Եթե սա դիտավորությամբ է արվում, ուրեմն բոլորս մտածելու բան ունենք. Տարոն Սիմոնյան
Մեզ համար անհասկանալի է, թե գործադիր իշխանությունն ինչու է միայն անդրադառնում Սահմանադրական դատարանին, երբ խոսքը վերաբերում է դատական իշխանության նկատմամբ անվստահությանը: Այսօր խորհրդարանում ճեպազրույցների ժամանակ ասաց «Լուսավոր Հայաստան» խմբակցության անդամ Տարոն Սիմոնյանն՝ անդրադառնալով Սահմանադրական դատարանի շուրջ ստեղծված իրավիճակին:
«Հասարակությունը չի վստահում դատական իշխանությանը, քանի որ առաջին ատյանի դատարանում չի ստանում իր սրտին, մտքին ոչ համապատասխանող որոշումներ։ Շատ դեպքերում հասարակությունը ճիշտ է, քանի որ մեր դատական համակարգը օբյեկտիվ և սուբյեկտիվ պատճառներով չի կարողանում արդյունավետ արդարադատություն իրականացնել»,- նշեց պատգամավորը։
Տարոն Սիմոնյանի խոսքով՝ այստեղ մեղավորը ոչ թե Սահմանադրական դատարանն է, այլ ամբողջ դատական իշխանության համակարգը՝ սկսած առաջին ատյանի դատարանի դատավորներից, վերջացրած Բարձրագույն դատական խորհրդով:
«Այսինքն՝ յուրաքանչյուրն իր պատասխանատվության մասն ունի։ Եւ այս ամբողջ հսկայական խնդիրը մոռանալ և կենտրոնանալ մեկ անձի շուրջ, կարծում ենք, սխալ մոտեցում է և որևէ լուծման չի տանում»,- ընդգծեց պատգամավորը։
Նա միաժամանակ նշեց՝ ենթադրենք, անձին փոխարինեն մեկ այլ անձով, միևնույն է համակարգը մնում է ոչ աշխատունակ վիճակում կամ էլ անարդյունավետ է աշխատելու։ Ըստ Տարոն Սիմոնյանի՝ այսօր կան դատավորներ, որոնք գերծանրաբեռնված են ու չեն կարողանում արդյունավետ որոշումներ կայացնել, կան դատավորներ էլ, որոնք չեն կարողանում հարմարվել առկա պայմաններին ու ունակ չեն արդարադատություն իրականացնել:
«Այս հսկայական խնդիրները թողած՝ մենք անդրադառնում ենք միայն մեկ դատավորի՝ ասելով, որ եթե նրան փոխարինենք, ապա ամբողջ դատական համակարգը կվերափոխվի, ինչը սխալ մոտեցում է: Եթե սա դիտավորությամբ է արվում, ուրեմն բոլորս մտածելու բան ունենք, քանի որ դա կարող է դիտարկվել իշխանության մեկ թևից ճնշում իշխանության մեկ այլ թևի նկատմամբ, ինչն անընդունելի է, քանի որ ամրագրել ենք իշխանությունների տարանջատման սկզբունք»,- ընդգծեց ԼՎԿ խմբակցության պատգամավորը։
Նա նաև նշեց՝ եթե այդ զսպումները դուրս են գալիս Սահմանադրությամբ թույլատրելի շրջանակներից, դա, ըստ էության, քաղաքական ճնշում է իրենից ենթադրում, ինչը տեսնում են և գործընկեր պատգամավորների, և գործադիր իշխանության ներկայացուցիչների արտահայտած մտքերում։
«Մենք մեր գործընկերներին հորդորում ենք, որ իրենց քաղաքական հռետորաբանությունում ուղղակի զերծ մնան մեղադրանքներից, եթե դրանց համար իրավական հիմքեր չկան: Եթե առանց այդ հիմքերի անձին մեղադրանք է հնչեցվում, դա իհարկե ճնշում է: Իսկ եթե կան իրավական հիմքեր, ապա թող այս դեպքում մարդիկ ենթարկվեն պատասխանատվության և լքեն իրենց պաշտոնը, բայց եթե առանց այդպիսի հիմքերի հայտարարությունների մակարդակում է կատարվում, ապա ճնշումն առկա է»,- նշեց Տարոն Սիմոնյանը։
Հարակից հրապարակումներ`
- Մակունց. Եթե բերման ենթարկվածները մտածում են, որ իրենց իրավունքները խախտվել են, ապա կան իրավական կարգավորումներ
- Թովմասյան. Իմացեք, որ մի օր էլ էդ ուղտը ձեր դռանն է չոքելու
- Հրայր Թովմասյան. Որոշ մարդիկ քաղաքավարության կանոնները շփոթում են քծնանքի հետ
- Հրայր Թովմասյան. Ինձ ոչինչ չի կասեցնի