Մենք ունենք ինֆորմացիա հայթայթելու շատ ավելի ծանր իրավիճակ, քան մինչև 2018 թվականը. Օհանյան
«2018-ից հետո մեր դեմ սոցցանցերում սկսվեցին հարձակումներ»,- «Մամուլի հետհեղափոխական մարտահրավերները․ սպասելիքներ և անելիքներ» խորագրով քննարկման ընթացքում այսօր նշեց «Հրապարակ» օրաթերթի գլխավոր խմբագիր Արմինե Օհանյանը։
Նրա խոսքով՝ մամուլի ազատությանը սպառնացող վտանգների մասին առաջին ահազանգը խմբագիրները հնչեցրել են դեռևս 2018 թվականի օգոստոս-սեպտեմբերին։
«Այդ ժամանակ առաջին արշավն էր «Հրապարակի» դեմ, երբ #ոչՀրապարակին ֆեյսբուքյան հեշթեգն էր, որ ղեկավարվում էր ՔՊ որոշ ներկայացուցիչների կողմից։ Նրանցից ամենաակտիվը հիմա ԱԺ աշխատակազմի ղեկավարի տեղակալն է։ Այդ հատվածում իշխանությունները նշում էին, որ դա ժողովրդի ինքնաբուխ վերաբերմունքն է, քանի որ իշխանությունը երբեք այդքան սիրված չի եղել, որքան հիմա։ Եվ իշխանություններին քննադատող ԶԼՄ-ները բնականաբար հայտնվում են այդ սիրահարված մասայի թիրախում։ Մենք զգուշացնում էինք, որ իշխանությունը պետք է դուրս գա ֆեյսբուքներից, և երկիրը տանի դեպի կառուցողական փուլ»,- ասաց Արմինե Օհանյանը։
Ըստ նրա՝ չի կարելի թույլ տալ, որ ցածր կրքերով առաջնորդվող զանգվածը խանգարի լրագրողների և լրատվամիջոցների աշխատանքին. «Ցավոք, իշխանությունը մեզ չանսաց, և մենք այսօր ունենք ավելի խորացած հիվանդություն, որի դեմ պայքարելու մեթոդները կասկածելի են, և չենք կարող ունենալ այն արդյունքը, որ կարող էինք ունենալ 2018 թվականին։ Հիմա ուզում են օրենքով իրականացնել ատելության խոսքի դեմ պայքար»։
Օհանյանը հայտնեց, որ օրեր առաջ տեղեկացել է՝ կա օրենսդրական նախաձեռնություն, որով փորձ է արվում զրպարտություն եզրույթի ծավալը մեծացնել, որով ֆեյսբուքյան ցանկացած գրառում, որտեղ կլինի ոչ հավաստի տեղեկություն, կդիտվի որպես զրպարտություն և սուտ մատնություն։
«Սա շատ վտանգավոր ճանապարհ է։ Եթե օրենքի նախագիծ ընդունվի, մենք խնդիրներ կունենանք և միջազգային հանրության հետ, և մամուլի խոսքի ազատության խնդիրներ կարող են առաջանալ։ Երբ խոսում են խոսքի ազատության անսահմանափակ լինելուց, իբրև 2 տարում հասել ենք ինչ-որ բարձունքների, պետք է նշել, որ ազատ արտահայտվելու հնարավորություն մենք ունեցել ենք նաև 2018-ին նախորդող 10 տարիների ընթացքում։ Այդ ընթացքում չի եղել որևէ թեմա, որևէ հրապարակում կամ որևէ անձ, ով անձեռնմխելի լինի, կամ ում մասին մենք կարողացած չլինենք գրել այն, ինչ ուզում ենք։ Ինչ վերաբերում է մնացած առումներով մեր աշխատանքին, այն շատ-շատ բարդացել է 2018-ից հետո։ Մենք ունենք ինֆորմացիա հայհայթելու շատ ավելի ծանր իրավիճակ, քան մինչև 2018 թվականը»,- ասաց Արմինե Օհանյանը։
Ներկայիս իշխանությունն, ըստ նրա, թեև նախքան ընտրվելը դեմոկրատական լոզունգներով էր առաջ շարժվում, այժմ թափանցիկությանն այդքան էլ կողմ չէ. «Հիմա իրոք տեղեկատվություն ստանալը շատ բարդացել է։ Եվ երբեմն պետական մարմիններից մի փոքր ինֆորմացիա ստանալու համար մենք զանգ ենք կատարում, և նրանք անամոթաբար ստում են։ Նախորդ շաբաթ մենք այդպիսի դեպք ունեցել ենք»։
Լրահոս
Տեսանյութեր
Արևմտյան Հայաստանի ու արդեն Արցախի հուշարձանները՝ «ցեղասպանված հուշարձաններ»
