից հետո լիարժեք չի գործում, քանի որ այնտեղ գործում են 2 տարբեր ռեժիմներ դատավորների համար։

«Այն անցումային դրույթները, որոնք պետք է սահուն կերպով նախորդ սահմանադրությունից անցում կատարեին ներկա սահմանադրության, բացակայում են։ Թե որն է դրա պատճառը, անմեղության կանխավարկածը չխախտելով, արձանագրենք, որ այն դրույթները, որոնցով պետք է նախկին ռեժիմից ներկա ռեժիմին անցնեինք, արված չեն»,- նշեց Մակունցը։

ԱԺ «Իմ քայլը» խմբակցության պատգամավոր Վահագն Հովակիմյանն էլ նշեց, որ Թովմասյանի բոլոր հայտարարությունները տեղավորվում են քաղաքական ընդդիմախոսի կոնտեքստում։

«Իսկ նա պետք է լինի քաղաքականապես չեզոք։ ՍԴ նախագահը այսօր հանդես է գալիս քաղաքական ընդդիմախոսի դիրքերից, ինչը իրեն իր պաշտոնում անհամատեղելի է դարձնում։ Հենց այն ձևակերպումը, որ գնալու է մինչև վերջ, քաղաքական ընդդիմախոսի տեքստ է»,- նշեց Հովակիմյանը։

Լիլիթ Մակունցն էլ նշեց, որ ՍԴ նախագահը խոսում է Արցախի հիմնախնդրից, և դա ոչ այլ ինչ է, քան քաղաքական խոսք. «Երբ գնահատականներ է տրվում իշխող ուժի քաղաքականությանը, դա արդեն քաղաքական խոսք է։ Բնականաբար, ՍԴ նախագահը հնարավորինս պետք է զերծ մնա քաղաքական ձևակերպումներից, և ուրախ է, որ նա աշխատեց զերծ մնալ նման տեքստերից»։

Դիտարկմանը, որ ըստ Թովմասյանի, գործադիրը չի կարող որոշել՝ աշխատել դատական ճյուղի ղեկավարի հետ, թե ոչ, Մակունցը նշեց՝ իսկ ո՞վ է հայտ ներկայացրել միջամտելու ՍԴ գործունեությունը։

«Հակառակը, մենք ասում ենք, ոչ միայն մենք չենք կարող միջամտել, այլև որևէ այլ քաղաքական թիմ, անձ չի կարող ազդեցություն ունենալ որևէ դատավորի վրա։ Սա է մեր պահանջը, որ անձերի հարցը չէ այստեղ»,- նշեց Մակունցը։

Անդրադառնալով երեկ հասարականան-քաղաքական գործիչների բերման ենթարկվել-ազատ արձակվելուն՝ Մակունցը նշեց, որ իրավապահ մարմինները պետք է պարզաբանումներ ներկայացնեն. «Մենք վաղը խմբակցությունով հանդիպելու ենք ոստիկանապետին, և վաղը այդ հարցը ուղղելու ենք նրան։ Եթե բերման ենթարկվածները մտածում են, որ իրենց իրավունքները խախտվել են, ապա օրենքը նախատեսում է իրավական կարգավորումներ, որպեսզի իրենք պահպանեն իրենց իրավունքները»։