Ձեր վստահելի աղբյուրը

«Ամեն ինչ պետք է զսպումների և հակակշիռների տրամաբանության մեջ լինի, հետևաբար չափազանց կարևոր է իշխանության բոլոր ճյուղերի անկախությունը, ինչը երաշխավորելու քայլերից մեկն էլ ձեռնարկվող սահմանադրական փոփոխությունների հանրաքվեն է»,- այսօր խորհրդարանում լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով վարչապետ Փաշինյանի հայտարարությանը, թե Հայաստանում չի կարող սուպերվարչապետական համակարգ գործել։

Մակունցի խոսքով, սահմանադրական փոփոխությունների հանրաքվեն կլինի երաշխիք, որ իշխանության մի ճյուղի ձեռքում չեն կենտրոնանա իշխանության մյուս ճյուղերը։

Անդրադառնալով Սահմանադրության ամբողջական փոփոխությունների հանրաքվեին՝ Մակունցը նշեց, որ հստակ ժամկետ, թե երբ կլինի այն, չկա, քանի որ ամեն ինչ կախված է սահմանադրական փոփոխությունների հանձնաժողովի աշխատանքի տևողությունից. «Չեմ կարծում, որ աշխատանքը մի քանի տարի կտևի»։

«Այս առնչությամբ ես ասել եմ, որ սահմանադրական փոփոխությունների աշխատանքային խումբը  պետք է քննարկի նաև խորհրդարանի և խմբակցությունների ուժեղացման հարցը։ Մենք՝ որպես պատգամավորներ, այստեղ նախաձեռնողականություն ցուցաբերում ենք, բայց սահմանադրական փոփոխությունների հնարավորությունը նույնպես պետք է օգտագործել այդ առումով»,- ընդգծեց Մակունցը։

Ըստ նրա, նախատեսվում է նաև դատաիրավական փոփոխությունների փաթեթ, որի շրջանակում գուցե առաջարկվեն փոփոխություններ, որոնց համաձայն ոստիկանությունը և ԱԱԾ-ն խորհրդարանին հաշվետու լինեն. «Պետք է հարցը ամբողջապես քննարկենք, այլ ոչ հատվածական վերցնենք և նայենք։ Չորեքշաբթի օրերին գալը և հարց ու պատասխանին մասնակցելը արդյո՞ք խորքային առումով լուծում է այն խնդիրը, որը խորհրդարանը դնում է իր առջև։ Հույս ունեմ, որ դատաիրավական փաթեթի բարեփոխումներում այդ հարցը նախատեսված կլինի և լուծումը կտրվի»։

Դիտարկմանը, թե քաղաքական որոշ ուժեր հայտարարել են, որ չեն մասնակցելու հանրաքվեին, իսկ «ոչ»-ի շտաբը հայտարարել է, որ ակտիվ քարոզչություն չի անելու, Մակունցն արձագանքեց, թե քաղաքական ուժերն իրենք են ընտրում՝ մասնակից են, թե ոչ. «Ինձ համար հարցն այլ դաշտում է՝ քաղաքական հայտ ներկայացնող կուսակցությունները համապետական այս իրադարձությանը որևէ դիրքորոշում չեն հայտնում: Եվ երկրորդ՝ չնայած պաշտոնապես հայտարարվել է, որ «ոչ»-ի քարոզ չի իրականացվելու, այնուամենայնիվ, այն քաղաքական ուժերը, որոնք բոյկոտի կոչ են անում, դրանով արդեն գրեթե անթաքույց իրականացնում են «ոչ»-ի քարոզարշավ»:

Հարցին՝ ինչու՞ սահմանադրական փոփոխությունների փաստաթուղթը չի ուղարկում Վենետիկի հանձնաժողով, Մակունցը պատասխանեց, որ դեռևս վերջնական քաղաքական որոշում չունենայդ առումով։ Նա վստահեցրեց՝ որոշում ընդունելու ժամանակ ունի իշխանությունը, բայց այստեղ մի փոքր տարակուսանք է առաջանում, քանի որ խոսքը արդեն իսկ հաստատված փաթեթի մասին է։

Դիտարկում եղավ, թե իշխանությունը հուսախաբ է արել իր օգտին քվեարկած 850  հազար քաղաքացիներին. «Ընդդիմադիր Նիկոլ Փաշինյանն ասում էր, որ նախագահի ձեռքից վերցրել են ամեն ինչ, նրա թևերը կտրել, ուղարկել են մի եվրավերանորոգված շենք ու ասել՝ նստի։ Դա չէ՞ր նշանակում, որ վարչապետն ու նախագահը պետք է հավասար լիազորություններ ունենային, մինչդեռ հիմա վարչապետը հայտարարում է, որ կառավարման մոդելի փոփոխություն առաջիկայում չի լինելու»։

Պատասխանելով՝ Մակունցն ասաց՝ ոչ, դա չի նշանակում, որ իշխանությունը հուսախաբ է արել իր ընտրողին։

«Սահմանադրական փոփոխությունների փաթեթ է քննարկվելու, և այն հարցերը, որոնք մտահոգություն են առաջացնում և սահմանադրական փոփոխությամբ կարող են լուծվել, ներառական աշխատանքի միջոցով կլուծվեն։ Ես ուզում եմ հիշեցնել, որ մենք ունեցել ենք կիսանախագահական կառավարման մոդել, որը փաստաթղթերով իսկապես եղել է իդեալական, բայց գործել է որպես սուպերնախագահական մոդել։ Իրավական գործընթացներից բացի չափազանց կարևոր է նաև քաղաքական կամքը։ Եվ ես ուզում եմ ընդգծել, որ ցանկացած ընտրության պարագայում կարևոր է քաղաքական կամքը հաշվի առնելը»,-շեշտեց Մակունցը։

Հարցին՝ արդյոք իշխանությունն արդեն ունի նոր ՍԴ դատավորների հավանական թեկնածուների ցանկ, Մակունցը պատասխանեց՝ ինքը չգիտի, թե ովքեր են դիտարկվում որպես ՍԴ դատավորներ. «Տեղյակ լինել չեմ կարող, քանի որ դա մեր լիազորությունների տիրույթում չէ։ Մենք չպետք է տեղյակ լինենք այդ ցանկից, ու չպետք է իմանանք, թե որպես ՍԴ դատավոր ո՞ւմ է տեսնում նախագահը, կամ ում կառաջարկի կառավարությունը»։

Անդրադառնալով ՍԴ դատավոր Վահե Գրիգորյանի ՍԴ նիստերից բացակայելուն ՝ Մակունցն ասաց, որ յուրաքանչյուր սահմանադրական մարմնի առնչվող հարցի առաջինը պետք է պատասխանի այդ մարմինը. «Ես չգիտեմ՝ ինչ հիմք կա այդ բացակայությունների տակ, արդյոք ներկայացվում են որոշակի փաստաթղթեր ՍԴ, թե ոչ։ Այդ հարցին պատասխանող կողմը և այդ հարցին ընթացք տվողը ՍԴ-ն է»։

Ինչ վերաբերում է վարչապետ Փաշինյանի հայտարարությանը, թե արցախցիները չպետք է քվե տան Արցախի նախագահի այն թեկնածուներին, որոնք ՀՀ լեգիտիմ իշխանության մասին ատելության քարոզ են անում, ապա, ըստ Մակունցի, այդ հայտարարությունն ուղղորդող կոչ չէր։