Ձեր վստահելի աղբյուրը

2016-2020 թվականներին զինված ուժերում արձանագրված ինքնասպանությունների վերլուծություն է կատարվել, գրանցված դեպքերի 19,1 տոկոսը ուղարկվել է դատարան, նույնչափ գործեր կասեցվել են, մի քիչ ավելի շատ  գործեր կարճվել են։  «Խաղաղ պայմաններում մահվան դեպքերի մտահոգիչ պատկեր․ պատճառներ» թեմայով քննարկմանն ասաց  ՀՀ ՔԿ ԶՔԳՎ վերահսկողության վարչության պետ Պերճ Այվազյանը։

Նրա ներկայացրած տվյալների համաձայն, 2015 թվականին բանակում արձանագրվել է 57 դեպք,  որից ինքնասպանության կամ ինքնասպանության հասցնելու դեպքերը 6-ն են եղել, 2016 թվականին ունեցել են 140 զոհ, 14-ը եղել է ինքնասպանություն կամ ինքնասպանություն հասցնելու դեպք, 2017-ին՝ 56 դեպքից 10-ը, 2018-ին՝ 37-ից 11-ը, 2019-ին՝ 20 դեպքից 7-ը։

«Այլ հարց է, որ մահերի մեջ ինքնասպանությունների տեսակարար կշիռը դեռևս բարձր է, ինչը  ցավալի է։ Սպանությունները քիչ մասն են կազմում, լինում են մարտական  ծառայություն կրելու կանոնների խախտման, զենքի  հետ վարելու կանոնների խախտման պատճառով մահեր, դժբախտ պատահարներ, հիվանդություններ, ականի պայթյունի հետևանքով զոհեր»,- ասաց Պ. Այվազյանը։
 
«Հելսինկյան ասոցիացիա» իրավապաշտպան ՀԿ նախագահ Նինա Կարապետյանցի խոսքով, այսօր մարդիկ իրենց տղա երեխաների քաղաքացիությունը փոխում են ու լքում երկիրը։

«Մենք այդքան մարդկային ռեսուրս ունե՞նք, որ օտար երկրներին մեր տղա երեխաներին նվեր տանք։ Այս ի՞նչ են անում։ Քանի դեռ մեզ կերակրում են ստատիստիկայով,  մեծ թվերի բացահայտումներով, իրար մեդալ ու  պագոն բաժանելով,  սա է լինելու մեր վիճակը»,- նշեց իրավապաշտպանը։

Քննարկմանը ներկա «Լրագրողներ հանուն մարդու իրավունքների» ՀԿ նախագահ Ժաննա Ալեքսանյանն հարցադրում արեց, թե ո՞վ է ընդհանրապես ճանաչում զինվորական դատախազ Վահե Հարությունյանին։

«Երբևէ չենք տեսնել նրան զինվորի մահվան դեպքի վայրում, զորամասում, զինվորական դատախազին ուղղված մեր բողոքներին որևէ արձագանք չկա։ Պարզվում է՝  գլխավոր դատախազի հետո ինչ-որ թվեր էին  ներկայացնում։ Թվերով չէ է, դրանք մարդկային կյանքեր են, թվեր չպետք է ներկայացնեն։  Հենց դա է, որ նստում են  ու խոսում են թվերով, այս թիվը նվազեց, ...  իսկ այն, որ ամեն զինվորի կյանքը մեզ համար թանկ է, պետք է գործով ցույց տայիք, ոչ թե խոսքերով, ոչ թե ամեն հունվարի 1-ից նոր մահեր հաշվենք։ Գումարեք ու տեսեք՝ ինչ սարսափելի թվեր են»,- ասաց նա։

Ն. Կարապետյանցը նշեց, որ թող կանչեն իրավապաշտպաններին իրենց ունեցած քրեական գործերով. «Մենք կգանք մեր կոնկրետ քրեական գործերով,  կծեփենք պատերին ու  կփռենք ասֆալին  բոլոր այն դատախազներին, քննիչներին, որոնք, ըստ ձեզ, նորմալ աշխատում են։ Որովհետև այն փաստերը, որոնք ունենք մենք, ամեն օր պատեպատ ենք մեզ տալիս։ Նստում եք  ձեր կաբինետներում, այդ ծնողների աչքերի մեջ չեք նայում։  Շատ կոմֆորտ զոնայի մեջ են  պատգամավորները, կառավարությունը,  քննչական կոմիտեն, դատախազությունը»։

Ժաննա  Ալեքսանյանն  ավելացրեց. «Եթե մարդիկ, ընտանիքը կարող է իր զավակի դին վերացնել ու  դուրս գալ փողոց, սրանից սարսափելի բան  գոյություն չունի։ Եթե դա չէր ցնցել հայաստանյան հեղափոխական ղեկավարությանը, նորանշանակ նախարարին, դրանից հետո եղել են ևս յոթ դեպք, ես անհույս եմ համարում, որ կա քաղաքական կամք, մղում, որպեսզի բանակում այս իրավիճակը փոխվի։ Այո, մենք շարունակելու ենք պայքարել ու ամեն ինչ հրապարակային դարձնել»։