Թևան Պողոսյան. Մյունխենում աշխարհին պետք էր ցույց տալ կայացած Արցախը
«Եթե մենք գիտակցում ենք, որ անվտանգությունը չենք զիջում, ուրեմն մեր բոլոր ծրագրերի, նպատակների, կառավարությունների, քաղաքական կուսակցությունների, բյուջեների և ամեն ինչի կտուրը, կամ վերևի գաղափարը պետք է լինի անվտանգությունը»,- նման կարծիք հայտնեց «Մարդկային զարգացման միջազգային կենտրոն» ՀԿ նախագահ Թևան Պողոսյանը «Վատ խաղաղությո՞ւն, թե՞ լավ պատերազմ. Արցախյան խնդրի կարգավորման հեռանկարները» թեմայով քննարկմանը։
Այս առումով նա հիշեցրեց վարչապետ Նիկոլ Փաշինյանի՝ Մյունխենում արած հայտարարությունը, ըստ որի, եթե Ղարաբաղը Ադրբեջանի համար տարածք է, ապա Հայաստանի համար այն անվտանգություն է, որը չի զիջելու։
Քաղաքագետն ընդգծեց, պետք է նայել անվտանգության բաղադրիչներն ու հասկանալ, թե ինչ ուղղությամբ պետք է աշխատանքներ իրականացվեն։ Այդ բաղադրիչները՝ ժողովրդագրությունը, սպառազինությունը, կրթությունը, ավելի լավ տնտեսությունը բավարար չեն անվտանգությունը չզիջելու համար։
«Դրա հետ միասին նաև ազգային միասնականություն է պետք, ճկուն ազգային դիվանագիտություն է պետք»,- ասաց Պողոսյանը՝ ավելացնելով, որ պետք է սովորել ցանկացած երևույթ մեկնաբանել Հայաստանի շահերից ու ճիշտ առաջ տանել այն։
Նրա ձևակերպմամբ, պետք է ոչ թե դատախազի, քննիչի պես մեղադրել ու մեղավորներ նշանակել, այլ պատմությունից դասեր քաղել, վարքագիծը փոխել ու քննարկել, թե դրանք ինչպես պետք է ապագայում կիրառել։
«Մենք պետք է հասկանանք, եթե կա խնդիր, ուրեմն կրթական համակարգում պետք է կարողանանք այնպիսի ծրագիր մշակել, որ ցանկացած հայ փայլուն տիրապետի պատմական բոլոր ակնարկներին, իրեն պետք չլինի գրավոր տեքստ տալ, որ կարողանա ճիշտ շեշտադրումներ անել։ Մենք որդեգրել ենք ժողովրդագրության զարգացման մեխանիզմը, ինչը նշանակում է, որ հինգ տարին մեկ մենք կարող ենք նոր իշխանություն ունենալ։ Շատ լավ կլինի, որ ապագա մեր բոլոր բանակցողներն ավելի պատրաստված լինեն»,- մանրամասնեց բանախոսը։
Նրա պատկերացմամբ, Մյունխենում պետք է հնչեր շատ մոտ ապագայի վերաբերյալ ուղերձ։
«Ընդամենը մեկ ամսից Արցախում տեղի են ունենալու ԱԺ և նախագահի ընտրություններ, Արցախի ժողովուրդն ընտրելու է իր իշխանություններին։ Մյունխենը լավագույն տեղն էր, որ կարելի էր ասել այդ գաղափարի մասին, դրանից հետո նույնիսկ չանդրադառնալ այլ հարցերի։ Պետք էր ասել, բոլորիդ հրավիրում եմ, եկեք, դիտորդ եղեք, ձեր աչքով տեսեք զարգացած, կայացած Արցախի Հանրապետությունը, կայացած քաղաքական միավորը աշխարհի քարտեզի վրա։ Աշխարհին պետք է ցույց տալ կայացած Արցախը։ Օրինակ, Եվրոպան երբ տեսնում է կայացած Կոսովո կա, ճանաչում է, տեսնում է կայացած Էրիթրիա կա, ճանաչում է»,-ասաց Պողոսյանը։
Նրա պնդմամբ, պետք է կարողանանք կայացած Արցախը ճիշտ ներկայացնել աշխարհին, իսկ Արցախի կայացման գործում ճիշտ քայլեր ու ծրագրեր իրականացնել, գիտակցենք, որ խնդիրը երկարատև է, սերնդեսերունդ կարող է շարունակվել, պարտադիր չէ շտապել ու թուղթ ստորագրել, պետք է դիմանալ ու խնդիրը բերել մի իրավիճակի, երբ ապագա սերունդները կգան հայանպաստ լուծման։
«Շտապելու խնդիր չէ, ժամանակը ճիշտ օգտագործելու խնդիր է։ Մեր վարքագիծը պետք է փոխվի նաև խոսքի մեջ։ Ամեն խոսքից հետո ես պետք է մտածեմ՝ հետևանքը միասնականությո՞ւնն է, հետևանքն ա՞յն է, որ ես նպաստեցի անվտանգությանը, որը մենք պատրաստ չենք զիջելու, թե՞ նպաստեցի, որ ադրբեջանական ֆեյքերն ավելի շատ մտնեն ու մեր ազգային միասնականությունը բզկտեն»,- նշեց քննարկման մասնակից քաղաքագետը։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին